މީޑިއާ ކޮންޓްރޯލްކުރުމަކީ އެމަނިކުފާނުގެ އެއްވެސް ޝައުގެއް އޮތް ކަމެއް ނޫން ކަމަށާ އެފަދަ ކަމެއް ވެސް ނުކުރައްވާނެ ކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު މިރޭ ވިދާޅުވެއްޖެ އެވެ.

ރައީސް މިމޭރުމުން ވާހަކަފުޅު ދެއްކެވީ ރައްޔިތުންގެ މަޖިލީހުގެ ތަޅުމަށް މިހާރު ހުށަހަޅާފައިވާ މީޑިއާ ބިލްގެ މައްސަލާގައި ވަރަށް ގިނަ ބައެއްގެ ފާޑުކިޔުން އަމާޒުވެފައިވަނިކޮށެވެ. މީޑިއާތައް ރެގިއުލޭޓްކުރުމަށް ރައްޔިތުންގެ މަޖިލީހަށް ހުށަހަޅާފައިވާ "މޯލްޑިވްސް މީޑިއާ އެންޑް ބްރޯޑްކާސްޓިން ރެގިއުލޭޝަންގެ ބިލް" ހުށައެޅީ ތުޅާދޫ ދާއިރާގެ މެންބަރު އަބްދުލްހަންނާން ނަމަވެސް މިއީ ސަރުކާރުން އަޑީގައި އޮވެ ހުށައަޅާފައިވާ ބިލެއް ކަމަށް ގިނަ ބަޔަކު ދެކެ އެވެ.

އެ ކަންބޮޑުވުންތަކާއި ގުޅޭގޮތުން ރައީސް ވަނީ މިރޭ ވާހަކަފުޅު ދައްކަވާފަ އެވެ. ހދ. ނޮޅިވަރަންފަރު ރައްޔިތުންނާއި ބައްދަލުކުރައްވާ ވާހަކަފުޅު ދައްކަވަމުން ރައީސް ވިދާޅުވީ ކޮންމެ ބައެއްގެ ވެސް ޒިންމާތަކެއް އޮންނާނެ ކަމަށެވެ. އެ ގޮތުން މީޑިއާތަކުގެ ޒިންމާތަކެއް ވެސް އޮންނާނެ ކަމަށް ވިދާޅުވި އެވެ.

މީޑިއާތަކާއި ގުޅޭގޮތުން މަޖިލީހަށް ބިލެއް ހުށައަޅާފައިވާ ކަމުގެ މައުލޫމާތު ލިބިވަޑައިގެންފައިވާކަމަށް ވިދާޅުވެ ރައީސް ވިދާޅުވީ އެ ބިލްގައި ހުރި އެމަނިކުފާނަށް ބާރުލިބޭ ކަންކަން އެގޮތަށް އޮތުމަށް ބޭނުންފުޅުނުވާކަން ޕީއެންސީގެ މެންބަރުންނަށް އަންގާފައިވާނެ ކަމަށެވެ. އެގޮތުން ދެން އުފެދޭ ކޮމިޝަނެއްގައި ރައީސަކު އައްޔަނުކުރުމުގެ ބާރު ރައީސަށް އޮންނަ ގޮތަށް ތާއީދު ނުކުރައްވާ ކަމަށް ވިދާޅުވި އެވެ.

ރައީސް ވިދަޅުވީ މީޑިއާތައް މިނިވަންވާން ޖެހޭ ކަމަށާ މީޑިއާ ކޮންޓްރޯލް ކުރުމަކީ އެމަނިިކުފާނުގެ ވިސްނުމެއް ނޫން ކަމަށެވެ.

"އަޅުގަނޑުގެ އެއްވެސް ޝައުގުވެރިކަމެއް އޮތް ކަމެއް ނޫން މީޑިއާ ކޮންޓްރޯލް ކުރުމަކީއެއް. އަޅުގަނޑު އެއްވެސް އިރަކު ކުރިކަމެއް ވެސް ނޫން. އަޅުގަނޑު ކުރާނެ ކަމެއް ވެސް ނޫން. އެހެން ނަމަވެސް ޒިންމާދާރުކަމާއެކު ހުރިހާ ފަރާތްތަކުން ވެސް މަސައްކަތް ކުރަން ޖެހޭނީ,"

އަދި ވިދާޅުވީ ރައީސްގެ ކޮންޓްރޯލެއް އޮންނަން ޖެހޭ ގޮތަށް އެއްވެސް ކަމެއް ބައްޓަން ކޮށްފައި އޮތުމަކީ ގަބޫލުކުރައްވާ ކަމެއް ނޫން ކަމަށެވެ. މި ބިލްގައި މީޑިއާތަކާއި ނޫސްވެރީން އަދި އިދިކޮޅު ސިޔާސީ ޕާޓީތަކުން ކަންބޮޑުވުން ފާޅުކުރާ އެހެން އެއްވެސް ކަމަކާއި ގުޅޭގޮތުން ރައީސް ވާހަކަފުޅެއް ނުދައްކަވަ އެވެ.

އަދި މިބިލާއި ދެކޮޅު މޭރުމަކުން ވެސް ރައީސް ވާހަކަފުޅެއް ނުދައްކަވަ އެވެ.