މިހާރު އެމެރިކާގައި ކުރިއަށްދާ ކުލަބު ވޯލްޑްކަޕް ފުޓްބޯޅަ މުބާރާތުގެ ކުއާޓާ ފައިނަލުގައި ޖަރުމަނުގެ ބަޔާން މިޔުމިކާއި ދެކޮޅަށް ޕީއެސްޖީ ކުޅުނު މެޗުގައި އެޓީމުގެ ދެ ޑިފެންޑަރުން ކަމަށްވާ ވިލިއަމް ޕަޗޯ އަދި ލޫކަސް ހެނާންޑޭޒަށް ދެއްކި ރަތްކާޑާއެކު އެދެކުޅުންތެރިންނަށް މުބާރާތް ނިމިޖެއެވެ.

ޕަޗޯ އަދި ހެނާންޑޭޒަށް ދެއްކި ރަތްކާޑާއެކު ފީފާ އިން މިދެކުޅުންތެރިން ވެސް ވަނީ ދެމެޗަށް ސަސްޕެންޑްކޮށްފައެވެ. މިއާއެކު ސެމީފައިނަލުގައި ރެއާލް މެޑްރިޑާއި ދެކޮޅަށް ކުޅޭ މެޗުގެ އިތުރުން ޕީއެސްޖީ ފައިނަލަށް ހޮވުނު ނަމަވެސް މިދެކުންތެރިންނަކަށް ނުކުޅެވޭނެއެވެ.

އުމުރުން 23 އަހަރުގެ އެކުއެޑޯ ޑިފެންޑަރު ވިލިއަމް ޕަޗޯއަކީ މި ސީޒަނުގައި ޕީއެސްޖީ އިން ހޯދަމުންދާ ކާމިޔާބީތަކުގައި ޓީމުގެ ދިފާއީ އެންމެ މުހިންމު އެއްކުޅުންތެރިޔާ އެވެ 29 އަހަރުގެ ހެނާންޑޭޒްއަކީ ޕީއެސްޖީގެ ކޯޗު ލުއިސް އެންރީކޭ ބަދަލު ކުޅުންތެރިއެއްގެ ގޮތުގައި އެންމެ ގިނައިން ބޭނުންކުރާ ދިފާއީ ކުޅުންތެރިޔާއެވެ.

ބަޔާން މިޔުނިކާއި ދެކޮޅަށް ކުޅުނު މެޗުގައި ވެސް ހެނާންޑޭޒް ކުޅެން ނިކުތީ ބަދަލު ކުޅުންތެރިއެއްގެ ގޮތުގައެވެ. އަދި އެމެޗުގައި ދެކުޅުންތެރިން މަދުކޮށް ކުޅެންޖެހުނު ނަމަވެސް ޕީއެސްޖީ އިން ވަނީ 2-0 ގެ ނަތީޖާއަކުން ބަޔާން ބަލިކޮށްފައެވެ.

މީގެ އިތުރުން ޕީއެސްޖީ އާއި ދެކޮޅަށް ނުކުންނަ ރެއާލް މެޑްރިޑަށް ވެސް ވަނީ ސަސްޕެންޝަންގެ މައްސަލަ ކުރިމަތިވެފައެވެ. އެގޮތުން މިމުބާރާތުގައި އެޓީމުގެ ފަހަތުގައި އެންމެ މުހިންމު ދައުރެއް އަދާކުރަމުންދިޔަ ޑީން ހުއިސަން ވަނީ މިމެޗަށް ސަސްޕެންޑްވެފައެވެ.

ކުއާޓާފައިނަލުގައި ޖަރުމަނުގެ ބޮރޫޝިއާ ޑޯޓްމަންޑް އަތުން 3-2 ގެ ނަތީޖާއަކުން ރެއާލް މޮޅުވި މެޗުގެ އިތުރު ވަގުތުގެ ތެރޭގައި ހުއިސަންއަށް ދެއްކި ރަތް ކާޑާއެކު ފީފާ އިން ވަނީ އޭނާ އެއްމެޗަށް ސަސްޕެންޑްކޮށްފައެވެ. މިއާއެކު ސެމީގައި ނުކުޅެވުނު ނަމަވެސަ ރެއާލް ފައިނަލަށް ހޮވިއްޖެނަމަ އޭނާއަށް ފައިނަލުގައި ކުޅެވޭނެއެވެ.

މުބާރާތުގެ ސެމީފައިނަލުގެ ފުރަތަމަ މެޗުގައި މިރޭ ބްރެޒިލްގެ ފްލެމިނެންސް އާއި އިނގިރޭސި ޕްރެމިއާ ލީގުގެ ޗެލްސީ ވާދަކުރާއިރު، ރެއާލް މެޑްރިޑާއި ޕީއެސްޖީ ވާދަކުރާ ސެމީގެ ދެވަނަ މެޗު ކުޅުމަށް ހަމަޖެހިފައިވަނީ މާދަމާ ރޭ ރާއްޖެ ގަޑިން 00:00 ގައެވެ.