ޤައުމީ ޕޭމަންޓް ސިސްޓަމް ޤާނޫނަށް ސަރުކާރުގެ ފަރާތުން ގެނައި އިސްލާހް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ތަސްދީގް ކުރައްވައިފިއެވެ.

މި ބިލަކީ މިހިނގާ އޮގަސްޓަމްހުގެ 18 ވަނަ ދުވަހު ބޭއްވި ރައްޔިތުންގެ މަޖިލީހުގެ މިއަހަރުގެ ދެވަނަ ދައުރުގެ 26 ވަނަ ޖަލްސާއިން ފާސްކުރި ބިލެކެވެ. މި ބިލުގެ މައިގަނޑު މަގުސަދަކީ ދިވެހިރާއްޖޭގެ ޕޭމަންޓް އިންފްރާސްޓްރަކްޗަރ ތަރައްޤީ ކުރުމުގެ ގޮތުން ކުރާ މަސައްކަތުގެ ދުވެލި އިތުރަށް ހަލުވިކުރުމަށާއި، މާލީ ނިޒާމު އިތުރަށް ހަރުދަނާކޮށް ޒަމާނީ ޓެކްނޮލޮޖީގެ އެހީގައި އީޖާދީ ޕޭމަންޓް ޚިދުމަތް ތަޢާރަފުކުރުމުގެ ގޮތުން މޯލްޑިވްސް މަނިޓަރީ އޮތޯރިޓީ (އެމް.އެމް.އޭ) އަށް ލިބިދޭންޖެހޭ ޤާނޫނީ ބާރުވެރިކަން ހޯދައިދިނުންކަމަށް ރައީސް އޮފީހުން ބުނެއެވެ.

ޤައުމީ ޕޭމަންޓް ސިސްޓަމް ޤާނޫނަށް ހުށެހެޅި އިސްލާހްގައި ބުނެފައިވަނީ، ޕޭމަންޓް ހިދުމަތެއް ދިނުމަށްޓަކައި މަރުކަޒީ ބޭންކަށް ހިއްސާދާރެއްގެ ނުވަތަ ޕާޓްނަރެއްގެ ހައިސިއްޔަތުން ކުންފުންޏެއް/ ޕާޓްނަރޝިޕެއް ނުވަތަ ޖޮއިންޓް ވެންޗާއެއް ހެއްދިދާނެ ކަމަށެވެ. މީގެ އިތުރުން ގެނެވުނު އސްލާހްގައި ބުނެފައިވަނީ މަރުކަޒީ ބޭންކުން އިސްތިސްނާކޮށްފައިވާ ފަރާތްތަކާއި އެފަދަ ފަރާތްތައް ފިޔަވައި އެހެން އެއްވެސް ފަރާތަކުން ހުއްދަ ލިބިގެން މެނުވީ ރާއްޖޭގައި ޕޭމަންޓް ހިދުމަތެއް ދީގެން ނުވާނޭކަމަށެވެ.

އަދި އެފަދަ ކަމެއް ކޮށްފިނަމަ އެއްލައްކަ ރުފިޔާ އާއި 10 މިލިއަން ރުފިޔާއާ ދެމެދުގެ އަދަދަކުން ޖޫރިމަނާކުރެވޭގޮތަށް މަރުކަޒީ ބޭންކަށް ވަނީ ބާރުދީފައެވެ.

ޤައުމީ ޕޭމަންޓް ސިސްޓަމް ވަކި ކުންފުންޏެއްގެ ދަށުން ހިންގުމަށް ނިންމާފައިވާކަން މަރުކަޒީ ބޭންކުން އިއުލާނުކޮށްފައިވަނީ ހުސްވި ޖުލައިމަހުގެ 26 ވަނަ ދުވަހެވެ. އެމްއެމްއޭއިން ޤައުމީ ޕޭމަންޓް ސިސްޓަމް ހިންގުމަށް ނިންމާފައިވަނީ "ޕޭމަންޓް މޯލްޑިވްސް" ނަމުގައި ކުންފުންޏެއް ހަދައިގެންނެވެ. މީގެ އެއް ބޭނުމަކީ ބައިނަލްއަޤްވާމީ ފެންވަރުގައި ބަލައިގަންނާނޭ ޕޭމަންޓް ނުވަތަ ފައިސާގެ މުއާމަލާތުގެ ނިޒާމެއް ގާއިމްކުރުންކަމަށް އެ ބޭންކުން ބުނެއެވެ.