ސަރުކާރުން ހޯދާނެކަމަށްބުނި އެއްވެސް ފައިސާއެއް މިހާތަނަށް ހޯދިފައިނުވާކަމަށް ވިދާޅުވެ ކުރީގެ ފިނޭންސް މިނިސްޓަރު އިބްރާހީމް އަމީރު ސަރުކާރަށް ވަރަށް ބޮޑަށް ފާޑުވިދާޅުވެއްޖެއެވެ.
އަމީރު މިހެން ވިދާޅުވެފައިމިވަނީ އެމްޑީޕީ އިން މިއަދު ބޭއްވި ޕްރެސް ކޮންފަރެންސްގައެވެ.
ނިމިނު 2024 ވަނަ އަހަރު 500 މިލިއަން ޑޮލަރު ހޯދާނެކަމަށް ބަޖެޓްކޮށްފައިވާކަމަށް އަމީރު ވަނީ ފާހަގަކުރައްވާފައެވެ. މި ހިނގާ 2025 ވަނަ އަހަރު 432.5 މިލިއަން ޑޮލަރު ލޯނުގެ ގޮތުގަ އަދި އެހެނިހެން ގޮތްގޮތަށް ހޯދަން ބަޖެޓްގައި ހިމަނާފައިވާކަމަށާ އަދި މީގެ އިތުރުން ހިލޭ އެހީގެ ގޮތުގައި 120 މިލިއަން ޑޮލަރު ހޯދާނެކަމަށް ސަރުކާރުން ބުނެފައިވީ ނަމަވެސް މިއަހަރުގެ މިހާތަނަށް އެއްވެސް ފައިސާއެއް ހޯދިފައިނުވާކަމަށް އަމީރު ވިދާޅުވިއެވެ.
އެހެންނަމަވެސް 2024 ވަނަ އަހަރު ނިމުނުއިރު ކުދި އަދި މެދުފަންތީގެ ވިޔަފާރިތަކަށް 7 ބިލިއަނުން ސަރުކާރުން ދަރަނިވެރިވެފައި އޮތުމުގެ ސަބަބުން ބިލްތަކަށް ފައިސާ ނުދެއްކި ކުދި އަދި މެދުފަންތީގެ ވިޔަފާރިތައް ބަނގުރޫޓް ވުމާ ދިމާލަށް އަންނަ ކަމަށާއި އަދި މި ހިނގާ 2025 ވަނަ އަހަރުވެސް އެ މައްސަލަތަށް އިތުރަށް ގޯސްވަމުން އަންނަކަން ފާހަގަކުރައްވާ އަމީރު ވިދާޅުވީ 7 ބިލިއަން ޑޮލަރުގެ އިތުރަށް ރާއްޖޭގެ ކޮންޓްރެކްޓަރުންނަށް ދައްކަން އޮންނާނެކަމަށެވެ.
ސަރުކާރު ހިންގަމުން ދަނީ ލޭންދޭނަށް ކަމަށާ، ސަރުކާރުން ޕްރޮޖެކްޓްތަށް ހިންގުމަށްފަހު ޕްރޮޖެކްޓްތަކަށް ފައިސާ ނުދައްކާ ކަމަށާ ރާއްޖޭގެ ކޮންޓްރެކްޓަރުންގެ އިތުރުން ކުދި އަދި މެދުފަންތީގެ ވިޔަފާރިތައް ބަނގުރޫޓްކޮށް ސަރުކާރު ހިންގަމުންދާކަމަށް ބުނެ އަމީރު ވަނީ ސަރުކާރަށް ވަރަށް ބޮޑަށް ފާޑުވިދާޅުވެފައެވެ.
2024 އަދި 2025 ވަނަ އަހަރުގެ ބަޖެޓަށް ބަލާލިކަމުގައި ވިޔަސް ނުވަތަ މާލީ އަދި އިގްތިސާދީ ސިޔާސަތަށް ބަލާލި ކަމުގައި ވީނަމަވެސް ސަރުކާރަށް ނުކުރެވޭ އެންމެ ބޮޑުކަމަކީ ބަޖެޓަށް ފައިސާ ހޯދުންކަމަށާ، އެކަމުގެ ސަބަބުން ނިމިދިޔަ ސަރުކާރުގައި ފެށި ޕްރޮޖެކްޓްތަކެއް ހުއްޓިފައިވާކަމަށެވެ.
އަމީރު އިތުރަށް ފާހަގަކުރެއްވި ގޮތުގައި ކަޅު ފައިސާ ރާއްޖެއަށް ހޯދޭނެ ގޮތްތަކަށް ސަރުކާރުގެ އިސްފަރާތްތަކުގެ ވިސްނުން ހުންނަކަމަށެވެ.
އަޅުގަނޑުމެންނަށް ފެނިގެން މިދަނީ ކަޅު ފައިސާގެ އަވާގައި ސަރުކާރު ޖެހި، ކަޅު ފައިސާ ހޯދޭނެ ގޮތްތަކަށް އެމަގުން ސަރުކާރުގެ އިސްވެރިންގެ ވިސްނުން ހުންނަތަން ފެނިގެން މިދަނީ. އަޅުގަނޑު ކުރިން ވެސް ޕްރެސްތަކުގައި ފާހަގަކުރަމުންދިޔައިން ޔޫގަންޑާއިން ފައިސާ ހޯދާ ވާހަކަ، އީސްޓް އޭޝިޔާގެ ޤައުމުތަކަށް އީސްޓް ޔޫރަޕްގެ ގައުމުތަކަށް ސަރުކާރުގެ އިސްވެރިން ގޮސް ކަޅު ފައިސާ ހޯދަން މަސައްކަތްކުރާ ވާހަކަ.
ކުރީގެ ފިނޭންސް މިނިސްޓަރު އަމީރު ވިދާޅުވިއެވެ.
ބަޖެޓަށް ފައިނޭންސް ހޯދުމަށް ސަރުކާރު ނުކުޅެދިފައިވުމުގެ ސަބަބުން ރާއްޖޭގެ ތަރައްގީގެ މަޝްރޫއުތަށް ހުއްޓިފައިވާކަމަށާ އޭގެ ނަތީޖާ އަކަން ވެގެންދަނީ ޕްރޮޖެކްޓްތަށް ހިންގުމަށް ސަރުކާރު ހިއްސާވާ ކުންފުނިތަކަށް ދޭންޖެހުން ކަމަށާ، އެހެންނަމަވެސް ސަރުކާރު ހިއްސާވާ ކުންފުނިތަކަށްވެސް ޕްރޮޖެކްޓްތަށް ހިންގުމުގެ ގާބިލްކަން ނެތްކަން އަމީރު އިތުރަށް ފާހަގަކުރެއްވިއެވެ.
Advertisement
This content is created and paid for by advertisers and does not involve Voice Journalists
