އީޕީއޭގެ ނަން, އެންވަޔަރަންމަންޓަލް ރެގިއުލޭޓަރީ އޮތޯރިޓީ އަށް ބަދަލުކޮށްފި
އެންވަޔަރަންމަންޓަލް ޕްރޮޓެކްޝަން އެޖެންސީ, އީޕީއޭގެ ނަން، ރައީސުލްޖުމްހޫރިއްޔާ ޑރ.މުހައްމަދު މުއިއްޒު މިއަދު "އެންވަޔަރަންމަންޓަލް ރެގިއުލޭޓަރީ އޮތޯރިޓީ" އަށް މިއަދު ބަދަލުކުރައްވައިފިއެވެ.
ރައީސް އޮފީހުން ބުނީ، މި ބަދަލު ގެނެސްފައިވަނީ، ޤާނޫނުއަސާސީގެ 116 ވަނަ މާއްދާގެ (ހ) އިން ރައީސުލްޖުމްހޫރިއްޔާ އަށް ލިބިވަޑައިގަންނަވާ އިޚްތިޔާރުގެ ދަށުންނެވެ. މި ބަދަލުގެ ދަށުން ރައީސުލްޖުމްހޫރިއްޔާ ވަނީ އީޕީއޭ މިހާތަނަށް ހިނގަމުން އައި ހައިސިއްޔަތުން ގަވަރނިންގ ބޯޑެއްގެ ލަފާގެ ދަށުން ހިންގާ އިދާރާއެއްގެ ބަދަލުގައި، ސީދާ އެ މިނިސްޓްރީގެ ދަށުން ހިނގަމުންދާ އިދާރާއެއްގެ ގޮތުގައި ހަމަޖައްސަވާފައެވެ.
މި ބަދަލު ގެންނެވީ، އީޕީއޭ މިހާތަނަށް އެ އިދާރާއިން ކުރަމުންގެންދާ މައިގަނޑު މަސައްކަތްތަކަކީ، ދިވެހިރާއްޖޭގެ ތިމާވެށްޓާބެހޭ ކަންކަން ރެގިއުލޭޓްކުރުމާ ގުޅުންހުރި މަސައްކަތްތަކެއް ކަމަށްވާތީ، އެ އިދާރާއިން ކުރަމުންގެންދާ މައިގަނޑު މަސައްކަތްތަކާ ވީހާވެސް ގުޅުންހުރި ނަމެއް ހަމަޖެއްސުމުގެ އިތުރުން، އެ އިދާރާގެ މަސައްކަތްތައް މިހާރަށްވުރެ ހަރުދަނާކޮށް ހަލުއިކުރުމުގެ ބޭނުމުގައިކަމަށް ރައީސް އޮފީހުން ބުނެއެވެ.
އީޕީއޭ ނަމަށް ބަދަލު ގެނައި ނަމަވެސް އީއައިއޭ ހެދުމުގެ ކަންކަމާއި އެނޫންވެސް ކަންކަން ކުރުމުގައި އީޕީއޭއަށް ލިބިފައި އޮތް ހައިސިއްޔަތު ގެއްލިގެން ނުދާނޭކަމަށް ތިމާވެއްޓާބެހޭ ވުޒާރާއިން ބުނެއެވެ.
Advertisement
This content is created and paid for by advertisers and does not involve Voice Journalists
