ރ. އަތޮޅު ކައުންސިލްގެ ފަރާތުން އިންތިޒާމުކޮށްގެން، ރަސްމާދޫގައި ކުރިއަށްގެންދިޔަ އަރުތަ ފުޓްސަލް މުބާރާތް 2025 ގެ ފައިނަލުގައި ވާދަވެރި ކުޅުމަކަށްފަހު 4-2 ގެ ނަތީޖާއަކުން ދުވާފަރު ބަލިކޮށް އިނގުރައިދޫ އިން މުބާރާތުގެ ޗެންޕިއަންކަން ހޯދައިފިއެވެ.

އިނގުރައިދޫ މުބާރާތުގެ ފައިނަލުން ޖާގަހޯދީ ސެމީފައިނަލުގެ ފުރަތަމަ މެޗުގައި ފަސޭހަކަމާއެކު 12-2 ގެ ތަފާތުބޮޑު ނަތީޖާއަކުން މީދޫ ބަލިކުރުމަށްފަހު އެވެ. އަދި ދުވާފަރު ފައިނަލުން ޖާގަހޯދީ ސެމީފައިނަލްގެ ދެވަނަ މެޗުގައި ވާދަވެރި ކުޅުމަކަށްފަހު 4-3 ގެ ނަތީޖާއަކުން އަލިފުށި ބަލިކުރުމަށްފަހު އެވެ.

މެޗުގެ ފުރަތަމަ ހާފުގައި ދެޓީމުގެ ފަރާތުން ވާދަވެރި ކުޅުމެއް ފެނިގެންދިޔައިރު، މިމެޗުގައި ފުރަތަމަ ލަނޑުޖަހައި ކުރިހޯދީ އިނގުރައިދޫ އިންނެވެ. އަދި ފަހަތުން އަރައި ދުވާފަރުން ލީޑުހޯދި ނަމަވެސް ފުރަތަމަ ހާފުގެ ކުޅުން ނިމިގެންދިޔައީ 2-2 ގެ ނަތީޖާއަކުން ދެޓީމު އެއްވަރުވެފައި އޮވެގެންނެވެ.

މެޗުގެ ދެވަނަ ހާފުގައި އިނގުރައިދޫ އިން ވަނީ އެޓީމުގެ ކުޅުން ރަނގަޅުކޮށް އެޓޭކުތައް އިތުރަށް ވަރުގަދަކޮށްފައެވެ. ނަތީޖާއެއްގެ ގޮތުން މިހާފުގައި އެޓީމުން ވަނީ އިތުރު ދެލަނޑު ކާމިޔާބުކޮށްފައެވެ. 

އެގޮތުން މިމެޗުގައި އިނގުރައިދޫގެ މަޝީދު އަދި އައިހަމް މިއިން ކޮންމެ ކުޅުންތެރިއަކު ދެލަނޑު ކާމިޔާބުކުރިއިރު، ދުވާފަރުގެ މުސްލިމް އަދި ލޫތު މިއިން ކޮންމެ ކުޅުންތެރިއަކު ވަނީ މިމެޗުގައި އެއްލަނޑު ކާމިޔާބުކޮށްފައެވެ.

މިއީ އިނގުރައިދޫ މި މުބާރާތުގެ ޗެންޕިއަންކަން ހޯދި ފުރަތަމަ ފަަހަރެވެ. އެންމެފަހުން މި މުބާރާތް ބޭއްވި ތިން ފަހަރުގެ ފައިނަލުގައި ވެސް އިނގުރައިދޫ ފައިނަލުން ބަލިވީ ދުވާފަރު އަތުންނެވެ.