ޕަބްލިކް ސާވިސް މީޑިއާ (ޕީއެސްއެމް) ގެ ދަރަނި 2021 ވަނަ އަހަރު ނިމުނުއިރު، 187.1 މިލިއަން ރުފިޔާއަށް އަރާކަމަށް އޮޑިޓަރ ޖެނެރަލްގެ ރިޕޯޓުން ހާމަވެއްޖެއެވެ.
އޮޑިޓް އޮފީހުން ނެރެފައިވާ ޕަބްލިކް ސާވިސް މީޑިއާގެ 2021 ވަނަ އަހަރުގެ މާލީ އޮޑިޓް ރިޕޯޓްގައިވާގޮތުން 2021 ވަނަ އަހަރު ޕީއެސްއެމަށް އާމްދަނީގެ ގޮތުގައި އެއަހަރު ވަނީ 8.2 މިލިއަން ރުފިޔާގެ ގެއްލުމެއް ލިބިފައެވެ. އޭގެ ކުރީ އަހަރު ޕީއެސްއެމަށް ވަނީ 17.6 މިލިއަން ރުފިޔާގެ ގެއްލުމެއް ލިބިފައެވެ.
ޕީއެސްއެމަށް 2021 ވަނަ އަހަރު އާމްދަނީގެ ގޮތުގައި 18.7 މިލިއަން ރުފިޔާ ލިބިފައިވާއިރު، އެއަހަރު މުދާ ވިއްކުމަށް ކުރި ހޭދަ އުޅެނީ 66.1 މިލިއަން ރުފިޔާގައެވެ. އެއަހަރު ޕީއެސްއެމް ހިންގައިގެން ލިބުނު ގެއްލުން އުޅެނީ 108.6 މިލިއަން ރުފިޔާގައެވެ.
2021 ވަނަ އަހަރު ޕީއެސްއެމް މާލީބަޔާނުގެ އުސްއަލިތައް
- ޕީއެސްއެމަށް ލިބެންޖެހޭ ފައިސާގެ އަދަދު: 11.1 މިލިއަން ރުފިޔާ
- ޕީއެސްއެމުން އެހެން ފަރާތްތަކަށް ދޭންޖެހޭ އަދަދު: 107.2 މިލިއަން ރުފިޔާ
- ޕީއެސްއެމުން ފިނޭންސަށް ދޭންޖެހޭ އަދަދު: 80 މިލިއަން ރުފިޔާ
2021 ވަނަ އަހަރު ޕީއެސްއެމްގެ ބައެއް ހަރަދުތައް:
- ކަރަންޓްބިލް: 23.9 މިލިއަން ރުފިޔާ
- ނެޓް/ފޯނު ބިލް: 5.5 މިލިއަން ރުފިޔާ
- އާބާތުރަ ފިލުވުމަށް: 2.5 މިލިއަން ރުފިޔާ
- މުއައްޒަފުންގެ މުސާރަ: 37.6 މިލިއަން ރުފިޔާ
- މުއައްޒަފުންގެ އިނާޔަތްތައް: 36.4 މިލިއަން ރުފިޔާ
އޮޑިޓަރ ޖެނެރަލް ނެރުއްވާފައިވާ ޕީއެސްއެމްގެ މާލީ އޮޑިޓް ރިޕޯޓަށް ބަލާއިރު، ޕީއެސްއެމުން ބޭރުގެ ކުންފުނިތަކަށް ދައްކަންޖެހޭ ފައިސާ ނުދައްކާ މައްސަލާގައި ބައެއް ކުންފުނިތަކުން ވަނީ މައްސަލަ ކޯޓަށް ހުށަހަޅާފައެވެ. ޕީއެސްއެމާ ދެކޮޅަށް ކޯޓަށް ހުށަހަޅާފައިވާ މައްސަލަތަކަށް ބަލާއިރު، ކުންފުނިތަކުން ހޯދުމަށް ދައުވާކޮށްފައިވާ ޖުމްލަ އަދަދު 38 މިލިއަން ރުފިޔާއަށް އަރައެވެ.
- ޝަންގްހައި އެވްރޮން ކުންފުނިން: 718،900 ޑޮލަރު
- ވިސްޑޮމް ޓެލެވިޝަން: 39،750 ޔޫރޯ
- އީޕީ ވަން ސަޕްލައި: 1.6 މިލިއަން ރުފިޔާ
- މީޑިއާނެޓް: 9.3 މިލިއަން ރުފިޔާ
- އާޓިސަން: 4.4 މިލިއަން ރުފިޔާ
- މިވަސް: 1.4 މިލިއަން ރުފިޔާ
އޮޑިޓް ރިޕޯޓްގައިވާ ގޮތުން ޕީއެސްއެމުން ކޯޓަށް ވައްދާފައިހުރި މައްސަލަތަކުން އެކުންފުންޏަށް 3.5 މިލިއަން ރުފިޔާ ލިބެންޖެހެއެވެ.
ދައުލަތުގެ ކުންފުނިތަކުގެ ތެރެއިން ޕީއެސްއެމް ފާހަގަކުރެވެނީ ދަރަނީގެ މައްސަލަ ބޮޑު ކުންފުންޏެއްގެ ގޮތުގައެވެ. ޕީއެސްއެމްގެ ތެރެއިން މިދިޔަ އަހަރުގެ ތެރޭގައި 4 މިލިއަން ރުފިޔާގެ ހިޔާނާތުގެ މައްސަލައެއް ވަނީ ފެންމަތިވެފައެވެ. އެއީ ޑޮލަރު ގަތުމުގެ ނަމުގައި އެކުންފުނީގެ ފައިނޭންސް ޑިޕާޓްމަންޓުގެ ތެރޭގައި ހިނގި މުއާމަލާތެއްކަމަށް އެކުންފުނިން މިދިޔަ އަހަރު ވަނީ ބުނެފައެވެ. އޮޑިޓް ރިޕޯޓަށް ބަލާއިރު އަދި މިހާތަނަށް ގެއްލުނު ފައިސާ ލިބިފައި ނުވާކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
