ހިރިމަރަދޫގައި ގޯއްޗެއް އޮތް ކޮންމެ މީހަކަށް ހަނިމާދޫން ގޯއްޗަކާ ގެއެއް އަދި ބަދަލު ފައިސާވެސް ދޭނެ: ރައީސް
ހދ. ހިރިމަރަދޫގައި ގޯއްޗެއް އޮތް ކޮންމެ ރައްޔިތަކަަށް ހަނިމާދޫން ގޯއްޗެެއް ދެއްވާނެ ކަމަށާ އަދި އެ ގޯތީގައި ގެއެއްވެސް އިމާރާތް ކޮށް ދެއްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުޢިއްޒު މިއަދު ވިދާޅުވެއްޖެ އެވެ.
އެމަނިކުފާނު މިހެން ވިދާޅުވީ ހދ ގެ މީހުން ދިރިއުޅޭ ހުރިހާ ރަށަކަށް މިއަދު ފެއްޓެވި ދަތުރުފުޅުގަ އެވެ. އެ އަތޮޅުގެ މީހުން ދިރިއުޅޭ 13 ރަށަށް ފެއްޓެވި ދަތުރުފުޅުގައި ފުރަތަމަ ވަޑައިގެންނެވީ ހިރިމަރަދޫއަށެވެ. އެ ރަށުގެ ރައްޔިތުން ވަނީ އެ ރަށުން އެހެން ރަށަކަށް ބަދަލުވާން އެދިފަ އެވެ. އެގޮތުން ހަނިމާދޫއަށް ބަދަލުކޮށް ދޭން ރަސްމީކޮށް އެދިފަ އެވެ. އަދި އެކަން ކޮށް ދޭނެ ކަމަަށް ސަރުކާރުން ވަނީ ބުނެފަ އެވެ.
ރައީސް ހިރިމަރަދޫއަށް ވަޑައިގަތުން -- ފޮޓޯ: ރައީސް އޮފީސް
ހިރިމަރަދޫގެ ދުއިސައްތައެއްހާ ރައްޔިތުންނާއި ބައްދަލު ކުރައްވާ ރައީސް ވިދާޅުވީ ހިރިމަރަދޫގައި ގޯއްޗެއް އޮތް ކޮންމެ ރައްޔިތަކަަށް ހަނިމާދޫން ގޯއްޗެެއް ދެއްވާނެ ކަމަށާ އަދި އެ ގޯތީގައި ގެއެއްވެސް އިމާރާތް ކޮށް ދެއްވާނެ ކަމަށެވެ. މީގެ އިތުރުން އެމަނިކުފާނު ވަނީ ހަނިމާދޫއަށް އެ ރައްޔިތުން ބަދަލުވާއިރު ބަދަލު ފައިސާ ވެސް ދެއްވާނެ ކަމަށް ވިދާޅުވި އެވެ.
ރައީސް ހިރިމަރަދޫއަށް ވަޑައިގަތުން -- ފޮޓޯ: ރައީސް އޮފީސް
ރައީސް ވިދާޅުވީ ހިޖުރަކުރާ ރައްޔިތުންނަށް މިހާތަނަށް ދެމުން އައީ ނިސްބަތުން ކުޑަކުޑަ ފައިސާކޮޅެއް ކަަމަށެވެ. އެހެން ކަމުން ހިރިމަރަދޫ ރައްޔިތުންނަށް އެ ފައިސާ ދެއްވުމުގެ ކުރީން އެ އަދަދު މުރާޖައާ ކުރައްވާނެ ކަމަށެވެ.
ރައީސް ހިރިމަރަދޫއަށް ވަޑައިގަތުން -- ފޮޓޯ: ރައީސް އޮފީސް
ހިރިމަރަދޫ ރައްޔިތުން އެ ރަށުން ބަދަލުވާން އެދި ތަކުރާރުކޮށް ހުށައަޅާފައިވާކަން ފާހަގަ ކުރައްވާ ރައީސް ވިދާޅުވީ އެ ރައްޔިތުންނަށް ހަނިމާދޫއިން ހަމަޖައްސައިދޭ ގޯއްޗާއި އެ ގޯތީގައި ގެދޮރުއުޅުމާއި އެ ނޫން ވަސީލަތްތައް ގާއިމުކުރުމުގެ މަސައްކަތަށް އަވަހަށް އަވަހަށް ފައްޓަވާނެ ކަމަށެވެ. އެ މަސައްކަތް ފެށޭތާ 18 މަސްދުވަހުގެ ތެރޭގައި މުޅި މަސައްކަތް ނިންމާލުމަށް އަމާޒު ހިފާފައިވާ ކަމަށް ވެސް ރައީސް ވިދާޅުވި އެވެ.
Advertisement
This content is created and paid for by advertisers and does not involve Voice Journalists
