މިނިވަންކަމާއި ޒިންމާތައް ގުޅިފައިވަނީ އެކަކު އަނެކަކަށް ކުރާ އިހުތިރާމްގެ މައްޗަށްކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.

އުތީމުގައި ބޭއްވި ޤައުމީ ދުވަހުގެ ޖަލްސާގައި ވާހަކަދައްކަވަމުން ރައީސް ޑރ.މުއިއްޒު ވިދާޅުވީ އަޅުގަނޑުމެންގެ މިނިވަންކަމާއި ޒިންމާތައް ގުޅިފައިވަނީ، އެކަކު އަނެކަކަށް ލޯބިކުރުމާއި ހުރުމަތްތެރިކޮށް ހިތުމުގެ މައްޗަށް ކަމަށެވެ. އަނެކާގެ ހައްގުތަކަށް އަރައިގަނެ އަބުރަށް އަރައިގަތުމަކީ ތިމާގެ މިނިވަންކަން ނޫންކަން ފާހަގަކުރައްވަމުން ރައީސް ވިދާޅުވީ ގަބޫލުކުރަންޖެހޭނެ ހަޤީޤަތަކީ ތިމާގެ ދުލުން ބަހެއް ބުނުމަށްފަހު ތިމާއަކީ އެބަހުގެ އަޅަކަށް ވެގެންދާކަންކަމަށް ރައީސް ވިދާޅުވިއެވެ.

ޤައުމީ ދުވަހުގެ ޖަލްސާގެ ތެރެއިން... ފޮޓޯ: ރައީސް އޮފީސް

އަދި އޭގެ ކުރިން އެ ބަހަކީ ތިމަންނާގެ އަޅެއްކަން ވިސްނުމަށް ރައީސް ވަނީ މުއާމަލާތްކުރާއިރު އަނެކާއަށް ހުރުމަތްތެރިކޮށް ހިތުމަށް ނަސޭހަތްތެރިވެފައެވެ. ރައީސް ވިދާޅުވީ ދިވެހިންނަކީ ރީތި ސިފަތަކެއް ލިބި ފަހުރުވެރި ބައެއްކަމަށާއި އެކަން މިއަދު އާކުރަންޖެހިފައިވާކަމަށެވެ.

އެގޮތުން އިހުގެ ދިވެހިންގެ ދިރިއުޅުމާއި އާދަކާދައަށް ބަލާއިރު ދިވެހިންނަކީ މައިންބަފައިންނަށް އިޙްތިރާމް އަދާކުރާ، އަވަށްޓެރިންނަށް އޯގާތެރި އަދި މުސްކުޅިންނާއި އިސްރަށްވެހީންނަށް ހެޔޮކޮށް ހިތައި ކުޑަކުދިންނަށް އަޅާލައި މިހެން ގޮސް ވަރަށް ރީތި ސިފަތަކެއް އޮތް ޤައުމެއްކަން ރައީސްގެ ވާހަކަފުޅުގައި ވަނީ ފާހަގަކުރައްވާފައެވެ.