ޕާކިސްތާނަށް މިހާރު ކުރަމުންދާ މޫސުމީ ވިއްސާރާގައި ލިބުނު ގެއްލުންތަކަށް ޗައިނާއިން އެހީތެރިކަން ދޭނޭކަމަށް އެޤައުމުގެ ހާރިޖީ ވަޒީރު ވާންގް ޔީ ވިދާޅުވެއްޖެއެވެ.

ޕާކިސްތާނާއި ޗައިނާ ދެ ޤައުމުގެ ހާރިޖީ ވަޒީރުންގެ ބައްދަލުވުމަށް ޕާކިސްތާނަށް މިހާރު ވަޑައިގެން އުޅުއްވާ ޗައިނާގެ ހާރިޖީ ވަޒީރު ވާންގް ވަނީ ޕާކިސްތާނަށް ކުރި ވިއްސާރައާ ގުޅިގެން އެހީތެރިކަން ދޭނޭކަން ހާމަކުރައްވާފައެވެ. އެގޮތުން ދެޤައުމުގެ ހާރިޖީ ވަޒީރުންގެ ބައްދަލުވުންތަކުގައި މިކަމާ ގުޅޭ މުއާމަލާތްތައް ކުރިއަށް ގެންގޮސްފައިވާކަމަށް ޕާކިސްތާނުގެ މީޑިއާތަކުން ވަނީ ރިޕޯޓްކޮށްފައެވެ.

ޕާކިސްތާނުގެ މީޑިއާތަކާ ވާހަކަދައްކަވަމުން އެޤައުމުގެ ބޮޑުވަޒީރުގެ ނައިބު އިޝްހާގް ދާރ ވަނީ ވިއްސާރާގައި ގެއްލުން ލިބުނު ފަރާތްތަކަށް ޗައިނާ ސަރުކާރުގެ ފަރާތުން އިންސާނީ އެހީތެރިކަން ދޭނޭކަމުގެ ޔަގީންކަން ދީފައިވާކަމަށް ވިދާޅުވެފައެވެ. އެގޮތުން ކުރިއަށްމިއޮތް ދުވަސްތަކުގައި ޗައިނާގެ އެހީގެ ޓީމުތަކުން ޕާކިސްތާނަށް އަންނާނޭކަމަށް ބޮޑުވަޒީރުގެ ނައިބު ފާހަގަކުރެއްވިއެވެ.

ހާރިޖީ ވަޒީރުންގެ ބައްދަލުވުމުގައި ޗައިނާގެ ހާރިޖީ ވަޒީރު ވަނީ، ޕާކިސްތާނާ ޗައިނާ އާ ދެޤައުމުގެ ދެމެދު އެކި ދާއިރާތަކުން ގާއިމްކޮށްފައިވާ އެއްބަސްވުންތައް ދެމެހެއްޓުމުގެ މުހިއްމުކަމާ ގުޅޭގޮތުން މަޝްވަރާކޮށްފައެވެ. އެގޮތުން ސަރަހައްދީ ސުލްހައަށް ޕާކިސްތާނާ އިންޑިއާގެ ގުޅުން ބަދަހިވެގެންދިއުން ވަރަށް މުހިއްމުކަމަށް ވާންގް ވަނީ ފާހަގަކުރައްވާފަެވެ.

ޕާކިސްތާނާ ޗައިނާ އާ ދެޤައުމުގެ ދެމެދުގައި މި ފަހަކަށް އައިސް ގިނަ އެއްބަސްވުންތަކެއް ޤާއިމްކުރަމުންދާއިރު، މީގެ ތެރޭގައި އަސްކަރީގޮތުން ގާއިމްކޮށްފައިވާ އެއްބަސްވުންތައް ފާހަގަކޮށްލެވެއެވެ. ޗައިނާއިން ޕާކިސްތާނަށް ހަނގުރާމައިގެ އެކި އާލާތްތައް ހަދިޔާކޮށްފައިވައިރު، މީގެ ތެރެއިން އެންމެ ފާހަގަކޮށްލެވެނީ އެޤައުމުން ދިން ޖެޓްތަކެވެ.

ޕާކިސްތާނަށް މިހާރު ކުރަމުންދާ މޫސުމީ ވިއްސާރާގައި އެޤައުމުގެ ވަރަށްގިނަ އަވަށްތަކަކަށް ވަނީ ބޮޑެތި ގެއްލުންތަކެއް ލިބިފައެވެ. ވާރޭވެހި ކޯރުތައް ބަންޑުންވެ، ބިންގަނޑު ކަނޑައިގެން ދިއުން ފަދަ ހާދިސާތަކުގައި މިހާތަނަށް 400 އަށްވުރެ ގިނަ މީހުންގެ ފުރާނަ ވަނީ ގެއްލިފައެވެ. މޫސުމީ ވިއްސާރައިގެ އަސަރު މިހާރުވަނީ އެޤައުމުގެ އެނމްެބޮޑު އަވަށްކަމަށްވާ ކަރާޗިއަށްވެސް ކުރަން ފަށާފައެވެ.