ޖޯޑަންގެ ތެރެއިން އީރާނަށް ޖާސޫސް ކުރަން ވަދެ އުޅުނު އިޒްރާއީލްގެ ޑްރޯންތަކެއް އީރާނުގެ އަސްކަރިއްޔާއިން ވައްޓާލައިފިއެވެ.
އަލްޖަޒީރާއިން ބުނީ އީރާނުގެ އަސްކަރިއްޔާގެ މުހިއްމު ހިސާބުތަކަށް ވަދެ އުޅުނު އިޒްރާއީލަށް ނިސްބަތްވާ ޑްރޯންތަކެއް އީރާނުގެ ވައިގެ ސިފައިންގެ ޔުނިޓުން ވައްޓާލާފައިވާކަމަށެވެ. މިދިޔަ 24 ގަޑިއިރުގެ ތެރޭގައި އެފަދަ 28 އުޅަނދު ނައްތާލާފައިވާކަމަށް އީރާނުގެ އަސްކަރިއްޔާއިން ބުނެފައިވާކަމަށް އަލްޖަޒީރާއިން ވަނީ ރިޕޯޓްކޮށްފައެވެ.
އީރާނުެގ އަސްކަރިއްޔާއިން ބުނެފައިވަނީ، އެ ހުރިހާ ޑްރޯންތަކެއް އީރާނުގެ މަނާ ސަރަހައްދުތަކަށް ވަދެފައިވަނީ ޖޯޑަން ތެރެއިންލާފައިކަމަށެވެ. އީރާނުގެ އަސްކަރިއްޔާއިން ވަނީ މީގެ ކުރިން އެތައް ފަހަރަކު އީރާނުގެ ތެރެއަށް ވަދެ އުޅުނު އިޒްރާއީލްގެ ޖެޓްތަކެއްވެސް ވައްޓާލާފައިވާކަމަށް ބުނެފައެވެ. ނަމަވެސް އިޒްރާއީލުން ވަނީ އީރާނުގެ ވާހަކަތައް ދޮގުކޮށްފައެވެ.
އިޒްރާއީލާ އީރާނުގެ ހަމަލާ ބަދަލުކުރުންތައް ސީރިއަސް ހާލަތަކަށް އައިސްފައިވާއިރު، އީރާނުން މިރޭވެސް ވަނީ އިޒްރާއީލްގެ ތެރެއަށް ހަމަލާތަކެއް ފޮނުވާލާފައިވާކަމަށެ ބުނެފައެވެ. އިޒްރާއީލުންވެސް ވަނީ އެކަން ޔަގީންކޮށް، ހަމަލާ އަރާފާނެ ސަރަހައްދުތައް އެލާޓަށް ގެނެސްފައެވެ. އިޒްރާއީލުން ބުނާގޮތުގައި އެޤައުމުގެ އަސްކަރިއްޔާއިން ހަމަލާދެނީ ނިއުކްލިއާ ޕްލާންޓްތައް ހުންނަ ސަރަހައްދުތަކަށެވެ. ނަމަވެސް އީރާނުން ބުނެފައިވަނީ މިހާތަނަށް އެޤައުމަށް ފޮނުވި ގިނަ ހަމަލާތައް އަމާޒުވެފައިވަނީ އާއްމު ސަރަހައްދުތަކަށް ކަމަށެވެ.
އީރާނާއި އިޒްރާއީލާ ދެޤައުމު ހަނގުރާމައިގެ ހައްސާސް ހާލަތަކަށް ގޮސްފައިވާއިރު، އެމެރިކާއިން ވަނީ ހަމަލާތައް ހުއްޓާލަންޖެހޭކަމަށް ބުނެފައެވެ. ހަމަލާތަކުގައި އިޒްރާއީލަށް ކުރިން ހީކުރިވަރަށްވުރެ ބޮޑެތި ގެއްލުންތަކެއް ލިބެމުންދާއިރު، އީރާނުން ބުނެފައިވަނީ ރައްދުގައި ދޭ ހަމަލާތައް ފަހަރަކަށްވުރެ ފަހަރެއް ނުރައްކާވާނޭކަމަށެވެ.
Advertisement
This content is created and paid for by advertisers and does not involve Voice Journalists
