މިއަދު ފާހަގަކުރަމުންދާ ޤައުމީ ދުވަހުގެ މުނާސަބަތުގައި ދިވެހިންގެ އިހުގެ ވާހަކަތައް މިޖީލަށް ގެނެސްދިނުމުގެ ގޮތުން ދައުލަތުގެ މީޑިއާ، ޕީއެސްއެމުން ހާއްސަ ޑޮކިއުމެންޓްރީއެއް ދެއްކުމަށް ތާވަލްކޮށްފިއެވެ.

ޕީއެސްއެމުން ބުނީ "ޣާޒީ ރަދުން"ނަމުގައި ތައްޔާރުކޮށްފައިވާ މި ޑޮކިއުމެންޓްރީ ތައްޔާރުކޮށްފައިވަނީ، ޕޯޗްގީޒުންގެ އަޅުވެރިކަމުން ދިވެހިރާއްޖެ ސަލާމަތްކޮށްދެއްވުމަށް އުތީމް ބަންޑާރައިން ކުރެއްވި ޖިހާދުގެ ވާހަކަ، ވަށައި ޖެހޭގޮތަށް މުޅި ހާދިސާގެ މައްޗަށް ބިނާކޮށެވެ. މި ޑޮކިޔުމެންޓްރީ ތަފާތުވާ އެއްސަބަބަކީ އެއީކަމަށްވެސް ޕީއެސްއެމުން ބުންޏެވެ.

މި ޑޮކިއުމެންޓްރީގައި ޕޯޗްގީޒުން ރާއްޖެ އެރިގޮތާއި އެމީހުން ރާއްޖެއަށް ޝައުގުވެރިވީގޮތުގެ ވާހަކަ ވަރަށް ތަފްސީލީގޮތެއްގައި ގެނެސްދީފައިވާއިރު، އެދުވަސްވަރު މި ރާއްޖެ އޮންނަ ގޮތާއި، އޭރު ދިވެހިންގެ ދިރިއުޅުމުގެ ތެރޭގައި ހިމެނޭ ކަންކަމުގެ މައްޗަށް ވަރަށް ތަފްސީލީ ގޮތެއްގައި ބަލާލާފައިވާނޭކަމަށް ޑޮކިޔުމެންޓްރީ ތައްޔާރުކުރި ޕީއެސްއެމްގެ ޓީމުން ބުންޏެވެ.

ވޮއިސްއަށް މައުލޫމާތު ހިއްސާކުރަމުން މި ޑޮކިޔުމެންޓްރީގައި ހއ.ބާރަށް، ތަކަންދޫ، އަދި އުތީމް ފަދަ ރަށްރަށަށް ޒިޔާަރަތްކޮށް ބޮޑުތަކުރުފާނުގެ ޤައުމީ ޖިހާދުގެ ވާހަކަތައް އެ ރަށްރަށުގެ އުމުރުން ދުވަސްވީމީހުންނަށް އިވުނުގިތުގެ ވާހަކަތައް ވަނީ ހިމަނާފައެވެ. އެގޮތުން އެ ހާދިސާ އާ ގުޅޭ ތަންތަނާއި އެތަންތަން މިހާރު ހުރިގޮތާއި ވާހަކަތައް ޑޮކިޔުމެންޓްރީގައި ގެނެސްދޭއިރު، ކުރިން އާއްމުވެފައި ނުވާ، އަދި އަޑުނީވޭ ވާހަކަތައްވެސް ޑޮކިޔުމެންޓްރީގައި ހިމެނެއެވެ.

ޑޮކިއުމަންޓްރީ ތައްޔާރުކުރުމުގެ ތެރެއިން... ފޮޓޯ: ދައުލަތުގެ މީޑިއާ

ދައުލަތުގެ މީޑިއާގެ ހަބަރު ޗެނަލް، ޕީއެސްއެމް ނިއުސްއިން މި ޑޮކިޔުމެންޓްރީ ދެއްކުމަށް ތާވަލްކޮށްފައިވަނީ މިރޭ 22:00 ގައެވެ.

ޕީއެސްއެމުން ވަނީ ދިވެހިރާއްޖޭގެ މިނިވަންދުވަހާ ގުޅުވައިގެން، އެދުވަހުގެ ވާހަކަތަކުގެ މައްޗަށް ބިނާކޮށްވެސް ޑޮކިޔުމެންޓްރީއެއް ގެނެސްދީފައެވެ. ޕީއެސްއެމުން އެ ޑޮކިއުމެންޓްރީ ތައްޔާރުކޮށްފައިވަނީ، ޕީއެސްއެމް ނިއުސްޓީމުން އަވައްޓެރި ސްރީލަންކާގެ ކޮޅުނބަށް ގޮހެވެ. ދިވެހިރާއްޖެއަށް މިނިވަންކަން ލިބުނު އެއްބަސްވުމުގައި ސޮއިކޮށްފައިވަނީ ކޮލަމްބޯގައި ހުންނަ އިނގިރޭސި އެމްބަސީގައެވެ.