ގިނަ އަހަރުތަކަކަށްފަހު އިސްލާމީ ކުތުބުހާނާ މިރޭ ހުޅުވުމަށް ނިންމައިފިއެވެ.
މިކަމާ ގުޅޭގޮތުން އިސްލާމީ ކަންތައްތަކާ ބެހޭ ވުޒާރާއިން ބުނެފައިވަނީ، އިސްލާމީ ކުތުބުހާނާ އަލުން ހުޅުވުމަށް ކުރަންޖެހޭ މަސައްކަތްތައް ނިންމައި އެތަން މިރޭ ހުޅުވުމަށް ނިންމާފައިވާކަމަށެވެ. ސަލްމާން ރަސްގެފާނު މިސްކިތުގެ ތިންވަނަ ފަންގިގިލާގައި ތަރައްޤީކޮށްފައިވާ ކުތުބުޚާނާ ހުޅުވިގެންދާނީ 15،000 ގިނަ ފޮތާއެކުގައިކަމަށް އިސްލާމިކް މިނިސްޓަރ ޑރ. މުހައްމަދު ޝަހީމް އަލީ ސައީދު ވަނީ ވިދާޅުވެފައެވެ.
އިސްލާމިކް މިނިސްޓްރީ ވެބްސައިޓަށް ދެއްވި ބަސްދީގަތުމެއްގައި ވަޒީރު ވިދާޅުވެފައިވަނީ، އިސްލާމީ ކުތުބުޚާނާ ވެގެންދާނީ އިސްލާމީ ޢިލްމު ޚާސިލްކުރުމަށް ބޭނުންވާ އަދި ދިރާސާތައް ކުރުމަށް ބޭނުންވާ ފަރާތްތަކަށް ވަރަށް ބޭނުންތެރި ތަނަކަށް ކަމަށެވެ.
މި ލައިބްރަރީ ވެގެންދާނީ އިސްލާމީ ދިރާސާތަށް ކުރަާ ފަރާތްތަކަށް ވަރަށް ހިތްގައިމު މާހައުލަކަށް
މިނިސްޓަރު ޝަހީމް ވިދާޅުވިއެވެ
މާލޭގެ އިތުރުން ރާއްޖޭގެ އެކިކަންކޮޅުތަކުގައި ޤާއިމްކޮށްފައިހުރި އަދި މިހާރު އިމާރާތްކުރަމުންދާ އިސްލާމީ މަރުކަޒުތަކުގައި އިސްލާމީ ކުތުބުޚާނާ ޤާއިމްކުރުމަކީ ރައީސް ޑރ. މުޙައްމަދު މުޢިއްޒުގެ ރިޔާސީ ވަޢުދެކެވެ.
އެކިކަންކޮޅުތަކުގައި ޤާއިމްކޮށްފައިވާ އިސްލާމީ މަރުކަޒުތަކުގައި އިސްލާމީ ލައިބްރަރިތައް ޤާއިމްކުރުމަށް ބޭނުންވާ ފޮތްތައް ބޭރު ޤައުމެއްގެ ޔުނިވާސިޓީއަކުން ހަދިޔާ ކުރުމަށް ވަނީ ނިންމާފައެވެ. މިކަމާ ގުޅޭގޮތުން ވަޒީރު ޑރ. ޝަހީމް ވިދާޅުވީ، ހއ. ދިއްދޫ އިސްލާމިކް ސެންޓަރ ލައިބްރަރީއާއި ރ. އުނގޫފާރު އިސްލާމިކް ސެންޓަރ ލައިބްރަރީއާއި ތިނަދޫ ސިޓީ އިސްލާމިކް ސެންޓަރ ލައިބްރަރީއާއި އައްޑޫ އިސްލާމިކް ސެންޓަރ ލައިބްރަރީގެ އިތުރުން އަތޮޅުތަކުގައި ޤާއިމު ކުރެވޭ އެހެނިހެން އިސްލާމީ ލައިބްރަރީތަކަށް ބޭނުންވާ ފޮތްތައް އެކުވެރި ޤައުމެެއްގެ ޔުނިވަރސިޓީއަކުން ދޭ ގޮތަށް ހަމަޖެހިފައިވާކަމަށެވެ. އެގޮތުން އެތަނުން 60 ހާސް ފޮތް ލިބޭނެ ކަމަށް އަންގާފައިވާކަން ވަޒީރު ފާހަގަކުރެއްވިއެވެ.
އިސްލާމީ ކުތުބުހާނާގައި ގިނަ އަދަދެއްގެ ފޮތް ހިމެނޭއިރު، މި ލައިބްރަރީން ސިޔަރަތާއި، ހުކުރު ހުތުބާފަދަ އެތައް މައުލޫތަކެއްގެ މައްޗަށް ލިޔެފައިހުރި ފޮތް ހުންނާނޭކަމަށް އިސްލާމީ ކަންތައްތަކާ ބެހޭ ވުޒާރާއިން ބުނެއެވެ.
Advertisement
This content is created and paid for by advertisers and does not involve Voice Journalists
