އިމްރާނުގެ ސުވާލެއް އިގްތިސާދީ ވަޒީރު ސައީދަށް
ސަރުކާރުގެ އިގްތިސާދީ އެޖެންޑާއާ ގުޅޭގޮތުން ކުރީގެ ހޯމް މިނިސްޓަރު އިމްރާން ޢަބްދުﷲ ގެ ސުވާލެއް، އިކޮނޮމިކް މިނިސްޓަރު މުހައްމަދު ސައީދުއަށް އަމާޒުކުރައްވައިފިއެވެ.
ބެންކޮކްގައި ދިރިއުޅެމުން އަންނަ އިމްރާން މިފަހަރު ސުވާލު އަމާޒުކުރެއްވީ ޑޮލަރުގެ އަގުބޮޑުވަމުންދާކަމަށް ބުނާ މައްސަލާގައެވެ. އެކްސްގައި ކުރެއްވި ޕޯސްޓެއްގައި އިމްރާން އައްސަވާފައިވަނީ، "ނުހިފޭއްޓޭވަރަށް ޑޮލަރުގެ އަގު މައްޗަށް ގޮސް މުދަލާއި ކާބޯތަކެތީގެ އަގު މައްޗައް މިދަނީ ރައީސް މުއިއްޒުގެ ލަފާފުޅުގެ މަތިން އިކޮނަމިކު މިނިސްޓަރ އަޅުއްވާ ފިޔަވަޅުތަކުގެ ހަރުދަނާކަމުން ތޯ" މިހެންނެވެ. ނުވަތަ ރައީސްގެ ލަފާފުޅަށް މިނިސްޓަރަށް އަމަލު ނުކުރެއްވެނީތޯވެސް އިމްރާނު ވަނީ ސުވާލު އުފައްދަވާފައެވެ.
އިގްތިސާދީ ވަޒީރު މުހައްމަދު ސައީދު އިއްޔެ ވަނީ، ރާއްޖެ އާއި ސްރީލަންކާ އާއި ދެމެދު ކޮމާޝަލް ޑިއުޓީ ފްރީ ޒޯނެއް ގާއިމު ކުރަން އުޅޭކަމަށް ދެކެވެމުންދާ ވާހަކަތަކާ ގުޅޭގޮތުން ވާހަކަދައްކަވާފައެވެ. އެގޮތުން ސަރުކާރުން އެފަދަކަމެއް ކުރަން ނޫޅޭކަމަށް މިނިސްޓަރު ވަނީ ވިދާޅުވެފައެވެ.
ޑޮލަރު ލިބުން ދަތިވުމުގެ މައްސަލައާ ގުޅޭގޮތުން އިމްރާން އިގްތިސާދީވަޒީރަށް ސުވާލުތަކެއް ކުރިމަތި ކުރައްވާފައިވާއިރު، އިމްރާނު މި ފަހަކަށް އައިސް ވަރަަށް ހައްސާސް މައްސަލަތަކާ ބެހޭގޮތުންވެސް އަންނަނީ ވާހަކަފުޅުދައްކަވަމުންނެވެ. އެގޮތުން މިމަހުގެ 14 ވަނަ ދުވަހު އެކްސްގައި ކުރެއްވި ޕޯސްޓެއްގައި އިމްރާން ވަނީ ދީނީ އިލްމުވެރިޔާ ޑރ.އަބްދުލް މަޖީދު އަބްދުލްބާރީ އަވަހާރަވީ ކޮންމެވެސް ބަޔަކު ކުރިކަމެއްގެ ސަބަބުންކަމަށް ވިދާޅުވެފައެވެ. އިމްރާން އެހެން ވިދާޅުވިއިރު، އެމަނިކުފާނު ދާހިލީ ވަޒީރުކަމުގައި ހުންނެވިއިރު، އެ މައްސަލައިގެ ތެރެއަށް ވަންނަވާފައި ނުވާކަމަށް ބައެއް ފަރާތްތަކުން ބުނެއެވެ.
Advertisement
This content is created and paid for by advertisers and does not involve Voice Journalists
