ބ. އަތޮޅު އަނގަފަރު ފަޅު ކައިރިން ޑިންގީއަކާއި ލޯންޗެއް ޖެހި އެކްސިޑެންޓުގައި ގެއްލުނު އޭދަފުށި، މުސްތަރީގެ، ނަސްރުﷲ އަބްދުﷲ ގެ މައްޗަށް މާދަމާ ޣައިބަށް ކަށުނަމާދު ކުރުމަށް ނިންމައިފި އެވެ.

ލޯންޗާއި ޑިންގީ ޖެހި ނުރައްކާތެރި މި އެކްސިޑެންޓް ހިންގީ މީގެ ފަސް އަހަރު ކުރީން 2020 ވަނަ އަހަރުގެ ޖަނަވަރީ މަހުގެ ފުރަތަމަ ހަފްތާގަ އެވެ. 

އޭދަފުށީ ކައުންސިލުން މިއަދު ބުނީ ނަސްރުﷲ ގެ މަރު ސާބިތުކުރުމަށް އާއިލާގެ ފަރާތުން ކޯޓަށް ހުށައެޅުމުން މިދިޔަ އޭޕްރީލް މަހު ކޯޓުން އޭނާގެ މަރު ސާބިތުކޮށް ނިންމާފައިވާ ކަަމަށެވެ. އަދި އެކަމާއި ގުޅިގެން އިސްލާމިކް މިނިސްޓްރީއާ ވާހަކަ ދައްކާ މާދަމާ ހުކުރު ނަމާދަށް ފަހު  ނަސްރުﷲ އަބްދުﷲ ގެ މައްޗަށް ޣައިބަށް ކަށުނަމާދު ކުރުމަށް ނިންމާފައިވާ ކަމަށެވެ.

ކަނޑުމަތީގެ ނުރައްކާތެރި މި އެކްސިޑެންޓް ހިނގިއިރު ޑިންގީގައި ތިބީ ނަސްރުﷲގެ އަންހެނުންގެ ދެ ބޭބެ ކަމުގައިވާ މުހައްމަދު ނަޒީފާއި އަބްދުއް ސަމީއު އެވެ. އެ ދެ މީހުނަށް ވެސް އެކި ވަރުގެ އަނިޔާތައް ލިބިފަ އެވެ. ނަސްރުﷲ ހޯދުމަށް ސިފައިން ބޮޑު އޮޕަރޭޝަނެއް ހިންގި އެވެ. އެ ޑިންގީ ހޯދި އެވެ. ނަމަވެސް ނަސްރުﷲގެ ހަބަރެއް ނުވެ އެވެ.

މި ހާދިސާގައި އެންމެ ބޮޑު އަނިޔާއެއް ލިބިފައި ވަނީ ލޯންޗު ދުއްވަން އިން ކައްޕި، އޭދަފުށި ޝަބްނަމްގެ މުހައްމަދު މުސްތަފާ އެވެ. އަދި ލޯންޗުގައި ހުރި ބަންގްލަދޭޝްގެ މީހަކަށް ވެސް އަނިޔާވި އެވެ.

ލ. މާވަށު އަހިމާގެ, އުމުރުން 25 އަހަރުގެ އަލީ މުޝްފިޤް މުހައްމަދު ޝަރީފު ގެއްލުނު ހާދިސާއާ ގުޅިގެން އޭނާގެ މައްޗަށް ކަށުނަމާދު ކުރަން ނިންމުމުން އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވަނީ ގެއްލޭ މީހުންގެ މައްޗަށް ކަށުނަމާދު ކުރުމުގައި އަމަލު ކުރާނެ ގޮތް ވިދާޅުުވެ ދެއްވާފަ އެވެ.

މިނިސްޓަރު ވިދާޅުވި ގޮތުގައި މިފަދަ ހާލަތުގައި އެމީހާ ގެއްލުމާއި މަރާމެދު އޮތް މައްސަލަ ހުށަހަޅަންވާނީ ގާޒީ އަށެވެ. އަދި ކަން ހިނގައި ދިޔަ ގޮތް ބަލައި އޭނާ މަރުވެއްޖެ ކަމަށް ގާޒީ ކަނޑައަޅައިފި ނަމަ، އެހާރުން އޭނާގެ މައްޗަށް ކަށު ނަމާދު ކުރުމަކީ ހުއްދަ ކަމެއް ކަމެވެ.

