ޖީޕީ ކްލިނިކްތައް ފެށުމުން ސްޕެޝަލިސްޓުންނަށް ދެއްކުންވެސް ފަސޭހަވެގެންދާނެ: ހަލީމް
މާލެ އަދި ހުޅުމާލޭގައި ޤާއުމްކުރުމަށް ނިންމާފައިވާ އާއްމު ބަލީގެ ކްލިނިކް (ޖީޕީ ކްލިނިކް) ތައް ގާއިމްކުރެވިގެން ދިއުމުން ހާއްސަ ޑޮކްޓަރުންނަށް ދެއްކުމަށް ފަސޭހަވެގެންދާނޭކަމަށް މާލޭ ގްރޫޕް އޮފް ހޮސްޕިޓަލުގެ ސީއީއޯ އިބްރާހިމް ޢަބްދުއްރައްޒާގް ވިދާޅުވެއްޖެއެވެ.
ރައްޔިތުން މަޖިލީހުގައި މިއަދު އޮތް އިޖުތިމާއީ ކޮމިޓީގައި ރައްޔިތުން ސްޕެޝަލިސްޓް ޑޮކްޓަރުންނަށް ދެއްކުމަށް އުފުލަންޖެހޭ ތަކްލީފްތަކާ ގުޅޭގޮތުން ކޮމިޓީގެ މެމްބަރަކު ކުރެއްވި ސުވާލަކަށް ޖަވާބުދެއްވަމުން ޢަބްދުއްރައްޒާގު ވިދާޅުވީ، ސިއްހީ ނިޒާމް ހަރުދަނާ ކުރުމުގެ ގޮތުން މާލޭ ގްރޫޕް އޮފް ހޮސްޕިޓަލުގެ ފަރާތުން މިހާރުވެސް މުހިއްމު ކަންތައްތަކެއް ކުރަމުން ގެންދާކަމަށެވެ. މިގޮތުން އެންމެ ހާއްސަ ކަމެއްގެ ގޮތުން މާލެ ސަރަހައްދުގައި 4 ޖީޕީ ކްލިނިކް ގާއިމްކުރުމުގެ މަސައްކަތް ކުރަމުންގެންދާކަން އޭނާ ފާހަގަކުރެއްވިއެވެ. މާލޭގައި ދެ ކްލިނިކް ގާއިމްކުރެވިގެންދާއިރު، ހުޅުމާލެ ފޭސް 1 ގައި ކްލިނިކަކާއި، ފޭސް ދޭއްގެ ވިނަރެސް ޓަވަރުގައި ކްލިނިކެއް ގާއިމްކުރެވިގެންދާނޭކަމަށް ޢަބްދުއްރައްޒާގް ވިދާޅުވިއެވެ.
އޭނާ ވިދާޅުވީ ޖީޕީ ކްލިނިކްތަކުގެ ހިދުމަތް ދެވެން ފެށުމުން ސްޕެޝަލިސްޓުންނަށް ދައްކަން އިންތިޒާރުގައި ތިބެންޖެހޭ ތިބުން ވަރަށްބޮޑަށް ފަސޭހަވެ، ހަރުދަނާ ނިޒާމެއްގެ ތެރެއިން މިކަންކަން ކުރެވިގެންދާނޭކަމަށެވެ. ހާއްސަ ޑޮކްޓަރުންނަށް އެޕޮއިންޓްމަންޓް ހައްދައިގެން އަންނަ ބައެއް ފަރާތްތަކުން އަސްލު ދައްކަންޖެހޭ ބަލީގެ ޑޮކްޓަރުނޫން އެހެން ޑޮކްޓަރަށް ދެއްކޭ ފަހަރު އަންނަކަމަށާއި، އެކަމުގެ ސަބަބުންވެސް އެޕޮއިންޓްމަންޓް ހައްދައިގެން ޑޮކްޓަރަށް ދެއްކުމަށް ދިގު އިންތިޒާރެއް ކުރަންޖެހޭަން ސީއީއޯ ފާހަގަކުރެއްވިއެވެ.
މިސާލަކަށް އަޅުގަނޑު މެއަށް ތަދުވީމަ އަޅުގަނޑު އަމިއްލައަށް އިހުތިޔާރު މި ކުރަނީ ދައްކާނީ ކާޑިއޯ ޖިސްޓަކަށޭ. ދެން ކާޑިއޯޖިސްޓަށް އެޕޮއިންޓްމަންޓް ހައްދައިގެން އެތައް ދުވަހު މަޑުކޮށްގެން އޭނާއަށް ދެއްކީމަ މި އިނގެނީ އަޅުގަނޑު ހިތުގެ މައްސަލައެއް ނެތޭ މި ވެދާނޭ ގޭހުގެ މައްސަލަކަށް ނުވަތަ އެހެން ކަމަކަށް. ދެން އަނެއްކާ އަޅުގަނޑު މި ޖެހެނީ ކިޔުއަށް އަރައި ކިޔުގައި އެތައް ދުވަހަކު ހުރެ ގޭސްޓްރޯ މީހަކަށްދައްކަން
ސީއީއޯ ޢަބްދުއްރައްޒާގު މިސާލެއްގެ ގޮތުގައި ވިދާޅުވިއެވެ
އަތޮޅުތެރޭގެ ރައްޔިތުން މާލެއައިސް ޑޮކްޓަރަށް ދެއްކުމުގައި އުފުލަންޖެހޭ ތަކްލީފްތަކާ ގުޅޭގޮތުން ޢަބްދުއްރައްޒާގް ވިދާޅުވީ، މިހާރުވެސް ދެ އަތޮޅެއްގައި ޓެލެ މެޑްސިންގެ ހިދުމަތް ފެށުމަށް ތައްޔާރުވަމުންދާކަމަށެވެ. އެގޮތުން ފ އަދި ހދ އަތޮޅު ހޮސްޕިޓަލްތަކުގައި ޓެލެމެޑިސިންގެ ހިދުމަތް ތައާރަފްކުރުމަށް މިހާރުވެސް މަސައްކަތްތައް ދަނީ ކުރަމުންނެވެ. މީގެ އިތުރުން އަތޮޅުތަކުން މާލެއަށް ޑޮކްޓަރަށް ދެއްކުމަށް އަންނަ ފަރާތްތަކަށް އަމާޒުކޮށް އައުޓްރީޗް ޕްރޮގްރާމްތަކެއް ފަށާފައިވައިރު، މިކަމުގެ ސަބަބުންވެސް ޑޮކްޓަރަށް ދެއްކުމަށް މާލެ އަންނަ ފަރާތްތަކަށް ފަސޭހަތަކެއް ލިބިގެންދާނޭކަމަށް ސީއީއޯ ވަނީ ވިދާޅުވެފައެވެ.
މާލޭ ގްރޫޕް އޮފް ހޮސްޕިޓަލްސްގެ ފަރާތުން މިއަހަރުގެ ތެރޭގައިވަނީ ހދ ކުޅުދުއްފުށި އަދި ގދ ތިނަދޫގައި އައުޓްރީޗް ޕްރޮގްރާމްތަކެއް ކުރިއަށް ގެންގޮސްފައެވެ. މި ޕްރޮގްރާމުގެ ދަށުން ސްޕެޝަލިސްޓް ޑޮކްޓަރުން ވަނީ އެ ރަށްރަށަށްގޮސް ބަލިމީހުންބަލައި، ބައެއްކަހަލަ އޮޕަރޭޝަންތައްވެސް ކޮށްދީފައެވެ.
Advertisement
This content is created and paid for by advertisers and does not involve Voice Journalists
