މާލޭގައި، މީހުން ދިރިއުޅެން އެކަށީގެން ވާ މިންވަރަށް ވުރެ ބޮޑަށް، ބާވެފައިވާ 25 އިމާރާތެއް ފާހަގަ ކުރެވިފައިވާ ކަމަށް މާލެ ސިޓީ ކައުންސިލުން ބުނެފި އެވެ. އެ ކައުންސިލުން ވަނީ ބާ ވެފައިވާ އިމާރާތްތަކުގެ ލިސްޓެއް އެކުލަވާލާފަ އެވެ.

ކައުންސިލުން ބުނި ގޮތުގައި ބާ ވެފައިވާ އިމާރާތްތައް އެންމެ ގިނައިން ހުރި ހޭންވޭރުގައި އެ ފަދަ 14 އިމާރާތް އެބަހުއްޓެވެ. މާފަންނުގައި އެ ފަދަ 8 އިމާރާތް, ގަލޮޅުގައި ބާވެފައިވާ ހަތް އިމާރާތް ހުރިއިރު މައްޗަންގޯޅި ގައި ފަސް އިމާރާތް އެބަހުއްޓެވެ.

މާލޭގައި ބާ އިމާރާތުގެ ގޮތުގައި މިހާތަނަށް ފާހަގަ ކުރެވިފައިވާ ޢިމާރާތް ތަކުގެ ލިސްޓެއް، މާލެ ސިޓީ ކައުންސިލުން އެކުލަވާލުމާ ގުޅިގެން، މޭޔާ އާދަމް އާޒިމް ވިދާޅުވީ، ދާދި ފަހުން، ސަރުކާރުގެ ބެލުމުގެ ދަށުގައި ހުރި، ސަލާހުއްދީން ބިލްޑިންގެ ބައެއް ވެއްޓި، ރައްޔިތުންގެ މުދާތަކަކަށް ގެއްލުންތަކެއްވެފައިވާ ކަމަށެވެ. އަދި މި ފަދަ ބާ އިމާރާތްތައް ތަޅައި، އެ ތަންތަން ސާފު ކޮށްދިނުމަށް، އިމާރާތުގެ ވެރިން، ކައުންސިލުގައި އެދެމުންދާ ކަމަށާއި، ނަވެސް ކައުންސިލްގައި އެ ކަން ކުރުމުގެ ފައިސާ އާއި ވަސީލަތްތައް ނެތް ކަމަށެވެ. 

އާޒިމް ވިދާޅުވީ، ގާނޫނުގައި ބުނެފައިވާ ގޮތަށް، ބާވެފައިވާ އިމާރާތުގެ ވެރިފަރާތުގައި، އެ އިމާރާތް ތަޅައިލުމުގެ މާލީ ތަނަވަސްކަން ނެތް ހާލަތުގައި، ސަރުކަރުން އެ އިމާރާތް ތަޅައިލުމަށް ފަހު، އެ ކަމަށް ހިނގި ހަރުދު ހޯދުމަށް އިމާރާތުގެ ވެރި ފަރާތަށް ބިލް ހުށަހަޅަން ޖެހޭ ކަމަށެވެ. 

ބައެއްގެ ފުރާނަ މިކަމުން ގެއްލިއްޖެ ނަމަ އެއީ ވަރަށް ބޮޑު ކަމަކަށްވާނެ ކަން ފާހަގަ ކުރާއްވާ މޭޔާ އާޒިމް ވިދާޅުވީ، މި ކަމަށް ހައްލެއް ހޯދޭނެ ކަހަލަ ގާނޫނެއް ހަދައި ނުވަތަ، ނިޒާމެއް ކަނޑައަޅާފައި ބޭއްވުމަކީ ވިސްނަން ޖެހޭ ކަމެއް ކަމަށެވެ.