ފައިނު އެކްސިޑެންޓް: 3 މީހަކު އައިސީޔޫގައި
ރ.އަތޮޅު ފައިނުގައި އިއްޔެ ރޭ ހިނގި އެކްސިޑެންޓްގައި އަނިޔާވި 3 މީހަކަށް އައިޖީއެމް ހޮސްޕިޓަލުގެ އައިސީޔޫގައި ފަރުވާދޭން ފަށައިފިއެވެ.
ވޮއިސްއާ މައުލޫމާތު ހިއްސާކުރަމުން އެކްސިޑެންޓްގައި އަނިޔާވި މީހެއްގެ އާއިލާގެ މެމްބަރަކު ބުނީ، އެކްސިޑެންޓާ ގުޅިގެން 3 މީހަކަށް މިވަގުތު ވެންޓިލޭޓަރުގައި ފަރުވާދެމުންދާކަމަށެވެ. މިކަން އައިޖީއެމްއެޗުންވެސް ވަނީ ވޮއިސްއަށް ޔަގީންކޮށްދީފައެވެ.
ފައިނުގައި ހިނގި މި އެކްސިޑެންޓް ހިނގާފައިވަނީ ލައިސަންސް ނެތް ދަރިވަރަކު ދުއްވި ސައިކަލެއް ކަސްރަތަށް ނިކުމެ އުޅުނު ދެ މީހެއްގެ ގައިގައި ޖެހިގެންނެވެ. އެކްސިޑެންޓް ހިނގިއިރު ސައިކަލްގައި އިނީ ސްކޫލް ދެ ދަރިވަރުންނެވެ. ދުއްވާފައި ދިޔަ ސައިކަލް ގޮސް ޖެހުނު އެކަކީ ފައިނު ސްކޫލްގެ ޕްރިންސިޕަލެވެ. އަދި ދެވަނަ މީހަކީ ސްކޫލް ޓީޗަރެކެވެ. ވޮއިސްއާ މައުލޫމާތު ހިއްސާކުރި ފައިނު ރައްޔިތަކު ބުނީ، އެކްސިޑެންޓްވި ސީނަށް ބަލާއިރު ސައިކަލް ދުއްވާފައިހުރީ ވަރަށް ބާރަށްކަމަށެވެ.
އެކްސިޑެންޓްގައި އަނިޔާވި ދަރިވަރަކު ފަރުވާދިނުމަށް އުނގޫފާރަށް ގެންދިއުމަށް ލޯންޗަށް އަރުވަނީ... ފޮޓޯ: ފައިނު އޮންލައިން
މި އެކްސިޑެންޓްގައި އަނިޔާލިބުނު މީހުން އިތުރު ފަރުވާދިނުމަށް މާލެ ގެނެސްފައިވަނީ އިއްޔެއެވެ. އެކްސިޑެންޓް ހިނގުމާއެކު އަނިޔާވި މީހުންނަށް ފަރުވާދީފައިވަނީ އުނގޫފާރު ރީޖަނަލް ހޮސްޕިޓަލުންނެވެ.
މި އެކްސިޑެންޓްގައި ހަތަރު މީހުންނަށްވެސް ވަނީ ފިޒިކަލީގޮތުންވެސް އެކިވަރުގެ އަނިޔާތައް ލިބިފައެވެ. ފުލުހުން ވަނީ އެކްސިޑެންޓްވި ސައިކަލް ޓޯ ކޮށް، މައްސަލަ ބަލަން ފަށާފައެވެ.
Advertisement
This content is created and paid for by advertisers and does not involve Voice Journalists
