ދިވެހިރާއްޖޭގެ މިނިވަންކަމަށް 60 އަހަރު ފުރުން ފާހަގަކުރުމުގެ އިހުތިފާލުތައް ޝަރަފުވެރިކޮށްދެއްވުމަށް އިންޑިޔާގެ ބޮޑުވަޒީރު ނަރެންދުރަަ މޯދީއަށް ދައުވަތު ދެއްވީތީ ރައީސުލްޖުމްހޫރިއްޔާ ޑރ.މުޙައްމަދު މުޢިއްޒަށް ކުރީގެ ރައީސް އިބްރާހީމް މުހައްމަދު ސޯލިހު މަރުހަބާ ވިދާޅުވެއްޖެ އެވެ. 

މޯދީ ރާއްޖެއަށް ވަޑައިގަންނަވާތީ ރައީސް ސޯލިހު މިއަދު ނެރުއްވި ބަޔާނެއްގައި ވިދާޅުވެފައިވަނީ ޖުލައި 25 ވަނަ ދުވަހު ފުރަމާނަ ދަތުރުފުޅެއްގައި މޯދީ ރާއްޖެއަށް ވަޑައިގަންނަވާތީ އެމަނިކުފާނަށް މަރުހަބާ ދެންނެވުމާއެކު، ހިތްޕުޅުހަމަޖެހިވަޑައިގަންނަވާ ފަދަ ޒިޔާރަތަކަށް މޯދީގެ ޒިޔާރަތްވުމަށް އެދިވަޑައިގަންނަވާ ކަމަށެވެ. 

އަދި ރާއްޖޭގެ މިނިވަންކަމަށް 60 އަހަރު ފުރުން ފާހަގަކުރުމަށް ބާއްވާ ރަސްމީ އިހުތިފާލުތައް ޝަރަފުވެރިކޮށްދެއްވުމުގެ ދައުވަތު މޯދީއަށް އެރުއްވީތީ ސޯލިހުވަނީ ރައީސް ޑރ.މުއިއްޒަށް މަރުހަބާ ވިދާޅުވެފައެވެ. 

އަދި މޯދީގެ ދަތުރުފުޅަކީ ރާއްޖެއާއި އިންޑިޔާގެ މެދުގައި އެކި ދާއިރާތަކުން ގާއިމުވެފައި އޮތް، ދެމިގެންދަނިވި ގުޅުމުގެ ވަރުގަދަ ދަލީލެއް ކަމުގައި ސޯލިހު ވިދާޅުވިއެވެ. އިތުރަށް އެމަނިކުފާނު ވިދާޅުވީ މިހައި ދަތި ގޮންޖެހުން ބޮޑު ދުވަސްވަރެއްގައި މިފަދަ މަތީ ފަންތީގެ ދަތުރުފުޅެއް ރާއްޖެއަށް މޯދީ ކުރެއްވުމަކީ، އިންޑިޔާއިން ދިވެހި ރައްޔިތުންނާމެދު ބާއްވާ ފުން އިހުތިރާމު ދައްކުވައިދޭ ކަމެއް ކަމަށެވެ. 

"މި ދަތުރުފުޅުން ސާބިތުކޮށްދެނީ ސިޔާސީ ގޮތުން ރުޅިއެރުވި ނަމަވެސް އަބަދުވެސް އިންޑިޔާއަކީ ރާއްޖެއަށް ބަރޯސާވެވޭ ޒަމާނާއެކު އިމްތިހާނުވެ އިތުބާރު ލިބިފައިވާ ރަހުމަތްތެރިއެއްކަން،" ސޯލިހުގެ ބަޔާނުގައި ވިދާޅުވެފައިވެއެވެ. 

ސޯލިހު އިތުރަށް ވިދާޅުވީ މޯދީގެ ދަތުރުފުޅަކީ ފުރިހަމަ ކާމިޔާބު ދަތުރުފުޅަކަށްވާނެ ކަމުގެ ޔަގީންކަން އެމަނިކުފާނަށް އެބައޮތް ކަމަށާއި، މި ދަތުރުފުޅުގެ ސަބަބުން ދިވެހިރާއްޖެއާއި އިންޑިޔާގެ ގުޅުން އިތުރު އުސްމިންތަކަކަށް އުފުލިގެންދާނެ ކަމަށް ޔަގީންކުރައްވާ ކަމަށެވެ. 

ފުރަމާނަ ދަތުރުފުޅެއްގައި މޯދީ ރާއްޖެއަށް ޖުލައި 25 ވަނަ ދުވަހު ވަޑައިގަންނަވާއިރު، މިއީ މޯދީ ރާއްޖެއަށް ވަޑައިގަންނަވާ ތިންވަނަ ފަހަރެވެ. އެންމެ ފުރަތަމަ މޯދީ ރާއްޖެއަށް ވަޑައިގަތީ ރައީސް ސޯލިހު ރައީސުލްޖުމްހޫރިއްޔާގެ މަގާމުގެ ހުވައިކުރެއްވުމުގެ ރަސްމިއްޔާތުގައި ބައިވެރިވެވަޑައިގަތުމަށެވެ. 

އޭގެ ފަހުން 2019 ވަނަ އަހަރުގެ ޖޫން މަހުގެ ތެރޭގައި މޯދީ ރާއްޖެއަށް ރަސްމީ ދަތުރުފުޅެއް ކުރެއްވިއެވެ. އެ ދަތުރުފުޅުގައި މުހިއްމު ބައެއް މަޝްރޫއުތަކުގެ އެއްބަސްވުމުގައި ސޮއިކުރެވިގެންދިޔައެވެ. އަދި ރާއްޖެއިން ބޭރުގެ ފަރާތްތަކަށް އަރުވާ އެންމެ މަތީ އިއްޒަތް ކަމުގައިވާ "ނިޝާން އިއްޒުއްދީން އިއްޒަތުގެ ވެރިކަމުގެ ލަގަބު" އަރުވާފައިވެއެވެ.