އއ. ތޮއްޑޫއަށް ސީޕްލޭންގެ ހިދުމަތް ފަށާނެ ކަމަށާ އެ ރަށުގައި ފެންވަރު ރަނގަޅު ހޮސްޕިޓަލެއް ގާއިމުކޮށް ދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު އިއުލާނު ކުރައްވައިފި އެވެ.

އއ އަތޮޅުގެ ހުރިހާ ރަށަކަށް ރައީސް ވަނީ އިއްޔެ ރަސްމީ ދަތުރުފުޅެއް ފައްޓަވާފަ އެވެ. އެ ދަތުރުފުޅުގައި މިއަދު މެންދުރު ވަނީ ތޮއްޑޫއަށް ވަޑައިގެންފަ އެވެ. އެ ރަށަށް ވަޑައިގެން ރައްޔިތުންނާއި ބައްދަލު ކުރައްވާ ވާހަކަ ދައްކަވަމުން ރައީސް ވަނީ ތޮއްޑޫގައި މުހިންމު މަޝްރޫއުތަކެއް ކުރިއަށް ގެންދަވާނެ ކަން އިއުލާނު ކުރައްވާފަ އެވެ.

ރައީސް ވިދާޅުވީ ތޮއްޑޫގައި ވަރަށް އަވަހަށް ސީޕްލޭ ފްލެޓްފޯމެއް ގާއިމުކުރުމުގެ މަސައްކަތް ފައްޓަވާނެ ކަމަށެވެ. އަދި އެ މަސައްކަތް ނިންމާ އަންނަ އަހަރުގެ ފެބްރުއަރީ ގައި އެ ރަށަށް ސީޕްލޭން ދަތުރުތައް ފެށިގެންދާނެ ކަމަށެވެ. އެއީ ސެޑިއުލް ކުރެވިގެން ބޭއްވޭ ދަތުރުތަކަށްވާނެ ކަމަށް ވިދާޅުވި އެވެ.

ރައީސް ތޮއްޑޫއަށް ވަޑައިގަތުން -- ފޮޓޯ: ރައީސް އޮފީސް

ސީޕްލޭން ދަތުރުތައް ފެށުމުން މިހާރުވެސް 80 ވަރަކަށް ގެސްޓްހައުސް ހުރި ތޮއްޑޫގެ ލޯކަލް ޓޫރިޒަމަށް ބޮޑު ތަރައްގީއެއް އަންނާނެ ކަމަށް ވިދާޅުވި އެވެ.

މީގެ އިތުރުން މިހާރު ފެށިފައިވާ އެ ރަށު ސިއްހީ މަރުކަޒު ތަރައްގީ ކުުރުމުގެ މަސައްކަތް ފުޅާކޮށް 30 އެނދުގެ ހޮސްޕިޓަލް މަޝްރޫއުއަކަށް ބަދަލު ކުރައްވާނެ ކަމަށް ރައީސް ވިދާޅުވި އެވެ. އޭރުން އައިސީޔޫ އަކާއި އޮޕަރޭޝަންތައް ތިއޭޓަރު ގާއިމު ކުރެވިގެންދާނެ ކަަމަށް ވިދާޅުވި އެެވެ.

މީގެ އިތުރުން އެމްއެންޔޫގައި ފެކަލްޓީ އޮފް އެގްރިކަލްޗަރ އެންޑް ފުޑް ސެކިއުރިޓީސް އުފައްދާ އެ ފެކަލްޓީގެ އިމާރާތް ހަދާނީ ތޮއްޑޫގައި ކަން ވެސް ރައީސް ވަނީ އިއުލާނު ކުރައްވާފަ އެވެ.

ތޮއްޑޫގެ ފެނާއި ނަރުދަމާގެ ނިޒާމުގެ ހިދުމަތް ރަސްމީކޮށް ފެށުން --

ރައީސްގެ މި ދަތުރުފުޅާއި ދިމާކޮށް ތޮއްޑޫގައި ވަނީ ފެނާއި ނަރުދަމާގެ ހިދުމަތް މިއަދު ރަސްމީކޮށް އިފްތިތާހު ކޮށްފަ އެވެ. އަދި އެ ރަށު ދެކުނު ފަރާތުގައި ފާލަން ތަރައްގީ ކުރުމާއި އެ ރަށު ސުކޫލްގެ 10 ކުލާސް ރޫމާއި އިތުރު ވަސީލަތްތައް ގާއިމުކުރުމުގެ މަަސައްކަތު އެއްބަސްވުމުގައި ވެސް ވަނީ ސޮއިކޮށްފަ އެވެ.