ހދ. ހިރިމަރަދޫ ރައްޔިތުން އެހެން ރަށަކަށް ބަދަލުކުރުމުގެ މަސައްކަތް އަވަސްކޮށްދިނުމަށް ހދ އަތޮޅު ކައުންސިލުން ސަރުކާރުގައި އެދިއްޖެ އެވެ.
އެ ކައުންސިލުން މިކަމަށް އެދުނީ ރައީސުލްޖުމްހޫރިއްޔާގެ ނައިބު ހުސައިން މުހައްމަދު ލަތީފްއާ އެކު މިއަދު އޮތް ބައްދަލްވުމެއްގަ އެވެ. މި ބައްދަލުކުރެއްވުން އޮތީ މިއަދު ރައީސުލްޖުމްހޫރިއްޔާގެ އޮފީހުގައެވެ.
މި ބައްދަލުކުރެއްވުމުގައި އަތޮޅު ކައުންސިލުގެ މެންބަރުން ވަނީ، މުޅި އަތޮޅުގެ ތަރައްގީއަށް އެންމެ ބޭނުންވާ ކަންކަމާއި އަތޮޅުގެ ވަކިވަކި ރަށްރަށަށް ބޭނުންވާ ކަންކަން ފާހަގަކުރައްވާފައެވެ. އެގޮތުން ހިރިމަރަދޫ ރައްޔިތުން އެހެން ރަށަކަށް ބަދަލުކުރުމުގެ މަސައްކަތް އަވަސްކޮށް ދިނުމަށް އެދިފައިވެ އެވެ.
ހިރިމަރަދޫ މީހުން އެއަތޮޅު ހަނިމާދޫއަށް ބަދަލުކުރުމަށް ސަރުކާރުން އޮތީ ނިންމާފަ އެވެ. ހިރިމަރަދޫ ކައުންސިލުން ސަރުކާރުގައި އެދިފައިވަނީ ކ. ތުލުސްދޫއަށް ބަދަލުވުމަށެވެ. ނަމަވެސް ސަރުކާރުން މިހާރު ނިންމާފައިވަނީ އެރަށުގެ މީހުން ހަނިމާދޫއަށް ބަދަލުކުރުމަށެވެ. މިދިޔަ އޮކްޓޯބަރުމަހުގެ ތެރޭގައިވެސް ހިރިމަރަދޫ ކައުންސިލުން ވަނީ އެރަށުގެ މީހުން ތުލުސްދޫއަށް ބަދަލުކޮށްދިނުމަށް އެދިފައެވެ. އަދި ތުލުސްދޫ ކައުންސިލުން ވަނީ އެކަމަށް މަރުހަބާ ކިޔާކަން ހާމަކޮށްފައެވެ. ހިރިމަރަދޫގެ އާބާދީއަކީ ގާތްގަނޑަކަށް 590 އެވެ. ނަމަވެސް އެރަށުގައި ދިރިއުޅެމުންދަނީ އާބާދީގެ ނިސްބަތުން މަދުބައެކެވެ. އެއީ ގާތްގަނޑަކަށް 293 މީހުންނެވެ. ހިރިމަރަދޫއަކީ ލަފާފުރުމަށްވެސް ދަތި ރަށެކެވެ. ސަބަބަކަށްވަނީ ރަށުގެ ނެރު ތިލަވުމެވެ.
މީގެއިތުރުން އިގްތިސާދީގޮތުން މަންފާ ހޯދުމަށް ބޭނުންކުރުމަށް ހދ. ފަރިދޫ ދޫކޮށް ދިނުމަާާއި އަތޮޅުގައި ފަށާފައިހުރި މަޝްރޫއުތައް އަވަހަށް ނިންމައި ދިނުމަށް ވެސް ކައުންސިލުން އެދިފައިވެއ ެވެ.
އަދި އެ އަތޮޅުގައި ރައްޔިތުންނަށް ފަސޭހަވާނޭ ގޮތަށް ފަތުރުވެރިކަން ތަރައްގީ ކުރުމަށް ބޭނުންވާކަމާއި، އަތޮޅުގައި ވީހާވެސް އަވަހަކަށް ހައުސިން ޔުނިޓް ހަދާ ކުޅުދުއްފުށީ އެއާޕޯޓަށް ބާއްވާ އުދުހުންތައް މަދުވުމުން ދިމާވާ ދަތިތައް މެންބަރުން ފާހަގަ ކޮށްފައިވެ އެވެ.
މި ބައްދަލުވުމުގައި ވާހަކަފުޅުދައްކަވަމުން ރައީސުލްޖުމްހޫރިއްޔާގެ ނައިބު ވަނީ، ކައުންސިލުން ހުށަހެޅުއްވި ހުރިހާ ކަމަކަށްވެސް ސަމާލުކަން ދެއްވާނެކަމުގެ ޔަގީންކަން ދެއްވާފައެވެ. އަދި ކައުންސިލް މެންބަރުން ފާހަގަކުރެއްވި ކަންކަމަށް އަވަސް ޙައްލެއް ހޯއްދަވައިދެއްވުމަށްޓަކައި، ކަމާގުޅުންހުރި އިދާރާތަކާ މަޝްވަރާ ކުރައްވައިގެން ކުރިއަށް ގެންދަވާނޭ ކަމަށް އެމަނިކުފާނު ވިދާޅުވި އެވެ.
Advertisement
This content is created and paid for by advertisers and does not involve Voice Journalists
