ޤައުމީ ތަރައްޤީގެ މަޝްރޫޢުތައް ކުރިއަށްގެންދިއުމުގައި ލުއިވާނެހެން ތިމާވެށްޓަށް އަސަރު ފޯރާނެ މިންވަރު ބަޔާންކުރާ ރިޕޯޓް، އީއައިއޭ ހެދުމާ ބެހޭ ޤަވާއިދަށް އިސްލާހް ގެނެސްފިއެވެ.
ތިމާވެށީގެ އެއްވެސް ކަމަކަށް ބަދަލު އަންނަފަދަ މަޝްރޫޢުއެއް ނުވަތަ މަސައްކަތެއް ކުރާނަމަ އެންވަޔަރަމެންޓަލް އެސެސްމަންޓް (އީއައިއޭ) ރިޕޯޓް ތައްޔާރުކުރަން ގަވާއިދުގައި ބަޔާންކޮށްފައި ވެއެވެ. އަލަށް އިސްލާހްކުރި ގަވާއިދުގައިވާގޮތުން އީއައިއޭ ހެދުމުގެ މަރުހަލާ އަވަސްކުރެވޭނީ، ކެބިނެޓް ނުވަތަ ކެބިނެޓް ކޮމިޓިއަކުން އަވަސްކުރަންޖެހޭކަމަށް ކަނޑައަޅާ މަޝްރޫޢުތައް އެކަންޏެވެ.
މިކަމާ ގުޅޭގޮތުން ސަރުކާރުން ބުނެފައިވަނީ މި އިސްލާހް ގެނައުމުގެ ބޭނުމަކީ ސަރުކާރުން ރައްޔިތުންނަށް ފޯރުކޮށްދޭންޖެހޭ ހިދުމަތްތައް ދިނުމަށް ހިންގަންޖެހޭ ގައުމީ ތަރައްޤީގެ މަސްރޫޢުތައް ވީހާވެސް އަވަސްގޮތެއްގައި ކުރިއަށްގެންދަން ހުރި ކަންކަން ކުރުން ކަމަށެވެ. މިގޮތަށް އަވަސްކުރެވޭ މަސައްކަތްތައްވެސް ކުރިއަށްގެންދާނީ ތިމާވެއްޓަށް އަސަރު ފޯރާނެ މިންވަރު ބަޔާންކުރާ ރިޕޯޓް ހެދުމާބެހޭ ޤަވާއދުގެ ތެރެއިން އެ ރިޕޯޓް ހެދުމުގެ މަގްސަދުތަކުގެ ތެރެއިންކަމަށް ސަރުކާރުން ބުނެއެވެ. އަދި މިގޮތަށް އަވަސްކުރެވޭ މަޝްރޫޢުތަކަށް އީއައިއޭ ހަދަން ޖެހޭއިރު، އާއްމު އުސޫލުން ރިޕޯޓާއި އެއާ ގުޅޭގޮތުން އީޕީއޭއިން ނިންމާގޮތް އެތަނުގެ ވެބްސައިޓްގައި ޝާއިއު ކުރާނެއެވެ.
ތިމާވެއްޓާބެހޭ ވުޒާރާއިން ބުނީ، އަލަށް ގެނައި އިސްލާހަށް އަމަލުކުރެވޭނީ 3 އަހަރާއި 6 މަސްދުވަހުގެ މުއްދަތަކަށެވެ.
ސަރުކާރުން ވަނީ އީޕީއޭ ހިންގުން ހަރުދަނާ ކުރުމުގެ ގޮތުން އެތަނުގެރ ނަމަށް ބަދަލުގެނެސް އިދާރީގޮތުންވެސް ބައެއް ބަދަލުތައް ގެނެސްފައެވެ. ރައީސުލްޖުމްހޫރިއްޔާގެ އޮފީހުން މިއަދު ވަނީ އެންވަޔަރަންމަންޓަލް ޕްރޮޓެކްޝަން އެޖެންސީ, އީޕީއޭގެ ނަން، "އެންވަޔަރަންމަންޓަލް ރެގިއުލޭޓަރީ އޮތޯރިޓީ" އަށް ބަދަލުކޮށްފައެވެ.މި ބަދަލާއެކު ރައީސުލްޖުމްހޫރިއްޔާ އައްޔަނުކުރައްވާ ގަވަރނިން ބޯޑެއްގެ ދަށުން ހިންގާ ގޮތަށް އޮތުމުގެ ބަދަލުގައި މިހާރު އެ އޮތޯރިޓީ ހިންގުން ވަނީ ތިމާވެއްޓާބެހޭ ވުޒާރާގެ ދަށަށް ބަދަލުކޮށްފައެވެ.
Advertisement
This content is created and paid for by advertisers and does not involve Voice Journalists
