ދިވެހިންގެ ސިއްޙީ ކަންކަމުގައި އެހީތެރިކަން ފޯރު ކޮއްދެއްވަމުން އައި ޢަބްދުލްކަރީމް އާދަމް ( ކަރީމްބެ) އަވަހާރަވެއްޖެއެވެ.

އުމުރުން 80 އަހަރުގައި ކަރީމްބެ އަވަހާރަވީ ރޭގެ ވަގުތެއްގައެވެ. ވޮއިސްއަށް މައުލޫމާތު ލިބިފައިވާގޮތުގައި ކަރީމްބެ ބަލިވެ އުޅުއްވާތާ ދުވަސްތަކެއްފަހުންނެވެ. ކަރީމްބެގެ ކަށުނަމާދު ބާއްވަން ހަމަޖެހިފައި ވަނީ މިއަދު އަސުރު ނަމާދަށް ފަހު އިސްލާމީ މަރުކަޒުގައެވެ.  

ކަރީމްބެގެ ސިއްހީ ހިދުމަތަށް ބަލާއިރު، އެންމެ ފުރަތަމަ އެ ދާއިރާއަށް ނިކުތީ 1961 ވަނަ އަހަރު ހެލްތް އެސިސްޓެންޓް އެެއްގެ ވަޒީފާއިންނެވެ. އެއަށްފަހު ކަރީމްބެ ވަނީ މެދުނުކެނޑި 47 އަހަރަށް ވުރެ ގިނަ ދުވަހު އެދާއިރާގައި ހިދުމަތްކުރައްވާފައެވެ. ކަރީމްބެ މަސަްކަތުން ރިޓަޔަރކުރީ 2009 ވަނަ އަހަރުއެވެ.

ކުރީގެ ރައީސް އިބްރާހީމް މުޙައްމަދު ޞާލިޙްގެ ވެރިކަމުގައި ކަރީމްބެއަށް ވަނީ ދިވެހި ދައުލަތައް ހިދުމަތް ކޮއްދެއްވުމުގެ އިނާމު ދެއްވާފައެވެ.  

ކަރީމްބެގެ ހިދުމަތުގައި އެންމެ ފާހަގަކޮށްލެވެނީ އަތޮޅު ތަކުގައި ހުންނަވައިގެން ޓީބީއާއި ފައިލޭރިއާ ފަދަ ބޮޑެތި ބަލިތަކަށް ފަރުވާ ކުރެއްވުމަށް ކުރެއްވި މަސައްކަތްޕުޅެވެ. އެގޮތުން ބޯން ބޭނުން ކުރާ ފެން ޓެސްޓް ކުރުން ފަދަ ކަން ކަމުގައި ކަރީމްބެ އުޅުއްވިއިރު،  ރާއްޖެ އަށް އެތެރެ ކުރާ ބޭސްތައް ޓެސްޓް ކޮށް އިމްޕޯޓް ކުރުމުގެ ހުއްދަ ދެއްވުމުގައި ވެސް އުޅުއްވިއެވެ. ރަސްމީ ގަޑި ތަކުގެ އިތުރުން ނުރަސްމީ ގަޑި ތަކުގައި ވެސް ކަރީންބެ ވަނީ ދުވަސްވީ ބަލި މީހުން އަށް ވަރުވާ ކުރެއްވުމުގައި ވަގުތުތައް ހޭދަ ކުރައްވާފަ އެވެ.