ރ. އިނގުރައިދޫ މަގުހެދުމުގެ އަމަލީ މަސައްކަތް މިހިނގާ ޖުލައިމަހުގެ ތެރޭގައި ފެށުމަށް ތައްޔާރުވެއްޖެއެވެ.

އިނގުރައިދޫގެ މަގުތައް ހެދުމާ ގުޅޭގޮތުން އެރަށު ކައުންސިލުން ވަނީ މިދިޔަ ހަފްތާގައި ރޯޑް ޑިވެލޮޕްމަންޓް ކޯޕަރޭޝަނާއެކު ބައްދަލުވުމެއް ކުރިއަށްގެންގޮސްފައެވެ.

މި ބައްދަލުވުމާ ގުޅޭގޮތުން އިނގުރައިދޫ ކައުންސިލުން ފޭސްބުކްގައި ކޮށްފައިވާ ޕޯސްޓެއްގައި ބުނެފައިވަނީ، އާރު.ޑީ.ސީ އާއެކު ބޭއްވި މަޝްވަރާ ބައްދަލުވުމުގައި އިނގުރައިދޫ މަގުހެދުމުގެ ޢަމަލީ މަސައްކަތް ފެށުމާ ގުޅޭގޮތުން ނިންމަންޖެހޭ މުހިއްމު ނިންމުންތަކާ ގުޅޭގޮތުން މަޝްވަރާކޮށްފައި ވާކަމަށެވެ.

އާރުޑީސީން މިހާރު ވަނީ އިނގުރައިދޫ މަގުތައް ހެދުމުގެ މަސައްކަތްތައް ފެށުމަށްޓަކައި އެ މަސައްކަތަށް ބޭނުންވާ މުވައްޒަފުން ހޯދުމަށް އިއުލާނުކޮށްފައެވެ. އެގޮތުން އާރު.ޑީ.ސީ އިނގުރައިދޫ ސައިޓަށް ހޯދާ މުވައްޒަފުންގެ ތެރޭގައި ހިމެނެނީ:

- ސުޕަވައިޒަރ (1)

- އިންވެންޓްރީ މެނޭޖްމެންޓް އޮފިސަރ (1)

- ސެކިއުރިޓީ ގަރޑް (2)

- ސަޕޯޓް ސްޓާފް (1)

- ވެލްޑަރ (1)

- މޭސަން (1)

- ޕްރޮޖެކްޓް އެސިސްޓެންޓް (1)

އިނގުރައިދޫގެ މަގުތައް ހެދުމުގެ މަސައްކަތުގެ ދެވަނަ ފިޔަވަހި އާރުޑީސީއާ ހަވާލުކޮށްފައިވަނީ، 2023 ވަނަ އަހަރުގެ އޮގަސްޓްމަހުއެވެ. އޭރު މި މަސައްކަތް ނިންމުމަށް ދީފައިވަނީ، 600 ދުވަހެވެ. މި މަޝްރޫޢުތައް 54 މިލިއަން ރުފިޔާ ހަރަދުވާއިރު، 1.9 ކިލޯމީތަރުގެ މަގުގައި ތާރުއެޅުމަށް ވަނީ ހަމަޖެހިފައެވެ.

އިނގުރައިދޫއަކީ އާބާދީގައި 2،161 އަށްވުރެ ގިނަ މީހުން ދިރިއުޅެމުން އަންނަ ރަށެކެވެ. އިނގުރައިދޫގެ ބޮޑެތި މަގުތަކުގައި އަޑިގުޑަން ބޮޑުވުމުގެ ސަބަބުން އެތައް އުނދަގޫތަކެއް ރައްޔިތުން ތަހައްމަލުކުރަން ޖެހެއެވެ. ވާރޭ ވެހިއްޖެނަމަ ރަށުގެ މަގުތަކުގައި ފެންބޮޑުވެ އާއްމު ދަތުރުފަތުރަށް އުނދަގޫވާކަމަށް އެރަށު ރައްޔިތުން ފާހަގަކުރެއެވެ.