"މިކަމުގައި ގާޒީގެ ހުކުމެއް އޮންނަންޖެހޭ ސަބަބަކީ މަރަކީ އޭގެ މައްޗަށް ޝަރުއީ ވަރަށް ގިނަ ކަންކަން ތަރުތީބުވާ ކަމަކަށް ވުމެވެ. މިސާލަކަށް ގެއްލިފައިވާ މީހަކު ނަމަ އެމީހާއަކީ މީހަކާ އިނދެގެން އުޅޭ މީހަކު ކަމުގައި ވެސް ވެދާނެއެވެ. ނުވަތަ ދަރީން ތިބި މީހަކު ކަމުގައި ވެސް ވެދާނެއެވެ. ނުވަތަ މައިންބަފައިންނާއި އެއްބަނޑު މީހުން ތިބި މީހެއްކަމުގައި ވެދާނެއެވެ. އެމީހުންނަކީ އޭނާގެ ވާރުތަ ވެރިންނެވެ. އޭނާއަކީ އެމީހުންގެ ވާރުތަ ވެރިއެކެވެ. މަރުވެއްޖެ ކަމަށް ކަނޑައެޅިއްޖެ ނަމަ މިހުރިހައި ކަމެއްގެ ޙުކުންތަކަށް ޝަރުޢީ ގޮތުން އަސަރުކުރާނެ އެވެ. ވަރަށް ބޮޑެތި ބަދަލުތައް އަންނާނެއެވެ," މިނިސްޓަރު ވިދާޅުވި އެވެ.

އަދި ވިދާޅުވި އެވެ.

"އޭނާގެ އަނތްބަކު ވާނަމަ، އެކަނބުލޭގެ ޢިއްދަ ހަމަކޮށް އެހެން މީހަކާ އިނުން ހުއްދަވީއެވެ. ގެއްލުނުމީހާ ވުޖޫދުގައި ނެތް މީހަކަށްވީއެވެ. ގާޒީގެ މި ހުކުމަށް ފަހު، ދުވަސްތަކެއް ފަހުން އޭނާ އެނބުރި އަތުވެއްޖެ ނަމަ އެ ދެމެދުގައި އޭނާގެ ކަންކަމާ މެދު ހިނގާފައިވާ ކަންކަން ޞައްޙަވާނެއެވެ. އޭނާގެ އަނބިމީހާ ވެސް އެހެން މީހަކާ އިނދެގެން ހުރެއްޖެ ނަމަ އަނބުރައި އޭނާގެ ގާތަށް ދިއުމެއް ނެތެވެ. ގެއްލުނު މީހަކީ، މީހަކާ އިނދެގެން ނެތް މީހަކު ކަމުގައި ވިޔަސް އޭނާގެ މަރާ މެދު ގޮތް ނިންމަންވާނީ ގާޒީ އެވެ. ވީމާ ކަނޑަށް ވެއްޓި ގެއްލި ހޯދައި ނުފެނިފައިވާ މީހާއާމެދު ގޮތް ނިންމަންވާނީ ގާޒީ އެވެ,"

މިނިސްޓަރު ވިދާޅުވި ގޮތުގައި ގާޒީ ގޮތް ނިންމާނީ ގެއްލުނު ހާލަތުގެ މައްޗަށް ނަޒަރު ހިންގައި ހޯދަން ކުރި މަސައްކަތުގެ މައްޗަށް ބަލައި މުޅި މައްސަލައިގެ ހަފަރާތް ބެލުމަށް ފަހުގައެވެ. އަދި ގެއްލުނު މީހާ މަރުވެފައިވާ ކަމަށް ގާޒީ ކަނޑައަޅައިފި ނަމަ އޭނާގެ މައްޗަށް ކަށު ނަމާދު ކުރެވިދާނެ ކަމަށެވެ.

".. އަދި އޭނާގެ މުދާ ވާރިސުންގެ މެދުގައި ބެހޭނެއެވެ. ބައެއް އިލްމުވެރިން ބަޔާންކުރައްވާފައިވާ ގޮތުގައި ގެއްލިފައިވާ މީހާ މެދު ޙުކުމެއް ކަނޑައަޅަންވާނީ ގެއްލުނުތާ ހަތަރު އަހަރު ފަހުންނެވެ. ނަމަވެސް ކަނޑަށް ވެއްޓި ގެެއްލިފައިވާ މީހާ، މަރުވެފައިވާ ކަމަށް ބޮޑަށް ބުރަވެވޭ ނަމަ ހަތަރު އަހަރު ނުވިޔަސް ގާޒީ އަށް ގޮތެއް ކަނޑައެޅިދާނެ ކަމަށް ދެކެމެވެ," މިނިސްޓަރު ޝަހީމް ވިދާޅުވި އެވެ.