ބޭރުގެ ޓުއާ އޮޕަރޭޓަރުންނާއި އޮންލައިން ބުކިން ޕްލެޓްފޯމްތަކުން ޓީޖީއެސްޓީ ނެގުމުގެ އުސޫލަށް މީރާއިން އިއްޔެ ޢަމަލުކުރަން ފެށުމާ ގުޅިގެން އެ ނިންމުމާ ދެކޮޅު ހެދުމުގެ ގޮތުން އިޓަލީގެ ކިއާ އޯރާ ވިއާޖީ ކުންފުނިން ރާއްޖެއަށް އާ ބުކިންތައް ނެގުމާއި ދަތުރު ވިއްކުން މެދުކަނޑާލައިފިއެވެ.

އެ ކުންފުނީގެ ވެބްސައިޓުގައި ޝާއިޢުކުރި ބަޔާނެއްގައި ބުނެފައިވާ ގޮތުން ދިވެހި ސަރުކާރުން ބައިނަލްއަޤުވާމީ ޤާނޫނީ ހަމަތަކަށް އިޙުތިރާމުކުރާ މާޙައުލެއް އަލުން ޤާއިމުވެއްޖައުމަށް ދާންދެން މި ނިންމުން ދެމިއޮންނާނެއެވެ. ރާއްޖޭގައި އޮފީހެއް ނެތި އިޓަލީގައި ހިންގާ ކޮންސަލްޓެންސީ އަދި އިންޓާމީޑިއަރީ މަސައްކަތުގެ މާޖިންއިން 17 އިންސައްތައިގެ ޓީޖީއެސްޓީ ނެގުމާއި މީރާގައި ރަޖިސްޓަރީ ކުރަން ލާޒިމުކުރުމަކީ ބައިނަލްއަޤުވާމީ ޤާނޫނީ އުސޫލުތަކާ ފުށުއަރާ ކަމެއް ކަމަށް އެ ކުންފުނިން ދެކެއެވެ.

ރާއްޖޭގެ ރިސޯޓުތަކާއި ދަތުރުފަތުރާއި ސީދާ ރާއްޖެއިން ލިބިގަންނަ ޚިދުމަތްތަކަށް މިހާރުވެސް ޤަވާޢިދުން ޖީއެސްޓީ އާއި ގްރީން ޓެކްސް ދައްކަމުން އަންނަ ކަމަށް ވެސް ބަޔާނުގައި އެ ކުންފުނިން ފާހަގަކޮށްފައިވެއެވެ.

ކުރިން ކޮންފާމް ކޮށްފައިވާ ބުކިންތައް ގެންގުޅޭ ފަތުރުވެރިން ހާސްވާން ނުޖެހޭ ކަމަށާއި އެއްބަސްވެފައިވާ އަގުގައި އެ ބުކިންތައް ކުރިއަށް ގެންދިއުމަށް މަސައްކަތް ކުރަމުން އަންނަ ކަމަށް ކިއާ އޯރާ ވިއާޖީން ބުނެފައިވެއެވެ.

މި ފިޔަވަޅަކީ ޔޫރަޕުގެ އިއްތިޙާދުގެ ޓްރޭޑް ޔުނިއަންތަކުން މި މައްސަލައާ ގުޅިގެން ފުޅާ ދާއިރާއެއްގައި ކުރިއަށް ގެންދާ އިޙުތިޖާޖުގެ ބައެއް ކަމަށް އެ ކުންފުނިން ބުނެފައިވެއެވެ.

ޔޫރަޕުގެ ޓްރެވަލް އެޖެންޓުންގެ ފެޑެރޭޝަން (އީސީޓީއޭއޭ) އިން ބްރަސަލްސްގައި ހުންނަ ރާއްޖޭގެ އެމްބަސީއަށް ކަންބޮޑުވުން ފާޅުކޮށް ސިޓީއެއް ފޮނުވާފައިވާ ކަމަށާއި އިނގިރޭސި ވިލާތުގެ ޓްރެވަލް އެޖެންޓުންގެ ޖަމިއްޔާ (އޭބީޓީއޭ) އިން ވެސް މި ބަދަލަށް ޢަމަލުކުރުން ފަސްކޮށްދިނުމަށް އެދި ރާއްޖޭގެ ޓޫރިޒަމް ވުޒާރާއަށް ހުށަހަޅާފައިވާ ކަމަށް ވެސް ބަޔާނުގައި ބުނެފައިވެއެވެ.

އިޓަލީގެ ޓުއާ އޮޕަރޭޓަރުން މިފަދަ ނިންމުމެއް ނިންމިއިރު، މިއީ ހަމައެކަނި ރާއްޖެއިން އަމަލުކުރާ އުސޫލެއް ނޫނެވެ. ބޭރުގެ ބައެއް ބޮޑެތި ޤައުމުތަކުން ވެސް ޓީޖީއެސްޓީގެ މިފަދަ އުސޫލެތައް ގެންގުޅެއެވެ. އޭގެ ތެރެއިން ކެނެޑާގައި ހާރމޮނައިޒްޑް ސޭލްސް ޓެކްސްއެއް އެ ޤައުމުން ބޭރުގައި މަސައްކަތް ކުރާ އޮންލައިން ޓްރެވަލް އޮޕަޜޭޓަރުތަކުން ނަގައެވެ. އަދި ނިއު ޒީލެންޑުން ވެސް 15 އިންސައްތައިގެ ރިމޯޓް ސާވިސަސް ޖީއެސްޓީއެއް ޤައުމުން ބޭރުގައި މަސައްކަތް ކުރާ ޑިޖިޓަލް ޓުއާ އޮޕަރޭޓަރުންގެ އަތުން ނަގައެވެ.

އަދި ރާއްޖެއިން މި ނިންމުން ނިންމީ ރާއްޖެއަށް ވަންނަ ފަތުރުވެރިކަމުގެ އާމްދަނީގެ ބޮޑު ބައެއް ރާއްޖޭގައި މަސައްކަތް ކުރާ ބޭރު ކުންފުނިތަކުގެ ޤައުމުތަކަށް ދާތީއެވެ. މި ބަދަލުގެ ސަބަބުން ރާއްޖެއަށް ވަންނަ ފަތުރުވެރިމަމުގެ އާމްދަނީން ރާއްޖޭއިން ބޭރަށް ދާ އާމްދަނީގެ މިންވަރު މަދުވެގެންދާެއެވެ. އަދި ރާއްޖެއަށް ވަންނަ ޑޮލަރުގެ މިންވަރު ވެސް އިތުރުވެގެންދާނެއެވެ.

މީރާއިން މި އުސޫލަށް ޢަމަލުކުރަން ފަށާފައިވަނީ އޮކްޓޫބަރު 1 އިން ފެށިގެންނެވެ.