މީޑިއާތައް ރެގިއުލޭޓްކުރުމަށް ރައްޔިތުންގެ މަޖިލީހަށް ހުށަހަޅާފައިވާ "މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަންގެ ބިލް" ބޭރުކުރުމަށް މީޑިއާތަކުގެ ބަލަދުވެރި ފަރާތް، މޯލްޑިވްސް މީޑިއާ ކައުންސިލުން ގޮވާލައިފިއެވެ.

އެމްއެމްސީން ނެރުނު ބަޔާނުގައި ބުނެފައިވަނީ، ރައްޔިތުންގެ މަޖިލީހުގެ އަމިއްލަ މެމްބަރު ޢަބްދުލްހަންނާން އަބޫބަކުރު މަޖިލީހަށް ހުށަހަޅާފައިވާ ބިލާ ގުޅިގެން އެކޮމިޝަނުން ވަރަށްބޮޑަށް ކަންބޮޑުވާކަމަށެވެ. އެގޮތުން ބިލް ފަރުމާކޮށްފައިވަނީ ގާނޫނު އަސާސީން ނޫސްވެރިކަމުގެ މިނިވަންކަމަށް ވަރަށްބޮޑަށް ހުރަސްއެޅޭގޮތަށްކަމަށާއި، ބިލް ފަރުމާކޮށްފައިވަނީ މަޖިލީހުގައި އެއިރެއްގައި އޮންނަ މެޖޯރިޓީ ޕާތިއަކަށް މުޅި މީޑިއާގެ ކޮންޓްރޯލް ލިބޭގޮތަށް ކަމަށެވެ.

މި ބިލުން އުފައްދާ ކޮމިޝަން އެކުލެވިގެންވާގޮތުން އަދި މެމްބަރުން ވަކިކުރުމުގެ ބާރު ދީފައިވާގޮތުން މީޑިއާތަކަށް މިނިވަންކަމާއެކު މަސައްކަތްކުރުމަށް ހުރަސްއެޅި، ވަރަށްބޮޑަށް ހުރިހާ ބާރެއް ރައީސުލްޖުމްހޫރިއްޔާ އަދި ރައްޔިތުްނގެ މަޖިލީހަށް ލިބިދޭކަމަށް އެމްއެމްސީން ވަނީ ބުނެފައެވެ.

ނޫސްވެރިން ޝާއިކުރާ ހަބަރުތަކުގެ މަސްދަރު ހާމަނުކުރަން ޤާނޫނު އަސާސީން ކަށަވަރުކޮށްދީފައިވާއިރު، މި ބިލް ފަރުމާކޮށްފައިވަނީ އެހައްގުވެސް ނިގުޅައިގަނެވޭ ގޮތަށްކަމަށް އެމްއެމްސީން ފާހަގަކުރިއެވެ. އޭގެ އިތުރުން މީޑިއާތަކަށް ފިޔަވަޅު އެޅުމުގެ މާއްދާތައް ހިމަނާފައިވާގޮތް ސާފްނުވާކަމަށް އެ ކައުންސިލުން ބުންޏެވެ. އެހެންކަމުން އެކަމަކީ އޭގެ ބޭނުން އެކި ގޮތްގޮތަށް މާނަކޮށްގެން ނާޖާއިޒް މަންފާ ނެގޭނެ ގޮތަށް ފުރުސަތު ހުޅުވިެގންދާނޭ ކަމެއް ކަމަށްވެސް މީޑިއާ ކައުންސިލުގެ ބަޔާނުގައި ވަނީ ބުނެފައެވެ.

މީޑިއާ ތަކާއި މީޑިއާތަކުގެ ބަލަދުވެރި ފަރާތުން ހަންނާން ހުށަހެޅި ބިލާމެދު ކަންބޮޑުވުން ފާޅުކުރިނަމަވެސް ސަރުކާރުން ވަނީ މިއީ އެފަދައިން މީޑިއާގެ މިނިވަންކަން ހަނިކުރާ ބިލެއް ނޫންކަމަށް ބުނެފައެވެ.