ބ.އަތޮޅު ގޮއިދޫ ފަޅުގެ އެތެރެވަރި ހިއްކައިގެން ރިސޯޓް ތަރައްޤީކުރުމުގެ ވިސްނުން ދޫކޮށްލަންޖެހޭކަމަށް ކުރީގެ ރައީސް މުހައްމަދު ނަޝީދު ވިދާޅުވެއްޖެއެވެ.
އެކްސްގައި ކުރެއްވި ޕޯސްޓެއްގައި ރައީސް ނަޝީދު މިއަދު ވިދާޅުވީ، ގޮއިދޫ އަތޮޅު އެތެރެވަރި ހިއްކައިގެން ރިސޯޓް ހެދުމަށްވުރެ، އެތަން އެ އޮތްގޮތަށް ބާއްވައި ބެލެހެއްޓުމުން އަތޮޅަށް ލިބޭނެ ތަނަވަސްކަމާއި ފައިދާ މާބޮޑުވާނޭކަމަށެވެ. ރައީސް ނަޝީދު ވިދާޅުވީ އެސަރަހައްދުގައި ރިސޯޓަށްވުރެ ގެސްޓްހައުސް ވިޔަފާރިން ރަށަށް ވަންނަ ފައިސާ އާއި މަންފާ މާބޮޑަށްވެސް އިތުރުވާނޭކަމަށެވެ.
އެ ސަރަހައްދުގައި ކޮންމެހެން ރިސޯޓެއް ތަރައްޤީކުރަން ވެއްޖެނަމަ، ގޮއިފުޅަ ފެހެންދޫ އިން ކޮންމެވެސް އެއް ރަށެއްގެ ބައިގައި ރިސޯޓެއް ތަރައްޤީ ކުރެވިދާނެކަމަށް ރައީސް ނަޝިދު ވަނީ ވިދާޅުވެފައެވެ.
ގޮއިދޫ އަދި ފެހެންދޫއަކީ އެއް ފަޅެއްގައި އޮންނަ ގުދުރުރަތީ ގޮތުން ވަރަށް ރީތި ސިފަތަކެއް ލިބިގެންވާ ސަރަހައްދެކެވެ.
ގޮއިދޫ/ފެހެންދޫ ސަރަހައްދު.... ފޮޓޯ: ވޮއިސް
މި ސަރުކާރުން ވަނީ ގޮއިދޫ ފަޅުގައި ރިސޯޓެއް ތަރައްޤީކުރުމަށް ނިންމާފައެވެ. އެގޮތުން މިމަހުގެ ތެރޭގައި ރިސޯޓް ހެދުމުގެ އެއްބަސްވުމުގައި ސޮއިކުރެވޭނޭކަމަށް ސަރުކާރުން ވަނީ ބުނެފައެވެ. މިމަހުގެ 12 ވަނަ ދުވަހު ގޮއިދޫއަށް ވަޑައިގެން އެ ރަށުގެ ރައްޔިތުންނާއި ބައްދަލު ކުރައްވާ ވާހަކަފުޅު ދައްކަވަމުން ރައީސް ވިދާޅުވީ ގޮއިދޫ ފަޅުތެރޭގައި ރިސޯޓެއް ތަރައްގީ ކުރުމަކީ އެމަނިކުފާނުގެ ރިޔާސީ ވައުދުފުޅެއް ކަމަށެވެ.
ރިސޯޓު ތަރައްގީ ކުރުމަށް ބަޔަކަށް ބިޑު އެވޯޑު ކޮށްފައިވާކަން ފާހަގަކުރައްވަމުން ރައީސް ވިދާޅުވީ މި މަސް ނިމުމުގެ ކުރިން ރިސޯޓު ތަރައްގީ ކުރުމަށް ސޮއި ކުރާނެ ކަމަށެވެ.
Advertisement
This content is created and paid for by advertisers and does not involve Voice Journalists
