ހދ. ނާވައިދޫ ބަނދަރުގެ މަސައްކަތް ކަނޑައެޅިފައިވާ ތާވަލާ އެއްގޮތަށް ބާރު ސްޕީޑްގައި ކުރިއަށްދާކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ ލިމިޓެޑް (އެމްޓީސީސީ) އިން ބުނެފި އެވެ.
މި މަޝްރޫއު އެމްޓީސީސީއާއި ހަވާލުކޮށްފައިވަނީ 2023 ވަނަ އަހަރުގެ ޖަނަވަރީ މަހުގެ 16 ވަަނަ ދުވަހު އެވެ. އެމްޓީސީސީން އެކްސްގައި ހިއްސާކޮށްފައިވާ ޕޯސްޓެއްގައި ބުނެފައިވަނީ ނަވައިދޫ ބަނދަރު މަރާމާތު ކުރުމުގެ މަސައްކަތުގެ ދަށުން މިވަގުތު ކުރިއަށްދަނީ ބަނދަރުގެ ޕޭވްމަންޓް ހެދުމުގެ މަސައްކަތްކަަމަށެވެ.
މި މަޝްރޫއުގެ ދަށުން، 231 މީޓަރުގެ އެއްގަމު ތޮށި ލުމާއި، 73 މީޓަރުގެ ރިވެޓްމަންޓް ޖެހުމާއި، 290 މީޓަރުގެ ސަރަހައްދެއްގައި ބޭރުތޮށިޖެހުމަށް ވަނީ ނިންމާފައެވެ. ނާވައިދޫ ބަނދަރުގެ މަސައްކަތް ނިމޭއިރު ބަނދަރު ބައްތިއާއި، މަގު ބައްތީގެ އިތުރުން ބަނދަރުގެ ޕޭވްމަންޓް ހެދުމުގެ މަސައްކަތްވެސް މި މަޝްރޫއުގެ ދަށުން ކުރުމަށް ވަނީ ހަމަޖެހިފަ އެވެ.
މި މަޝްރޫއު އަށް ޖުމުލަ 51.3 މިލިއަން ރުފިޔާ ޚަރަދުވާނެކަމަށް އެމްޓީސީސީން ބުނެ އެވެ.
ސަރުކާރުން އެމްޓީސީސީއާ މި މަސައްކަތް ހަވާލުކޮށްފައިވަނީ 15 މަސް ދުވަހުގެ ތެރޭގައި ނިންމާ ގޮތަށެވެ. މި މަސައްކަތުގެ 36 އިންސައްތަ މިހާރު ވަނީ ނިމިފަ އެވެ.
Advertisement
This content is created and paid for by advertisers and does not involve Voice Journalists
