އެމެރިކާގެ ރައީސް ޑޮނަލްޑް ޓްރަމްޕް ހޯމަ ދުވަހުގެ ރޭ އިރާނާއި އިސްރާއީލްއާ ދެމެދު ހަނގުރާމަ ހުއްޓާލުމަށް އެއްބަސްވެވިއްޖެ ކަމަށް އިއުލާންކުރެއްވި ނަމަވެސް، ދެ ފަރާތުގެ ހަމަލާތައް ކުރިއަށް ގެންގޮސްފައިވާ ކަމަށް ބޭރުގެ މީޑިއާތަކުން ރިޕޯޓްކޮށްފިއެވެ.

އެގޮތުން ރޭގެ ވަގުތެއްގައި އިރާނުން ގިނަ އަދަދެއްގެ މިސައިލްތައް އިސްރާއީލަށް ފޮނުވާލައި ހަމަލާ ދީފައިވާ ކަމަށް އިސްރާއީލުން ބުނެފައިވާއިރު، މި ހަމަލާތަކުގެ ތެރެއިން އެއް މިސައިލް، ދެކުނު ސަރަހައްދެއްގައި ހުރި އާއްމުން ދިރިއުޅޭ އިމާރާތަކަށް އަމާޒުވެ، ތިން މީހުން މަރުވެފައިވާ ކަމަށް އިސްރާއީލުން ބުނެއެވެ.

މީގެ އިތުރުން، އީރާނުގެ ވެރިރަށް ތެހެރާނަށް އިސްރާއީލުން ރޭގެ ވަގުތު ހަމަލާދީފައިވާ ކަމަށް އީރާނުގެ ސަރުކާރު މީޑިއާއިން ރިޕޯޓްކޮށްފައިވެއެވެ.

ނަމަވެސް މި ހަމަލާތައް ދީފައިވަނީ ހަނގުރާމަ ހުއްޓާލަން އެއްބަސްވި ވަގުތުގެ ކުރިން ކަމަށް އީރާނާއި އިސްރާއިލުގެ މީޑިއާތަކުން ބުނެއެވެ.

ޓްރަމްޕް ބުނެފައިވާ ގޮތުން ހަނގުރާމަ ހުއްޓާލަން ދެ ފަރާތުން އެއްބަސްވީ ޖީއެމްޓީ ގަޑިން ރޭ 3:00 އިން ފެށިގެންނެވެ. 

ޖޫން 13 ވަނަ ދުވަހު އިސްރާއިލުން އީރާންގެ އަސްކަރީ އަދި ނިއުކްލިއާ މަރުކަޒުތަކަށް ވަރުގަދަ ހަމަލާތަކެއް ދޭން ފަށާފައިވާއިރު، އެމެރިކާއިން ހަނގުރާމައިގެ ތެރެއަށް ވަދެ އީރާނަށް ވަނީ ބޮން އަޅާފައެވެ. އެއާއެކު އީރާނުން ރޭ ވަނީ ގަތަރުގައި ހުންނަ އެމެރިކާގެ އަސްކަރީ މަރުކަޒަކަށް ހަމަލާ ދީފަ އެވެ.