ހުރްމުޒް ކަނޑުއޮޅި ބަންދުކުރަން އީރާނުން ތައްޔާރުވަމުންދާ މައްސަލާގައި އެމެރިކާއިން އެޤައުމަށް ވަރުގަދަ އިންޒާރެއް ދީފިއެވެ.
އެމެރިކާއިން އީރާނުގެ ސިޔާދަތީ ބާރުހިނގާ ސަރަހައްދުތަކަށް ވަދެގަނެ، ވައިގެ މަގުން ދިން ހަމަލާތައް އީރާނުން ވަނީ ވަރަށް ސީރިއަސްކޮށް ނަގާފައެވެ. މި މައްސަލާގައި އީރާނުން ބުނެފައިވަނީ އެޤައުމާ ދެކޮޅަށް ހަމަލާދޭނަމަ ކުރެވެން ހުރި ހުރިހާ ކަމެއް ކުރާނޭކަމަށެވެ. އެގޮތުން ހުރްމުޒް ކަނޑުއޮޅި ބަންދުކުރަން ޖެހިއްޖެނަމަ އެކަންވެސް ކުރާނޭކަމަށް އީރާނުން ވަނީ ބުނެފައެވެ.
އީރާނުގެ ބައެއް މީޑިއާތަކުން ވަނީ އެޤައުމުގެ ޤާނޫނު ހަދާ މަޖިލީހުން ހުރްމުޒް ކަނޑުއޮޅި ބަންދުކުރުމަށް ރުހުންދީފައެވެ. ނަމަވެސް މިކަމަށް ގޮތެއް ނިންމަވާނީ ސްޕްރީމް ކައުންސިލުންނެވެ. އީރާނުން ހުރްމުޒް ކަނޑުއޮޅި ބަންދުކުރާނޭކަމުގެ ވާހަކަ ފެތުރުމާ ގުޅިގެން އެމެރިކާގެ އެކެރެޓަރީ އޮފް ސްޓޭޓް މާކޯ ރުބިއޯ ފޮކްސް ނިއުސްއާ ވާހަކަދައްކަވަމުން ވިދާޅުވެފައިވަނީ ހުރްމުޒް ބަންދުކޮށްފިނަމަ އެހެދެނީ ވަރަށްބޮޑު ގޯހެއްކަމަށެވެ. އެކަން ހުއްޓުވުމަށް އެމެރިކާއިން ކުރަންހުރި ކަންކަން ކުރާނޭކަމަށް އޭނާ ވަނީ ފާހަގަކޮށްފައެވެ.
ހުރްމުޒް ކަނޑުއޮޅި ބަންދުކުރުމަކީ އެމެރިކާއިން އަބަދުވެސް ވަރަށް ސީރިއަސްކޮށް ނަގާ ކަމެކެވެ. މީގެކުރިން އީރާން އާއި އެމެރިކާގެ ގުޅުން ގޯސްވާ ކޮންމެފަހަރަކު، އީރާނުން އެ ކަނޑުއޮޅި ބަންދުކުރާނޭކަމުގެ އިންޒާރު ދެއެވެ.
ދުނިޔޭގެ ބާޒާރަށް ބޭރުކުރާ ތެލުގެ 40 އިންސައްތަ ބޭރުކުރަނީ ހުރްމުޒް ކަނޑުއޮޅިންނެވެ. އެ ކަނޑުއޮޅި ބަންދުކޮށްފިނަމަ، ގަލްފްގެ ގައުމުތަކުން ތެއޮ ބޭރުކުރުމަށް ގިނަ ވަގުތުތަކެއްނަގައި އެކަމަށް ކުރަންޖެހޭ ހޭދަ ވަރަށް ބޮޑުވެގެންދެއެވެ. އެހެންކަމުން ހުރްމޮޒް ކަނޑުއޮޅި ބަންދުކޮށްފިނަމަ ދުނިޔޭގެ ބާޒާރުގައި ތެލުގެ އަގު އިންތިހާއަށް މައްޗަށްގޮސް ގައުމުތަކުގެ އިގްތިސާދު އިނދަޖެހުމުގެ ބިރު އެބައޮތްކަމަށް އިގްތިސާދީ މާހިރުން ފާހަގަކުރެއެވެ.
Advertisement
This content is created and paid for by advertisers and does not involve Voice Journalists
