ހުސްވި ޖޫންމަހު އެކަނިވެސް ތެރަޕިއުޓިކް ފަރުވާގެ ހަރަދުތަކަށް 4 މިލިއަނަށްވުރެ ގިނަ ރުފިޔާ ހޭދަވެފައިވާކަމަށް ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)އިން ބުނެފިއެވެ.

އެންސްޕާއިން ބުނީ ޖޫންމަހު ނުކުޅެދުންތެރިކަން ހުންނަ 4،236 މީހަކަށް ޖުމްލަ 51.2 މިލިއަން ރުފިޔާގެ މާލީ އެހީދީފައިވާކަމަށެވެ. އޭގެ ތެރެއިން ތެރަޕިއުޓިކް ފަރުވާއަށް 4،055،281 ރުފިޔާ ހޭދަވިކަމަށް އެންސްޕާއިން ވަނީ ބުނެފައެވެ. ޖޫންމަހު ތެރަޕީ ފަރުވާގެ ކަންކަމަށް 108 ފަރާތަކަށް ވަނީ އެހީ ހަމަޖައްސައިދީފައެވެ.

މީގެ އިތުރުން ބޭސްފަރުވާގެ އެހީގެ ދަށުން ތެރަޕިއުޓިކް ފަރުވާ 55 މީހަކަށް ހަމަޖައްސައިދީފައިވާއިރު، އެފަރާތްތަކަށް މާލީ އެހީގެ ގޮތުގައި 385،302 ރުފިޔާ ވަނީ ހަމަޖައްސައިދީފައެވެ.

އެންސްޕާއިން ތެރަޕިއުޓިކް ފަރުވާގެ ހަރަދުތަކަށް ޖޫންމަހު 4 މިލިއަނަށްވުރެ ގިނަ ރުފިޔާ ހަރަދުވެފައިވާއިރު، ތެރަޕިއުޓިކް ފަރުވާގެ ހަރަދުތަކަށް ކޮންމެ މަހަކުވެސް ކުރަންޖެހޭ ހޭދަ އިތުރުވަމުން އަންނަކަމަށް އެންސްޕާގެ ތަފާސްހިސާބުތަކުން ދައްކައެވެ. ތަފާސްހިސާބުތައް ދައްކާގޮތުން ނަފްސާނީ ނުކުޅެދުންތެރިކަން ހުންނަ ފަރާތްތަކުގެ އަދަދު 1،793 އަށް އަރާއިރު، އޯޓިޒަމް ކުދިންގެ ރަޖިސްޓްރީގައި މިހާރުވެސް 586 މީހުންނާއި ކުދިން އެބަތިއްބެވެ.

ނުކުޅެދުންތެރިކަން ހުންނަ ފަރާތްތަކުގެ ތެރެއިން ތެރަޕިއުޓިކް ފަރުވާއަށް ބޮޑު އަދަދެއް ދައުލަތުގެ ބައިތުލްމާލުން ހާދަކުރާއިރު، ނުކުޅެދުންތެރިކަން ހުންނަ ކުދިންނަށް ބޭނުންވާ ތެރަޕިއުޓިކް ހިދުމަތްތައް ދެމުން އަންނަ ތަންތަނުގެ ފެންވަރު ބެލޭނެ ގޮތެއް އަދި މިހާތަނަށް ހަމަޖެހިފައި ނުވާކަމަށް ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީން ވަނީ ބުނެފައެވެ.

މިއަހަރުގެ އޭޕްރިލްމަހު މަޖިލީހުގެ ޕެޓިޝަން ކޮމިޓީގައި ވާހަކަދައްކަވަމުން ސޯޝަލް އެންޑް ފެމިލީ ޑިވެލޮޕްމަންޓް މިނިސްޓްރީގެ ސްޓޭޓް މިނިސްޓަރު އަހުމަދު އާތިފް ވިދާޅުވެފައިވަނީ، 2019 ވަނަ އަހަރުން ފެށިގެން ތެރަޕީތަކަށް ފައިސާ ދެމުން އަންނައިރު، އަދި މިހާތަނަށް މިކަމަށް ވަކި އުސޫލެއް އަދި ތެރަޕީތަކުގައި ވަކި ފެންވަރެއް ހުންނަންޖެހޭނެ ފަދަ މިންގަނޑުތަކެއް އެކުލަވާލެވިފައި ނުވާކަމަށެވެ.  ނަމަވެސް ހެލްތް މިނިސްޓްރީއާއެކު މިހާރު އެ މަސައްކަތް ކުރެވެމުން އަންނަކަމަށް އޭނާ ވަނީ ވިދާޅުވެފައެވެ.

2019 ވަނަ އަހަރު ތެރަޕިއުޓިކް ފަރުވާގެ ކަންކަން ފެށިގެން އާއިރު ހިދުމަތްހޯދާ 119 ކުދިން ތިބިނަމަވެސް މިހާރު އެއަދަދު 1،087 އަށްވުރެ ގިނައެވެ. އެސްޕާގެ ތަފާސްހިސާބަށް ބަލާއިރު، މިއަހަރުގެ ފުރަތަމަ ތިން މަސްދުވަހު އެކަނިވެސް ތެރަޕިއުޓިކް ފަރުވާ ހޯދަމުން އަންނަ 675 ކުއްޖަކަށް 25 މިލިއަނަށްވުރެ ގިނަ ރުފިޔާ ވަނީ ހޭދަކޮށްފައެވެ.

ރާއްޖޭގައި އޭޑީއެޗްޑީ އަދި ނުކުޅެދުންތެރިކަން ހުންނަ ކުދިންގެ އަދަދު އިތުރުވަމުން އަންނައިރު، ތެރަޕިއުޓިކް ފަރުވާގެ ހިދުމަތް ހޯދުމުގައި ގޮންޖެހުންތަކެއް ހުންނަކަމަށް އެފަދަ ކުދިންގެ ބެލެނިވެރިން ވަނީ ފާހަގަކޮށްފައެވެ. މިގޮތުން އެންމެ ބޮޑު ގޮންޖެހުމަކީ އަމިއްލަ ސެންޓަރުތަކުން ދެމުން އަންނަ ތެރަޕިއުޓިކް ފަރުވާގެ ހިދުމަތްތަކަށް ބޮޑު ހޭދައެއްކުރަންޖެހުންކަމަށް ބެލެނިވެރިން ބުނެއެވެ.