ރައްޔިތުންގެ މަޖިލީހުގެ ތަޅުމަށް މިހާރު ހުށަހަޅާފައިވާ މީޑިއާ ބިލްގެ މައްސަލާގައި ނޫސްވެރިންގެ ބަލަދުވެރިފަރާތް، މޯލްޑިވްސް މީޑިއާ ކައުންސިލުން ރައީސުލްޖުމްހޫރިއްޔާ ޑރ.މުހައްމަދު މުއިއްޒުއާ ބައްދަލުކުރަން ނިންމައިފިއެވެ.

މީޑިއާތައް ރެގިއުލޭޓްކުރުމަށް ރައްޔިތުންގެ މަޖިލީހަށް ހުށަހަޅާފައިވާ "މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަންގެ ބިލް"ގެ މައްސަލާގައި އެމްއެމްސީން އިއްޔެ ބޭއްވި ބައްދަލުވުމުގައި އެ ކޮމިޝަނުން ވަނީ ބިލާ ދެކޮޅަށް ފަސް ކަމެއް ކުރުމަށް ނިންމާފައެވެ.

އޭގެ ތެރެއިން އެންމެ ފާހަގަކޮށްލެވެނީ ބިލްގެ މައްސަލާގައި ރައީސް ޑރ.މުއިއްޒާ ބައްދަލުކުރުމަށް ނިންމުމެވެ. މީގެ އިތުރުން އެމްއެމްސީން ވަނީ ނުސްވެރިންނާ އެއްވެސް ވަރަކަށް މަޝްވަރާނުކޮށް ބިލް މަޖިލީހުގެ ތަޅުމަށް ހުށަހެޅުމުން އެއްވެސް ޝަރުތަކާ ނުލައި ބިލް ބަލައިނުގަތުމަށް ކަމާބެހޭ ފަރާތްތަކަށް ދެންނެވުމާއި، ބިލާ ދެކޮޅަށް ކުރެވެން ހުރި ކަންކަން ކުރުމަށް ވަރކިން ގްރޫޕެއް ނަގައިގެން ބިލާ ދެކޮޅަށް މަސައްކަތްތަކެއް ކުރޔުމަށް ނިންމާފައެވެ. މީގެ އިތުރުން ސޯޝަލް މީޑިއާގައި ކެމްޕެއިންތަކެއް ހިންގުމަށްވެސް އެމްއެމްސީން ވަނީ ނިންމާފައެވެ.

މީޑިއާތައް ރެގިއުލޭޓްކުރަން ޖެހޭކަން ފާހަގަކޮށް މަޖިލީހަށް ބިލެއް ހުށަހެޅީ ތުޅާދޫ ދައިރާގެ ރައްޔިތުންގެ މަޖިލީހުގެ އަމިއްލަ މެމްބަރު ޢަބްދުލްހަންނާން އަބޫބަކުރުއެވެ. މިކަމާ ގުޅިގެން އެމްއެމްސީން ވަނީ އެދުވަހުވެސް ބަޔާނެއް ނެރެފައެވެ. ކޮމިޝަނުން ނެރުނު އެ ބަޔާނުގައި ބުނެފައިވަނީ، ބިލް ފަރުމާކޮށްފައިވަނީ ގާނޫނު އަސާސީން ނޫސްވެރިކަމުގެ މިނިވަންކަމަށް ވަރަށްބޮޑަށް ހުރަސް އެޅޭގޮތަށްކަމަށާއި، ބިލް ފަރުމާކޮށްފައިވަނީ މަޖިލީހުގައި އެއިރެއްގައި އޮންނަ މެޖޯރިޓީ ޕާތިއަކަށް މުޅި މީޑިއާގެ ކޮންޓްރޯލް ލިބޭގޮތަށް ކަމަށެވެ.

މި ބިލުން އުފައްދާ ކޮމިޝަން އެކުލެވިގެންވާގޮތުން އަދި މެމްބަރުން ވަކިކުރުމުގެ ބާރު ދީފައިވާގޮތުން މީޑިއާތަކަށް މިނިވަންކަމާއެކު މަސައްކަތްކުރުމަށް ހުރަސްއެޅި، ވަރަށްބޮޑަށް ހުރިހާ ބާރެއް ރައީސުލްޖުމްހޫރިއްޔާ އަދި ރައްޔިތުްނގެ މަޖިލީހަށް ލިބިދޭކަމަށް އެމްއެމްސީން ވަނީ ބުނެފައެވެ.

މީޑިއާކައުންސިލުން ބުނެފައިވަނީ މަޖިލީހަށް ހުށަހަޅާފައިވާ މި ބިލާ ދެކޮޅަށް އެ ކޮމިޝަނަށް ކުރެވެން ހުރި ހުރިހާ ކަމެއް ކުރާނޭކަމަށެވެ. މީޑިއާ ބިލާ ގުޅިގެން ނޫސްވެރިންގެ ޖަމއިްޔާ މޯލްޑިވްސް ޖާނަލިސްތް އެސޯސިއޭޝަނާއި، އިދިކޮޅު އެމްޑީޕީންވެސް ވަނީ ކަންބޮޑުވުން ފާޅުކޮށްފައެވެ. ނަމަވެސް ސަރުކާރަށް ތާއީދުކުރާ ފަރާތްތަކުން ބުނީ، މިއީ މީޑިއާގެ މިނިވަންކަން ހަނިކުރާގޮތަށް އޮތް ބިލެއް ނޫންކަމަށެވެ.