ޝަރުއީ ދާއިރާގެ މުވައްޒިފުންނަށް މޫނު ބުރުގާ އެޅޭ ގޮތަށް ގަވާއިދު އިސްލާހްކޮށްފި އެވެ.
ޖުޑީޝަލް ސާވިސް ކޮމިޝަންގެ ނިންމުމާއި އެއްގޮތަށް ޑިޕާޓްމަންޓް ޖުޑީޝަލް އެޑްމިނިސްޓްރޭޝަނުން ވަނީ އެ ނިންމުން އިއުލާނުކޮށްފަ އެވެ. އަދި ޑީޖޭއޭގެ ޗީފް ޖުޑީޝަލް އެޑްމިނިސްޓްްރޭޓަރ އަމްޖަދު މުސްތަފާ ސޮއިކުރައްވާ އެކަމާއި ގުޅޭ ސާކިއުލާ ވަނީ ނެރެފަ އެވެ. ޑީޖޭއޭގެ ސާކިއުލާގައި ބުނެފައި ވަނީ ޝަރުއީ ދާއިރާގެ މުވައްޒިފުންގެ ޤަވާއިދުގެ 129 ވަނަ މާއްދާއަށް އިސްލާހް ގެނެސްފައިވާ ކަމަށެވެ.
ޝަރުއީ ދާއިރާގެ މުވައްޒިފުންގެ ގަވާއިދުގެ 129 ވަނަ މާއްދާ ގައި ހެދުން އެޅުމުގައި މީހުން ފާހަގަވެ އެނގޭނެ ގޮތަށް ހެދުން އުޅުން ބަޔާންކުރާ މާއްދާގައި ބުނެފައި ވަނީ ޝަރުއީ ދާއިރާގެ ކޮންމެ ޚިދުމަތަކީ ވެސް ޒިންމާދާރު ކަމާއެކު ދޭންޖެހޭ އަދި ޖަވާބުދާރީވާންޖެހޭ ހިދުމަތަކަށްވެފައި ހިދުމަތް ލިބިގަންނަން އަންނަ ފަރާތްތަކާ މުއާމަލާތް ކުރާ ފަރާތްތަކަށް އެ މީހަކު ފާހަގަކޮށް އެނގެން ޖެހޭނެތީ މުވައްޒިފުން މަސައްކަތު ގަޑީގައި ހެދުން އަޅާފައި ހުންނަންވަނީ ކާކުކަން ރަނގަޅަށް އެނގޭފަދަ ގޮތެއްގައި ކަަމަށެވެ.
އެ މާއްދާއަށް ށ ވަނީ އިތުރުކޮށްފަ އެވެ. އެ މާއްދާގައި ބުނެފައި ވަނީ ހ ގައި އެހެން އޮތް ނަމަވެސް ޝަރުޢީ ދާއިރާގައި މަސައްކަތް ކުރާ އަންހެން މުވައްޒަފުން މޫނު ބުރުގާ (ލޯ ނުފޮރުވޭ ގޮތަށް) އެޅުން ހުރަހެއް ނާޅާ ކަމަށެވެ.
ނަމަވެސް މަސައްކަތުގެ މާހައުލުގައި އުޅޭ އުޅުމުގައި މިފަދައިން ހެދުން އަޅާ މުވައްޒަފަކީ ކާކުކަން ކަށަވަތު ކުރަން ބޭނުންވެއްޖެނަމަ އެފަދަ މުވައްޒަފެއްގެ މޫނު ކޯޓުން ނުވަތަ އިދާރާގެ ކަމާބެހޭ އަންހެން މުވައްޒަފަަކަށް ދައްކަން ވާނެ ކަަމަށް ބުނެފައިވެ އެވެ.
މޫނު ބުރުގާ އަޅާތީ ބައެއް މީހުން ވަޒީފާއިން ވަކިކުރުން ފަދަ ކަންކަން ކުރިމަތިވެފައިވެ އެވެ. ބައެއް ޓީޗަރުންނަށް ފިޔަވަޅު އަޅާ ވަޒީފާއިން ވެސް ވަކިކޮށްފައިވެ އެވެ.
Advertisement
This content is created and paid for by advertisers and does not involve Voice Journalists
