އީރާނަށް އިސްރާއީލުން ދިން ހަމަލާތަކަށް އެމީހުން ދީފައިވާ ނަމަކީ އޮޕަރޭޝަން "ރައިޒިންގ ލަޔަން" (Rising Lion) އެވެ.

ތާރީޚް ދިރާސާކުރާ މީހުން ބުނާ ގޮތުން މިއީ ހަމައެކަނި ކޯޑު ނަމެއް ނޫނެވެ. އެހެނެއް ކަމަކު، އެއީ އިސްރާއިލުން އީރާނަށް ވަރުގަދަ އިންޒާރުގެ މެސެޖެކެވެ. 

އެކަން އީރާނަށް ދިން ހަމަލާތަކަށްފަހު އިސްރާއީލުގެ ބޮޑުވަޒީރު ބެންޖަމިން ނެތަންޔާހޫ ދައްކާފައިވާ ވާހަކަތަކުންވެސް ހާމަވާކަން ރޮއިޓާސް ގައި ފާހަގަކޮށްފައިވެއެވެ.

"މިއީ އިސްރާއީލުގެ ތާރީޚުގެ ވަރަށް މުހިންމު ނިންމުންތަކެއް ނިންމަން ޖެހިފައިވާ ވަގުތެއް. އިސްރާއީލުން 'ރައިޒިންގ ލަޔަން' އޮޕަރޭޝަން ފަށާފައި މިވަނީ އީރާނުން އިސްރާއީލަށް ކުރިމަތިކުރުވާ ނުރައްކާ ނައްތާލުމަށް. މި ނުރައްކާ ނައްތާލެވެންދެން، ދުވަސްތަކެއް ވަންދެން މި އޮޕަރޭޝަން ކުރިއަށްދާނެ،" ނަތަންޔާހޫ ބުނެފައިވެއެވެ.

ރޮއިޓާސްއިން ރިޕޯޓްކޮށްފައިވާ ގޮތުގައި، އިސްރާއިލްގެ ހަމަލާތައް ފެށުމުގެ އެއްދުވަސްކުރިން ނެތަންޔާހޫވަނީ ޖެރޫސަލަމްގެ ވެސްޓަރން ވޯލްގައި ނޯޓުކޮޅެއް ހަރުކޮށްފައެވެ. ވެސްޓަރން ވޯލްއަކީ ޔަހޫދީންގެ އެންމެ މުގައްދަސް ތަން ކަމަށް ބަލައިގެން އަޅުކަންކުރާ ތަނެވެ.

ޖެހިގެން އައި ދުވަހު އިސްރާއިލުން އީރާނަށް ހަމަލާަދީފައިވާއިރު، އެ ދުވަހު ނަތަންޔާހޫގެ އޮފީހުން ވަނީ އެ ނޯޓުގެ ފޮޓޯއެއް އާއްމުކޮށްފަ އެވެ. އެ ނޯޓުގައި ލިޔެފައިވަނީ "ސިންގާއެއް އެއްފަދައިން އަހަރެމެން ތެދުވާނެ" ކަމަށެވެ.

ރޮއިޓާސްއިން ރިޕޯޓުކޮށްފައިވާ ގޮތުގައި، އިސްރާއީލުން އީރާނާ ދެކޮޅަށް ހިންގި މި އަސްކަރީ އޮޕަރޭޝަނަށް "ރައިޒިންގ ލަޔަން" އޮޕަރޭޝަންގެ ނަން ދީފައިވަނީ ނަޞާރާއިންގެ މުޤައްދަސް ފޮތް، ބައިބަލްގެ އާޔަތަކުން ނަގައިގެންނެވެ. އެބުނާ އާޔަތުގައި ޔަހޫދީންނަށް ނަސްރު ލިބުނުކަމަށް ބުނެފައިވެއެވެ. އަދި މިއީ އެމީހުންގެ ބާރުގަދަކަން އެންގުމަށް ކިޔާފައިވާ ނަމެއް ކަމަށްވެސް ބައެއް ރިޕޯޓް ތަކުގައިވެއެވެ.

މީގެ އިތުރުން، މި ނަމާއި ގުޅޭ އެހެން ތާރީޚެއް އޮތް ކަމަވެސް ބައެއް ރިޕޯޓްތަކުގައި ވެއެވެ. އެގޮތުން، 1978 ގައި އިރާނުގައި އިސްލާމިކް ރިވޮލިޔުޝަން ފެށިގެން އައުމުގެ ކުރިން އެ ގައުމުގެ ދިދައިގެ މެދުގައި ސިންގާއެއްގެ ސިމްބަލް އިންނައިރު، އެ ސިންގާގެ ފަހަތުން އިރުއަރަމުންދާ މަންޒަރުވެސް ހިމަނާފައިވެއެވެ. އޭރު އީރާނާއި އިސްރާއިލާ ދެމެދު ވަރަށް ގާތް ގުޅުމެއް އޮތް ކަމަށް ތާރީޚުން އެނގޭ އިރު، އިސްލާމިކް ރިވޮލިޔުޝަނަށްފަހު، އެ ގުޅުން އެއްކޮށްހެން ނިމިގެން ދިޔަ ކަމަށް ރިޕޯޓްތައް ބުނެއެވެ.

އަދި އީރާނުގެ ދިދައިން ސިންގާއާއި އިރު ނަގައި، އޭގެ ބަދަލުގައި الله ގެ އިސްމުފުޅާއި އިސްލާމްކަމުގެ ފަސް ރުކުން ރަމްޒު ކޮށްދޭ ސިމްބަލްއެއް ވަނީ ހިމަނާފައެވެ. 

އެހެންކަމުން އިސްރާއިލުން މިހާރު ބޭނުންވަނީ އިސްލާމިކް ރިވޮލިޔުޝަންގެ ކުރިން އެމީހުންނާ އީރާނާ ދެމެދު އޮތް ގުޅުން އިއާދަކޮށް، އީރާނުގެ މައްޗަށް ޔަހޫދީންގެ ބާރު ގަދަ ކުރަން ކަމަށް ރިޕޯޓްތައް ބުނެއެވެ. އަދި ރައިޒިން ލަޔަންގެ ނަމުން އޮޕަރޭޝަނަށް ނަން ދެވުނީ އެ ސަބަބަށް ކަމަށްވެސް އެފަރާތްތަކުން ބުނެއެވެ.