މާލެއިން ފުރައިގެން ޅ. އަތޮޅަށް ދަތުރުކުރަނިކޮށް ކާށިދޫ ކަނޑަށް ކޮޅުވެއްޓިއެއް ބަނޑުން ޖަހާލި ހިނގި ހިތާމަވެރި ހާދިސާގައި ސިފައިންގެ އޮފިސަރަކު ވަނީ ނިޔާވެފަ އެވެ. އަދި އިތުރު މީހަކު ވަނީ ގެއްލިފަ އެވެ.

މި ހާދިސާއާ ގުޅިގެން އުފެދިފައިވާ މުހިންމު ބައެއް ސުވާލުތަކަށް އެމްއެންޑީއެފުން މިއަދު ވަނީ ޖަވާބު ދީފަ އެވެ. ނޫސްވެރިޔާ އަލީ ސުލައިމާން ސިފައިންގެ މީޑިއާއާ ކުރި ސުވާލުތަކަށް ޖަވާބު ދެމުން އެ އިދާރާ އިން ބުނީ ސިވެކް ކުންފުނީގެ ކޮޅުވެއްޓި ބަންޑުން ޖަހާލި ހާދިސާއާ ގުޅިގެން އެކަން ހިނގާ ދިޔަ ގޮތް ބެލުމަށް އެތެރޭގެ ތަހުގީގެއް ހިންގަމުން އަންނަ ކަމަށެވެ.

އަދި ކޮޅުވެއްޓިއަށް އެއްވެސް އެއްޗެއް ބަރުކުރެވޭނީ ސީދާ ކެޕްޓަންގެ ބެލުމުގެ ދަށުން ކަމަށާ އުޅަނދު އެއްވެސް ބަނދަރަކުން ފުރާނީ ވެސް ހާލަތަށާއި މޫސުމަށް ބަލައިގެން އުޅަނަދުގެ ކެޕްޓަން ނިންމާ ނިންމުމެއްގެ މައްޗަށް ކަމަށެވެ. އެހެން ކަމުން އުޅަނދަށް ބަރުކުރުމާއި ފުރުމުގައި ކެޕްޓަންގެ މައްޗަށް މަޖުބޫރުން އެއްވެސް ކަމެއް އެއްވެސް ފަރާތަކުން ނުކުރާނެ ކަމަށް އެމްއެންޑީއެފުން ބުނެ އެވެ.

ކޮޅުވެއްޓި ބަންޑުން ޖަހާލާފައި 

ބައެއް މީހުން ބުނާ ގޮތުގައި އެ ދަތުރަށް ފުރަން ކެޕްޓަން އިންކާރުކުރި އެވެ. އަދި އެއީ އެފަދަ ދަތުރެއް ކުރަން އެކަށީގެންވާ އުޅަނދެއް ނޫނެވެ. އެ ދަތުރަށް ފުރީ ކެޕްޓަނަށް މަޖުބޫރުވެގެން ކަމަށާ ސިވެކްގެ އިސްވެރީން ކެޕްޓަނަށް ޕްރެޝަރުކުރި ކަމަށެވެ. ނަމަވެސް ސިފައިން އެކަން ދޮގު ކުރެ އެވެ.

ކޮޅުވެއްޓި ބަންޑުން ޖަހާލީ ކާށިދޫ ކަނޑުގެ ތެރެއިން ޅ އަތޮޅާއި ފަސް ވަރަކަށް މޭލަށް ކައިރިވެފައި ވަނިކޮށް ދިޔަވާން ފަށާ ކުއްލިއަކަށް އަރިއަޅައިލައިގެން ކަމަށް މިހާތަނަށް ބެލި ބެލުމުން އަދި ކެޕްޓަންގެ ފަރާތުން މައުލޫމާތު ލިބިފައިވާ ކަމަށް އެމްއެންޑީއެފުން ބުނެ އެވެ.

މިކަން ހިނގާ ދިޔަގޮތް އިތުރަށް ދަނީ ބަލަމުން ކަމަށް ވެސް ބުންޏެވެ. މިފަދަ ކަންކަން ބަލަނީ އެމްއެންޑީއެފް އިން އެކަމަށްޓަކާ ކަނޑައަޅާފައިވާ ބޯޑުންނެވެ.

ވޮރަންޓް އޮފިސަރު2 ހާމިދު ނިޔާވީ ކޮޅުވެއްޓި ދިޔަވާތީ ދިޔަވާވަރެއް ބެލުމަށް އިތުރު ފަޅުވެރިއަކާއެކު ފަލްކާ ތެރެއަށް ފައިބައިގެން އުޅެނިކޮށް ކަމަށް ވާހަކަ ދެކެވެ އެވެ.

ވޮރަންޓް އޮފިސަރު2 ހާމިދު: މި ހާދިސާގައި ވަނީ ނިޔާވެފައި 

އެކަމާއި ގުޅޭގޮތުން އެމްއެންޑީއެފުން ބުނީ އެއީ ހަގީގީ ވާހަކަތަކެއް ނޫން ކަމަށެވެ. ކޮޅުވެއްޓި ބަންޑުން ޖަހާލިއިރު ކެޕްޓަނާއި ހާމިދު ވެސް ތިބީ ވީލް ހައުސްތެރޭގަ އެވެ. އަދު އެ ވަގުތު އިންޖީނު ރޫމްގެ ތެރޭގައި ހުރީ މިހާރު ގެއްލިގެން ހޯދަމުންދާ ބަންގްލްދޭޝް މީހާ އެވެ.

ހާމިދުގެ ހަށިގަނޑު ނެގީވެސް ކޮޅުވެއްޓީގެ ވީލް ހައުސްތެރެއިން ކަން ސިފައިން ޔަގީން ކޮށްދެ އެވެ.

ސިފައިން ބުނި ގޮތުގައި ގެއްލުނު ފަޅުވެރިޔާ އިންޖީނު ރޫމްގެ ތެރޭގައި ވީކަމުގެ މައުލޫމާތު ވަނީ ލިބިފަ އެވެ. ކޮޅުވެއްޓި ފެތިފައިވަނީ ކާށިދޫ ކަނޑުގެ ތެރެއިން ޅ އަތޮޅާއި އެއް މޭލު ދުރުން 550 މީޓަރު އަޑިއަށެވެ.

އޭނާ ހޯދުމުގެ މަސައްކަތް އަދިވެސް ދަނީ ކުރިއަށެވެ.