ގެދޮރުވެރިޔާ ސްކީމުގެ ދަށުން ހުޅުމާލޭގައި އިމާރާތް ކުރަމުންދާ ފްލެޓްތަކުގެ މަސައްކަތް ނިމެމުންދާ ވަރަކަށް އެ ތަންތަން ހަވާލު ކުރަމުންދާނެ ކަމަށާ ޖުލައި މަސްތެރޭ ބައެއް ފްލެޓްތަކަށް ވަދެވޭނެ ކަމަށް މިނިސްޓަރު މުއްތަލިބު މިއަދު ވިދާޅުވެއްޖެ އެވެ.

ފްލެޓްތަކުގެ މަސައްކަތް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިއަދު ބައްލަވާލެއްވުމަށް ފަހު ނޫސްވެރީންނަށް މައުލޫމާތު ދެއްވަމުން މިނިސްޓަރު ވިދާޅުވީ ރައީސްގެ އަމާޒަކީ ވީހާވެސް އަވަހަށް ފްލެޓްތަކަށް މީހުން ވެއްދުން ކަމަށެވެ.

އެގޮތުން އެމަނިކުފާނު ވެރިކަމަށް ވަޑައިގެން އެ މަސައްކަތް ވަރަށް ހަލުވި ކުރެއްވިކަން ފާހަގަ ކުރެއްވި އެވެ. އެކަމުގެ ނަތީޖާއެއްގެ ގޮތުންް މިހާރުވެސް ބައެއް ޓަވަރުތަކުގެ މަސައްކަތް މުޅީން ނިމި ފެނާއި ކަރަންޓާއި ނަރުދަމާ އެޅުމުގެ މަސައްކަތް ފަށާފައިވާ ކަމަށް ވިދާޅުވި އެވެ.

ގެދޮރުވެރިޔާ ފްލެޓްތަކުގެ މަސައްކަތް ރައީސް ބައްލަވާލެއްވުން -- ފޮޓޯ: ރައީސް އޮފީސް

މިނިސްޓަރު ވިދާޅުވީ ސަރުކާރުގެ ސިޔާސަތަކީ ފްލެޓްތަކުގެ މަސައްކަތް ނިމޭ ވަރަކަށް އެތަަންތަން ހަވާލު ކުރުން ކަމަށެވެ. އެހެން ކަމުން ޖުލައި މަސްތެރޭ އެގްރީމަންޓް ކުރެވި ބައެއް ފްލެޓްތައް ހަވާލު ކުރެވޭނެ ކަމަށް ވިދާޅުވި އެވެ.

މިހާތަނަށް އެއްވެސް ފްލެޓެއްގެ މަސައްކަތް އެއްކޮށް ނިންމާލެވިފައި ނުވާ ކަމަށާ މިހާރު ކުރިއަށްދާ ގޮތަށް މަސައްކަތް ކުރިއަށް ގެންގޮސް އަމާޒަކީ ސެޕްޓެންބަރު މަހުގެ ނިޔަލަށް 4000 ފްލެޓް ހަވާލުކޮށް ނިންމުން ކަމަށް ވިދާޅުވި އެވެ.

ރައީސް ސޯލިހްގެ ސަރުކާރުގައި އިމާރާތް ކުރަން ފެށި ފްލެޓްތައް ދޭނެ 4,000 މީހަކު އޮތީ ކަނޑައަޅާފަ އެވެ. ނަމަވެސް އެ ލިސްޓްގެ ސައްހަ ކަމާމެދު ސުވާލު އުފަައްދާ އާ ލިސްޓެއް އެކުލަވާލަން މި ސަރުކާރުން ނިންމި އެވެ.

ގެދޮރުވެރިޔާ ފްލެޓްތަކުގެ މަސައްކަތް ރައީސް ބައްލަވާލެއްވުން -- ފޮޓޯ: ރައީސް އޮފީސް

އެ ނިންމުމާ އެކު އެތައް ބަޔަކު ލިސްޓުން އުނިވި އެވެ. ފްލެޓް ލިސްޓުން ގިނަ ބަޔަކު އުނިވީ މާލޭގައި 15 އަހަރު އުޅުކަން ސާބިތުކޮށް ނުދެވިގެންނެވެ.

އެކަމާ މައްސަލަ ބޮޑުވެފައި ވަނިކޮށް ފަހުން ސަރުކާރުން ނިންމީ ކުރީގެ ލިސްޓަށް ފްލެޓް ދޭށެވެ. އަދި ލިސްޓުން އުނިކުރާނީ ޝަރުތު ހަމަނުވާ މީހުން ކަމަށް ކަނޑައެޅި އެވެ.

އެންމެ ފަހުން އޮތް ނޫސްވެރީންގެ ބައްދަލްވުމުގައި މިނިސްޓަރު މުއްތަލިބު ވިދާޅުވީ ލިސްޓްގައި ހިމެނޭ މީހުންގެ ތެރޭގައި ދެމަފިރީން ވެސް ހިމެނިފައި އެބަހުރި ކަމަށެވެ. އަދި މިހާރުވެސް ފްލެޓާއި ގޯތި އޮތް އެތައް ބަޔަކު ވެސް ހިމެނޭ ކަމަށެވެ. މީގެ އިތުރުން ކުރީ ސަރުކާރުް ބިންވެރިޔާ ސްކީމުން ގޯތި ލިބުނު މީހުން ވެސް ހިމެނޭ ކަމަށެވެ.