ބ.ހިތާދޫ ރައްޔިތުންނަށް އެރަށް ކައިރީ އޮންނަ ފަޅުރަށެއްކަމަށްވާ މާމަޑުއްވަރީ ހަވާލުކުރުމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ނިންމަވައިފިއެވެ.

ބ އަތޮޅުގެ ރަށްތަކަށް ކުރައްވަމުން ގެންދަވާ ދަތުރުފުޅުގައި މިއަދު އެންމެ ފަހު ރަށެއްގެ ގޮތުން ހިތާދޫއަށް ވަޑައިގެން އެރަށުގެ ރައްޔިތުންނާ ބައްދަލުކުރައްވައި ވާހަކަފުޅު ދައްކަވަމުން ރައީސް ވަނީ ހިތާދޫ ރައްޔިތުންނަށް މާމަޑުއްވަރީ ދެއްވާނޭކަން އިއުލާނުކުރައްވާފައެވެ.

މާމަޑުއްވަރިއަކީ މިހާރު ޓޫރިޒަމްގެ ބޭނުމަށް ޓޫރިޒަމް މިނިސްޓްރީން ބަޔަކަށް ދީފައިވާ ރަށެކެވެ. ނަމަވެސް އެއްބަސްވެފައިވާގޮތަށް އެރަށުގައި މަސައްކަތް ހިނގަމުން ނުދާކަމަށް ރައީސް ޑރ.މުއިއްޒު މިއަދު ވަނީ ވިދާޅުވެފައެވެ. 

ރައީސް ވިދާޅުވީ ހިތާދޫ ރައްޔިތުންނަށް މާމަޑުއްވަރީ ހަވާލުކުރުމުގެ ކަންކަން ޓޫރިޒަމް މިނިސްޓްރީ އާއި އެޓާނީ ޖެނެރަލްގެ އޮފީހުން ގުޅިގެން އެ މަސައްކަތް ކުރިއަށް ގެންދަވާނޭކަމަށާއި، އެކަން ނިމުނުހާ އަވަހަކަށް ހިތާދޫ ރައްޔިތުންނާ އެރަށް ހަވާލުކުރައްވާނޭކަމަށެވެ. ރައީސް ވިދާޅުވީ އުއްމީދުކުރަނީ ރައްޔިތުންނަށް މުއްސަނދިކަން ލިބޭނޭގޮތަށް މާމަޑުއްވަރި ބޭނުންކުރުންކަމަށާއި، އާއްމު ރައްޔިތުންގެ މުއްސަނދިކަން އިތުރުވުމަކީ އެމަނިކްފާނު އެންމެ ބޭނުންވެލައްވާ ގޮތްކަމަށެވެ. އެގޮތުން މާމަޑުއްވަރީ އާ ހަވާލުވާހިސާބުން މުޅި ހިތާދޫގެ ރައްޔިތުންނަށް ފައިދާވާ އުސޫލަކުން އެރަށް ބޭނުންކުރުމަކީ އެންމެ އެދޭގޮތްކަން ރައީސް ފާހަގަކުރެއްވިއެވެ.

މާމަޑުއްވަރީއަކީ މީގެ ކުރިންވެސް އިގްތިސާދީ މަސައްކަތަށް ކުއްޔަށްދީގެން އެރަށުން ސަރުކާރަށް ކުލި ނުލިބިގެން މައްސަލަ ބޮޑުވި ރަށެކެވެ. އެގޮތުން މީރާއިން ވަނީ 2011 މާމަޑުއްވަރިން ދައުލަތަށް ލިބެންޖެހޭ 5.9 މިލިއަން ރުފިޔާގެ މައްސަލާގައި އެރަށް ނެގި ކުންފުންޏާ ދެކޮޅަށް ސިވިލްކޯޓަށް މައްސަލައެއްވެސް ހުށަހަޅާފައެވެ.

މާމަޑުއްވަރީގެ ތާރީހަށް ބަލާއިރު އެރަށަކީ ސީދާ ހިތާދޫ ރައްޔިތުންނަށް ދައުލަތުން ފަތްލިޔެ ދީފައިވާ ރަށެއްކަމަށް ތާރީހީ ބޭފުޅުންގެ ލިޔުންތަކުން އެނގެއެވެ. އެފަދަ ބައެއް ލިޔުންތަކުން އެނގޭގޮތުގައި 1777 ވަނަ އަހަރު އަލްގާޒީ މުހައްމަދު މުހިއްބުއްދީން އުއްތަމަ ފަނޑިޔާރުގެ ޝަރީއަތުގެ މަޖްލީހުގައި ވަނީ މާމަޑުއްވަރިއަކީ ހިތާދޫ މީހުންގެ ވަގްފް ރަށެއްގެ ގޮތުގައި ކަނޑައަޅުއްވާފައެވެ. އެއީ އޭގެ ކުރިންވެސް އެރަށް އޮންނަނީ ހިތާދޫ މީހުންގެ މިލްކުވެރިކަމުގެ ދަށުގައި ވާތީއެވެ.

މާމަޑުއްވަރީ މައްސަލާގައި 248 އަހަރަށްފަހު ޤައުމުގެ ވަލިއްޔުލް އަމްރު މިއަދު މިވަނީ، އަނެއްކާވެސް ހިތާދޫ މީހުންނަށް މާމަޑުއްވަރީ ދެއްވުމަށް ނިންމަވާފައެވެ.