އެއްގޮތަކުން ބަލާއިރު، ދައިރާގެ ތަރައްޤީހގެ ކަންކަން ކުރިއަށްގެންދިއުމުގައި އިދިކޮޅު އެމްޑީޕީއަށް ނިސްބަތްވެ ވަޑައިގަންނަވާ މެމްބަރުން މާ ރަނގަޅުކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް ޑރ.މުއިއްޒު ނ.އަތޮޅަށް ކުރައްވަމުން ގެންދަވާ ޒިޔާރަތުގައި މިއަދު ވަނީ ފޮއްދުއަށް ވަޑައިގެން އެރަށު ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ވިދާޅުވީ، ރައްޔިތުން އިންތިހާބުކޮށްފައި ހުންނަ މަންދޫބެއްކަމުގައި ވާނަމަ، ހިޔާލުތަފާތުވުން އެއްވެސްވަރަކަށް ރައްޔިތުންގެ ކުރިމައްޗަށް ގެނެސްގެން ނުވާނޭކަމަށެވެ. އަދި މިކަމުގައި ހުރިހާ އެންމެންވެސް މަސައްކަތްކުރަން ޖެހޭނީ ޕްރޮފެޝަނަލްކޮށް ޒިންމާދާރުކޮށް ކަމަށް ރައީސް ވިދާޅުވިއެވެ.
ނ.އަތޮޅު ވެލިދޫ ދައިރާގެ ތަރައްޤީގެ ކަންކަން ކުރިއަށްގެންދިއުމަށް ބަލާއިރު، އެދާއިރާ ތަމްސީލްކުރައްވާ މަޖިލީހުގެ މެމްބަރުގެ ފަރާތުން ސަރުކާރަށް ހުރަސްތައް ކުރިމަތިކުރުވަމުންދާކަން ރައީސްގެ ވާހަކަފުޅުގައި ވިދާޅުވިއެވެ.
ރައީސް ވިދާޅުވީ ކަންކަން ހިނގަމުންދާގޮތަށް ބަލާއިރު އެމްޑީޕީގެ މެމްބަރުން އެއްގޮތަކުން މާ ރަނގަޅުކަމަށެވެ. އެގޮތުން އެބޭފުޅުންގެ ފަރާތުން ސަރުކާރުގެ މަސައްކަތްތަކަށް ހުރަސްއެޅުއްވުންފަދަ ކަންކަން ފެނިގެން ނުދާކަން ރައީސް ވަނީ ފާހަގަކުރައްވާފައެވެ.
ހަގީގަތުގައި އެމްޑީޕީގެ އެމްޕީސްގެ ކިބައިންވެސް އެއްގޮތަކުން މާ ރަނގަޅު ސަރުކާރަށް ކަންކަން އޮންނަގޮތް. އެއީ އެބޭފުޅުން އެއްވެސްވަރަކަށް ނުބެހޭ ކަންކަމާ. އެބޭފުޅުންގެ ދާއިރާގެ ކަމެއްގައި އަދި މިއަދާހަމަޔަށް އާއިރު އަޅުގަނޑާ ހަމަޔަކަށް ނާދޭ. އެހެންވީމައި އެއްގޮތަކުން ކަންކަންކުރަން މާ ފަސޭހަ
ރައީސް ޑރ.މުއިއްޒު ވިދާޅުވިއެވެ
ރައީސް ވިދާޅުވީ ފޮއްދޫ ހިމެނޭ ދާއިރާގެ މަޖިލީހުގެ މެމްބަރުގެ ކިބައިން ކަންކަމުގައި އެހީތެރިކަން ނުދޭތަނުގައި ހުރަސްތައް ކުރިމަތިކުރާކަމީ ދެރަކަމެއްކަމަށެވެ.
ރައްޔިތުން މަޖިލީހުގައި ވެލިދޫ ދައިރާ ތަމްސީލްކުރައްވަނީ އެމްޑީއޭގެ މެމްބަރު މުހައްމަދު އައްބާސްއެވެ. ބަދަލު ދިނުމަކާ ނުލައި ދަނޑުވެރިކަމަށް ސަން ސިޔާމަށް ދޫކޮށްފައި އޮތް މިނާވަރުއަތުލަން ނޯޓިސް ފޮނުވި މައްސަލާގައި ސިޔާމް ނިސްބަތްވާ އެމްޑީއޭ އާއި ސަރުކާރާ ދެމެދު ގުޅުންވަނީ ވަރަށް ގޯސްވެފައެވެ. އެގްރިކަލްޗާ މިނިސްޓްރީން އެރަށް އަތުލަން ނިންމީ އެއްބަސްވުމުގައި ބަޔާންކޮށްފައިވާގޮތަށް ރަށުގައި މަސައްކަތްތައް ނުކުރުމެވެ. މި މައްސަލާގައި ސަރުކާރާއި ރައީސް ޑރ.މުއިއްޒަށް އެންމެބޮޑު ފާޑުކިއުމެއް އަމާޒުކޮށްފައިވަނީ، އެމްޑީއޭގެ ނައިބު ރައީސް މުހައްމަދު އައްބާސް އެވެ.
ފޮއްދޫ ޖަލްސާގައި ރައީސް ވިދާޅުވީ ބައެއް މެމްބަރުންގެ އަމަލުތައް އެހެން ހުރިނަމަވެސް ކަންބޮޑުނުވާކަމަށާއި، ރައްޔިތުންނަށް ހިދުމަތްކުރުމުގައި އެމަނިކުފާނު ވަޑައިގަންނަވާނީ ސީދާ ރައްޔިތުން ގާތަށް، އަދި އެކަމައިގެން ކުރިއަށްކަމަށެވެ.
Advertisement
This content is created and paid for by advertisers and does not involve Voice Journalists
