އިދިކޮޅު އެމްޑީޕީއާއި އެހެނިހެން ބައެއް ސިޔާސީ ޕާޓީތަކުގެ ލީޑަރުންނާ އިންޑިޔާގެ ބޮޑުވަޒީރު ނަރެންދުރަ މޯދީ ބައްދަލުކުރައްވައިފިއެވެ.
ރައީސުލްޖުމްހޫރިއްޔާ ޑރ.މުޙައްމަދު މުޢިއްޒު ދެއްވި ރަސްމީ ދައުވަތުފުޅަކަށް އިއްޔެއާއި މިއަދު ފުރަމާނަ ދަތުރުފުޅެއްގައި ރާއްޖެއަށް ވަޑައިގެން ހުންނެވި މޯދީ ރާއްޖޭގެ ސިޔާސީ ޕާޓީތަކުގެ ލީޑަރުންނާ ބައްދަލުކުރެއްވީ އެމަނިކުފާނު ހުންނެވި ކުރުނބާ އައިލެންޑް ރިސޯޓުގައެވެ.
މޯދީވަނީ އިދިކޮޅު އެމްޑީޕީގެ ލީޑާޝިޕުގެ ބޭފުޅުންގެ ތެރެއިން އެ ޕާޓީގެ ޗެއާޕާސަން ފައްޔާޒު އިސްމާއީލާއި، އެ ޕާޓީގެ ރައީސް އަބްދުﷲ ޝާހިދާ ބައްދަލުކުރައްވާފއެވެ. އަދި އެމްޑީޕީއާ އަލަށް ގުޅިވަޑައިގެންނެވި ރައީސް މުހައްމަދު ނަޝީދާ ބައްދަލުކުރައްވާފައިވެއެވެ.
އޭގެ އިތުރަށް ސަރުކާރު އިއްތިހާދުގައި ހިމެނޭ ޖުމްހޫރީ ޕާޓީގެ ލީޑަރު އަދި މާމިގިލީ ދާއިރާގެ މެންަބަރު ގާސިމް އިބްރާހީމާއި، އެ ޕާޓީގެ ވެރިންނާއި، މޯލްޑިވްސް ނޭޝަނަލް ޕާޓީގެ ލީޑަރު ކާނަލް ރިޓަޔާޑް މުޙައްމަދު ނާޒިމާއި، އެ ޕާޓީގެ ލީޑަރުންނާއި، މޯލްޑިވްސް ޑިމޮކްރެޓިކް އެލައެންސްގެ ރައީސް އަދި މީދޫ ދާއިރާގެ މެންބަރު އަހްމަދު ސިޔާމް މުހައްމަދާ މޯދީ ބައްދަލުކުރެއްވިއެވެ.
އެ ބައްދަލަުވުންތަކަށްފަހު އެކްސްގައި ކުރެއްވި ޕޯސްޓެއްގައި މޯދީ ވިދާޅުވީ ސިޔާސީ ދާއިރާގެ ތަފާތު ޕާޓީތަކުގެ ލީޑަރުން އެމަނިކުފާނާ ބައްދަލުކުރެއްވުމަކީ ރާއްޖެއާއި އިންޑިޔާގެ މެދުގައި އޮތް ތާރީހީ ގުޅުމަށް ދެ ފަރާތުގެ ފުރިހަމަ ތާއީދު އޮތްކަން ހާމަވާ ކަމެއް ކަމަށެވެ.
މޯދީ ފާހަގަކުރެއްވި ގޮތުގައި ރާއްޖެ ގުޅުމަށް އެންމެ ބޮޑު އެހީއެއްވަނީ ދެ ގައުމުގެ މެދުގައި އޮތް ހިއްސާވަނިވި އަސާސްތަކުންނެވެ.
މޯދީ ރާއްޖެއަށް ކުރައްވަމުންދާ ދަތުރުފުޅުގައި އިންޑިޔާއާ ރާއްޖެއާ ދެމެދު މުހިއްމު އަށް އެއްބަސްވުމެއްގައި ސޮއިކޮށްފައިވެއެވެ. އޭގެ ތެރޭގައި ތަރައްގީގެ މަޝްރޫއުތައް ހިންގުމަށް 565 މިލިއަން ޑޮލަރުގެ ލައިން އޮފް ކްރެޑިޓެއް ހަމަޖެއްސުމާއި، މިނިވަން ވިޔަފާރީގެ އެއްބަސްވުމާ ގުޅޭ ރަސްމީ މަޝްވަރާތައް ފެށުމުގެ ފަހުމުނާމާ ހިމެނެއެވެ.
Advertisement
This content is created and paid for by advertisers and does not involve Voice Journalists
