ގަޕޯ ސަރުކާރަށް؛ އިހުލާސްތެރިކަމެއް ހުރިނަމަ އެމްޑީޕީ ސަރުކާރުގެ ހިޔާނާތްތައް ބަލައިދީ
އަދުގެ ސަރުކާރުގެ އިހްލާސްތެރިކަމެއް ހުރިނަމަ އެމްޑީޕީ ސަރުކާރުން ހިންގިކަމަށް ބުނާ ހިޔާނާތުގެ މައްސަލަތައް ބަލައިދިނުމަށް ރައްޔިތުން މަޖިލީހުގެ ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ މިއަދު ގޮވާލައްވައިފިއެވެ.
މަޖިލީހުގައި މިއަދު ވާހަކަދައްކަވަމުން ޣަފޫރު ވިދާޅުވީ، މި ސަރުކާރުން އެމްޑީޕީ ވެރިކަމުގައި ހިންގާފައިވާ ހިޔާނާތުގެ ވާހަކަ ދައްކާއިރު، ސަރުކާރުގެ އިހްލާސްތެރިކަމެއް އޮތްނަމަ އެ މައްސަލަތައް ބަލައި ފިޔަވަޅު އަޅަންޖެހޭކަމެށެވެ. ޣަފޫރު ވިދާޅުވީ ސަރުކާރުތަކުން ހިޔާނާތުގެ ވާހަކަ ދައްކާއިރު، އެފަދަ މައްސަލަތައް އެއްވެސް ސަރުކާރަކަށް ބަލައި ރައްޔިތުންގެ ގެއްލުނު ހައްގުތައް ހޯދައިދެވިފައިނުވާކަމަށެވެ.
ވައްކަމުގެ ތެރޭގައި މުޅި ޤައުމު ފޯވެފައި އޮތްކަން ފާހަގަކުރައްވައި ޣަފޫރު ވިދާޅުވީ، ރައްޔިތުން ސަރުކާރު ހިންގަން ހަވާލުކުރަނީ ބައިތުލްމާލުގައި ހުންނަ ފައިސާ ވަގަށް ނެގުމަށް ނޫންކަމަށާއި، އެފަދަ ހިޔާނާތުގެ މައްސަލަތަކަށް ޝަރުއީ މަރުހަލާގެ ތެރެއިން ބެލެންޖެހޭކަމަށެވެ.
ގާނޫނުގެ މަތީގައިހުރި އެކަކުވެސް ހުންނާނެ. އެ ސަރުކާރެއް މި ސަރުކާރެއް ކިޔުމުގެ ބޭނުމެއް ނެތް އިއްޒަތްތެރި ރައީސް ފިޔަވަޅުއަޅާށޭ
ހަނިމާދޫ ދާއިރާގެ މެންބަރު އަބްދުލްޣަފޫރު މޫސާ ވިދާޅުވިއެވެ
ޣަފޫރު ވިދާޅުވީ ހިޔާނާތާ ވައްކަމުގެ މައްސަލަތަކުގައި މި ސަރުކާރުން ކުންފުނިތަކާއި މުއައްސަސާތަކުގެ ވެރިން ވަކިކުރަމުންދާއިރު، އެފަދަ މައްސަލަތަކުގައި ވަކިކުރާ މީހުންނާމެދު އަދި މިހާތަނަށް ފިޔަވަޅެއް އެޅިފައި ނުވާކަމަށެވެ. އޭގެ ބަދަލުގައި ފެނިެގންދަނީ މަގާމުތަކުން މީހުން ބަދަލުކުރަމުންދާ ތަންކަމަށް ޢަފޫރު ވިދާޅުވިއެވެ.
މަޖިލީހުގެ ތަޅުމުގައި ވާހަކަދައްކަވަމުން ޢަފޫރު މިއަދު ވަނީ ސަރުކާރުތަކުގެ ބައެއް ކުންފުނިތަކަށް ވަރަށްބޮޑަށް ފާޑުވިދާޅުވެ، ބައެއް ތަންތަނުން ހިޔާނާތްތައް ހިންގަމުންދިޔަނަމަވެސް އެކަންކަން ހުއްޓުވުމަށް ކަމާބެހޭ ފަރާތްތަކުން އަޅަންޖެހޭ ފިޔަވަޅުތައް އަޅަމުން ނުދާކަން ފާހަގަކުރައްވާފައެވެ.
Advertisement
This content is created and paid for by advertisers and does not involve Voice Journalists
