އަހަރުގެ މިހާތަނަށް އާއިރު، އާމްދަނީގެ ގޮތުގައި ލިބުނު އަދަދަށްވުރެ ސަރުކާރުން ކުރި ހޭދަ ނިސްބަތުން ދަށަށްގޮސްފައިވާކަމަށް ވީކްލީ ފިސްކަލް ޑިވެލޮޕްމަންޓް ރިޕޯޓުން ދައްކައިފިއެވެ.

ފިނޭންސް މިނިސްޓްރީން ނެރެފައިވާ ސަރުކާރުގެ ހަރަދުބަރަދު ހުރިގޮތް ދައްކުވައިދޭ "ވީކްލީ ފިސްކަލް ޑިވެލޮޕްމަންޓް ރިޕޯޓް" ގައިވާގޮތުން މިހިނގާ ޖޫންމަހުގެ 26 ވަނަ ދުވަހުގެ ނިޔަލަށް ސަރުކާރުގެ ހަރަދުތައް ހުރީ 17.9 މިލިއަން ރުފިޔާގައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު، 17.8 އިންސައްތައިގެ ދަށްވުމެކެވެ. 2024 ވަނަ އަހަރުގެ ޖެނުއަރީން ޖޫންމަހުގެ 26 ވަނަ ދުވަހުގެ ނިޔަލަށް ސަރުކާރުން ކުރި ހަރަދު ހުރީ 21.8 ބިލިއަން ރުފިޔާގައެވެ.

އަހަރުގެ މިހާތަނަށް އާއިރު ރިކަރަންޓް ހަރަދުތައް ހުރީ 15.9 ބިލިއަން ރުފިޔާގައެވެ. އަދި ކެޕިޓަލް ހަރަދުތައް ހުރީ 1.9 ބިލިއަން ރުފިޔާގައެވެ. ބަޖެޓުން ކުރި ރިކަރަންޓް ޚަރަދުތަކަށް ބަލާއިރު 55.7 އިންސައްތަ ދައުލަތުގެ އޮފީސްތަކުގެ އިދާރީ ހިންގުމާ ގުޅޭ ކަންކަމަށް ވަނީ ހިނގާފައެވެ. ދައުލަތުން ފޯރުކޮށްދޭ އެކި އެހީ އަދި ސަބްސިޑީތައް ދިނުމަށް ކުރެވުނު ހޭދަ ނިމިގެންދިޔަ އަހަރާ އަޅައިބަލާއިރު 5.6 އިންސައްތަ ދަށަށްދިޔަނަމަވެސް އާސަންދައަށް ހިނގި ޚަރަދުވެސް 1.9 އިންސައްތައިންވަނީ އިތުރުވެފައެވެ. އެގޮތުން އާސަންދައަށް ކުރި ހޭދަ ވަނީ އެއްބިލިއަން ރުފިޔާއާ ކައިރިކޮށްފައެވެ. 

މީގެ އިތުރުން މެޑިކަލް ވެލްފެއަރގެ ޚަރަދުތައް 33.3 އިންސައްތައިން ދަށްވެފައިވާއިރު، ދައުލަތުން ނަގާފައިވާ ދަރަންޏަށް ފައިސާ ދައްކާފައިވާ މިންވަރު މިދިޔަ އަހަރުގެ މި މުއްދަތާއި އަޅާބަލާއިރު 81.9 އިންސައްތަ އަދި ސޮވެރިންގ ޑިވެލޮޕްމަންޓް ފަންޑަށް ޖަމާކުރާ ފައިސާގެ އަދަދު 60.1 އިންސައްތަވަނީ އިތުރުވެފައެވެ.

އާމްދަނީ އާއި ހިލޭ އެހީގެ ގޮތުގައި ދައުލަތުގެ ބަޖެޓަށް މިހާތަނަށް 18.6 ބިލިއަން ރުފިޔާ ވަނީ ލިބިފައެވެ. މިއީ މިދިޔަ އަހަރުގެ މި މުއްދަތާ އަޅާބަލާއިރު، 8.9 އިންސައްތަ އިތުރުވުމެކެވެ.. މިދިޔަ އަހަރު ލިބިފައިވަނީ 16.9 ބިލިއަން ރުފިޔާއެވެ.