ގެދޮރުވެރިޔާ ސްކީމުގެ ދަށުން ތަރައްޤީކުރަމުންދާ ފްލެޓްގައި ކޮންޓްރެކްޓަރާއެކު ކުރުމަށް އެއްބަސްވި ބައެއް ކަންކަން އެމްޑީޕީ ސަރުކާރުން އުނިކުރިކަމަށް އެފްޑީސީން ބުނި ވާހަކަތައް އެމްޑީޕީން ދޮގުކޮށްފިއެވެ.
ފަހިދިރިއުޅުން ކޯޕަރޭޝަނުގެ މެނޭޖިންގ ޑިރެކްޓަރު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، އެމްޑީޕީގެ ސަރުކާރުން ފްލެޓްތަކުގެ ސެކިއުރެޓީ ސިސްޓަމްގެ އިތުރުން އިންޓަރނެޓާއި، ކުނިނައްތާލާ ނިޒާމްގެ މަސައްކަތާއި، ގާބޭޖް ޝޫޓް ފަދަ ހިދުމަތްތައް އެއްބަސްވުމުން އުނިކޮށްފައިވާތީވެ މިހާރު އެ މަސައްކަތް ކުރަމުންގެންދާކަމަށެވެ.
ނަމަވެސް ހަމްދާނުގެ މި ވާހަކަތަކާ ގުޅޭގޮތުން އެމްޑީޕީން ނެރުނު ބަޔާނުގައި ވަނީ ހަމްދާނު ފާހަގަކޮށްފައިވާ ވާހަކަތައް ދޮގުކޮށް އެކަމުގައި ރައީސް ސޯލިހުގެ ސަރުކާރުން އަމަލުކުރިގޮތް ސާފްކޮށްދީފައެވެ.
އެމްޑީޕީން ނެރުނު ބަޔާނުގައި ބުނީ، އެފްޑީސީގެ އެމްޑީ ފާހަގަކޮށްފައިވާ ކަންކަމަކީ އެ މަސައްކަތްތަކަކީ ޓަވަރުތަކުގެ މަސައްކަތް ކޮންޓްރެކްޓަރު ނިންމުމާ ގުޅިގެން ސަރުކާރާއި އެފްޑީސީން ކުރަންޖެހޭ މަސައްކަތްތައް ކަމަށެވެ. އެކަންކަން ކުރުމަށް ތައްޔާރުވުމުގެ ގޮތުން 2022 ވަނަ އަހަރުން ފެށިގެން އެކިއެކި މަޝްވަރާ ބައްދަލުވުންތައ ްބާއްވައި އެކަން ކުރާނެގޮތް ރާވައި، އެކަންކުރާނެ ފަރާތްތައްވެސް ކަނޑައަޅާފައިވާނޭކަމަށެ. އަދި ހަމައެހެންމެ އެ މަސައްކަތްތަކަށް ދާނޭ ހަރަދު ސަރުކާރުން ކުރުމަށް ނިންމާފައިވާނޭކަމަށްވެސް އެމްޑީޕީގެ ބަޔާނުގައި ވަނީ ބުނެފައެވެ.
އެމްޑީޕީގެ ބަޔާނުގައި ބުނީ، ކަމެއް އުނިކުރެވޭނީ އެއްބަސްވުމުގައި އެ މަސައްކަތްތައް ކުރުމަށް ހިމެނިފައިވާނަމަ ކަމަށާއި، ކުރީ ސަރުކާރުން އެއްބަސްވުމުގައި ހިމެނޭ އެކަންކަން އުނިކުރިކަމަށް ދައްކަމުންގެންދާ އެ ވާހަކަތަކަކީ ކަނޑައެޅިގެން ދޮގެއްކަމަށް އެމްޑީޕީން ބުންޏެވެ.
އެމްޑީޕީގެ ބަޔާނުގައި ވަނީ އެ ވާހަކަތައް އެގޮތަށް ފަތުރަމުންދަނީ ސަރުކާރުން އެކަންކަން ކުރުމުގެ ގާބިލުކަން ނެތުމުންކަމަށާއި، ފްލެޓްތަކުގައި މީހުންނަށް ދިރިއުޅުމަށް ބޭނުންވާ ވަސީލަތްތައް ގާއިމްކުރުމުގެ ޒިންމާއިން ރެކިގަތުމުގެ ބަދަލުގައި ޒިންމާދާރުކަމައިގެން އެކަންކަން ކުރަން ޖެހޭކަމަށާއި، އަސާސީ އެކަންކަން ފުރިހަމަކޮށްދީ ނިންމުމަށް ގޮވާލާކަމަށެވެ.
ސަރުކާރުން މިހާރު ދަނީ ފްލެޓްތައް ލިބުނު ފަރާތްތަކާ އެއްބަސްވުންތައް ގާއިމްކުރުމުެގ މަސައްކަތް ކުރަމުންނެވެ. މިހާތަނަށް 100 އަށްވުރެ ގިަނ މީހުންނާ އެއްބަސްވުންތައް ހަދާފައިވާއިރު، މި މަސައްކަތް އަންނަ ސެޕްޓެމްބަރުމަހުެގ ނިޔަލަށް ކުރިއަށްގެންދިއުމަށް ވަނީ ނިންމާފައެވެ.
Advertisement
This content is created and paid for by advertisers and does not involve Voice Journalists
