މޯލްޑިވްސް މީޑިއާ ކައުންސިލްގެ ހުސްވެފައިވާ 3 މެމްބަރުންގެ މަގާމަށް މިއަދު މެމްބަރުން އިންތިހާބުކޮށްފިއެވެ.
މީޑިއާ ކައުންސިލްގެ މެމްބަރުން ހޮވުމަށް އިންތިހާބު ކުރިއަށްގެންގޮސްފައިވަނީ މިއަދު ހެނދުނު ޒުވާނުންގެ މަރުކަޒުގައެވެ. އިންތިހާބު ކާމިޔާބުކޮށްފައިވަނީ، އަދަދު ނޫހުން ވާދަކުރި ލީވާން އަލީ ނަސީރު، ދައުރު ނޫހުން ވާދަކުރި މުހައްމަދު މުޒައްޔިން އަދި އާންމު މެމްބަރުގެ މަގާމަށް ވާދަކުރި ލ.ގަން ތުނޑި ލިންކު ހައްވާ ވަޖުދާއެވެ.
އިންތިހާބުގައި މުޒައްޔިނަށް 50 ވޯޓު ލިބުނުއިރު، ލީވާންއަށް 48 ވޯޓު ލިބުނެވެ. އިންތިހާބުގައި އާންމު މެމްބަރެއްގެ ގޮތުގައި ވާދަކުރި ވަޖުދާއަށް ލިބުނީ 38 ވޯޓެވެ. މިއަދު ބޭއްވި އިންތިހާބުގައި 53 މީޑިއާއަކުން ވަނީ ވޯޓުލާފައެވެ. އިންތިހާބުގައި މީޑިއާއިން 3 މެމްބަރުން ކުރިމަތިލިއެވެ. އަދި އާންމު މެމްބަރުންގެ ގޮތުގައި 6 މީހަކު ވަނީ ކުރިމަތިލާފައެވެ.
މީޑިއާ ކައުންސިލް އެކުލެވިގެންވަނީ މީޑިއާތަކުން އިންތިހާބުކުރާ 8 މެމްބަރުންނާއި އާންމުންގެ ފަރާތުން އިންތިހާބުކުރާ 7 މެމްބަރުންނާއެކު ޖުމްލަ 15 މެމްބަރުންގެ މައްޗަށެވެ.
Advertisement
This content is created and paid for by advertisers and does not involve Voice Journalists
