ސިޔާސީ ޕާޓީތަކުގެެ ދަފްތަރުގައި މިވަގުތު މެންބަރުން ހިމެނޭ އަދަދު އިލެކްޝަންސް ކޮމިޝަނުން އާންމުކޮށްފި އެވެ.

ކޮމިޝަންގެ ދަފްތަރު ގައި ވަނީ ނުވަ ޕާޓީ އެކެވެ. އެ ޕާޓީތަކުގެ ތެރެއިން އެންމެ މެންބަރުން ގިނައީ ރައީސް މުއިއްޒުގެ ޕީޕަލްސް ނެޝަނަލް ކޮންގްރެސްގަ އެވެ. ދެން އެންމެ މެންބަރުން ގިނައީ އިދިކޮޅު މައި ޕާޓީ، އެމްޑީޕީގަ އެވެ.

އިލެކްޝަންސް ކޮމިޝަނުން އާންމުކޮށްފައިވާ ދަފްތަރުގައިވާ ގޮތުން ކޮންގްރެސް ޕާޓީ ގައި ތިބީ 68،665 މެންބަރުނެވެ.

އެމްޑީޕީ ގައި 43،765 މެންބަރުން އެބަ ތިއްބެވެ. ދެން އެންމެ މެންބަރުން ގިނަ ޖުމްހޫރީ ޕާޓީގައި ތިބީ 13،456 މެންބަރުންނެވެ.

އެހެން އެއްވެސް ޕާޓީއެއްގައި 10،000 މެންބަރުން ހަމައެއް ނުވެ އެވެ.

ވިޔަފާރިވެރިޔާ އަހްމަދު ސިޔާމް މުހައްމަދުގެ އެމްޑީއޭ ގައި ތިބީ 9،011 މެންބަރުންނެވެ. މިވަގުތު ބެންކޮކުގައި ދިރިއުޅޭ ކުރީގެ ހޯމް މިނިސްޓަރު އިމްރާން ރައީސްކަން ކުރާ އަދާލަތު ޕާޓީ ގައި ތިބީ 8،844 މެންބަރުންނެވެ.

މި ދެ ޕާޓީން 10،000 މެންބަރުން ހަމަކުރަނީ ދައުލަތުން ދޭ ފައިސާ ހޯދަން އެކަމަށް ކަނޑަައަޅާފައި އޮންނަ ވަގުތު އެވެ. އޭގެ ފަހުން އެ އަދަދު ދަށްވެ އެވެ.

ކުރީގެ ޑިފެންސް މިނިސްޓަރު ކާނަލް މުހައްމަދު ނާޒިމްގެ އެމްއެންޕީ ގައި ތިބީ 5،836 މެންބަރުންނެވެ.

އެމްޑީޕީ ރޫޅާލަން އުފެއްދި ދަ ޑިމޮކްރެޓްސްގައި މިވަގުތު 3،547 މެންބަރުން އެބަ ތިއްބެވެ. ނަމަވެސް ޕާޓީގެ މުޅި ލީޑާޝިޕް ހިމެނޭހެން ގިނަ މެންބަރުން މިހާރު ވަނީ އަލުން އެމްޑީޕީގައި ގުޅިފަ އެވެ. އެހެން ކަމުން ދަފްތަރު ދެން އަދާހަމަ ކުރާއިރު މެންބަރުންގެ އަދަދު ވަރަށް މަދުވާނެ ކަމަށް ބެލެވެ އެވެ.

ކުރީގެ ރައީސް ޔާމީންގެ ޕީއެންއެފް ގައި 3،046 މެންބަރުން އެބަ ތިއްބެވެ. އެއީ ކިރިޔާ ގާނޫނީ އަދަދު ހަމަވާ މިންވަރެވެ.

މިވަގުތު ސިންގަޕޫރަށް ދިރިއުޅުން ބަދަލުކުރައްވާފައިވާ ކުރީގެ ނާއިބު ރައީސް އަހްމަދު އަދީބުގެ އެމްޓީޑީގައި ގާނޫނީ އަދަދު ވެސް ހަމައެއް ނުވެ އެވެ. އެ ޕާޓީގައި ތިބީ 2،272 މެންބަރުންނެވެ.