މާލެ ސިޓީ ގްރޫޕް އޮފް ހޮސްޕިޓަލްސް ގެ މަލްޓި ސްޕެޝަލިޓީ ސަރޖިކަލް ކޭމްޕް، ރ އުނގޫފާރު ރީޖަނަލް ހޮސްޕިޓަލުގައި މިއަދު ފަށައިފިއެވެ.

މިއީ އަތޮޅުތެރޭގެ ރަށްތަކުގެ ސިއްހީ ހިދުމަތް ރަނގަޅުކުރުމަށް ސަރުކާރުގެ ސިޔާސަތުގައި ހިމެނިގެން ސިއްހީ ވުޒާރާ އާއި މާލެ ސިޓީ ގްރޫޕް އޮފް ހޮސްޕިޓަލްސް ގުޅިގެން ކުރިއަށްގެންދާ ޕްރޮގްރާމެކެވެ. މި ޕްރޮގްރާމް ކުރިއަށްގެންދަނީ އަތޮޅުތަކުގެ ރީޖަނަލް ހޮސްޕިޓަލްތަކުގައެވެ.

އުނގޫފާރުގައި މިއަދު ފެށި މި ޕްރޮގްރާމާ ގުޅިގެން މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ އިބްރާހީމް އަބްދުއްރައްޒާގު ހަލީމް ވިދާޅުވީ މި ޕްރޮގްރާމްގެ ދަށުން އެކި ސްޕެޝަލިޓީތަކުން ޑޮކްޓަރަށް ދެއްކުމުގެ އިންތިޒާމްތައް ކުރިއަށްދާއިރު، ސަރޖިކަލް އޮޕަރޭޝަންތައް ކުރުމާއި، އުނގޫފާރު ރީޖަނަލް ހޮސްޕިޓަލުގެ ޑޮކްޓަރުންނާއި ނަރުހުން ތަމްރީނުކުރުމުގެ ކަންކަން ކުރިއަށްދާކަމަށެވެ. 

ހަލީމް ވިދާޅުވީ ރާއްޖޭގެ އަތޮޅުތަކުގައި ދެއްވާ ޞިއްޙީ ޚިދުމަތް އިތުރަށް ފުޅާކުރުމަށް، ހެލްތް މިނިސްޓްރީއާއި، ރީޖަނަލް ހޮސްޕިޓަލްތަކާ ގުޅިގެން މާލެ ސިޓީ ގްރޫޕް އޮފް ހޮސްޕިޓަލްސްގެ ދައުރު އިތުރަށް ފުޅާކޮށް ރައްޔިތުންނާ ގާތުން މަސައްކަތް ކުރުމަކީ އެ ކުންފުނީގެ އަމާޒުކަމަށެވެ. 

މި ޕްރޮގްރާމުގައި ކެންސަރުބައްޔާއި، ކުޑަކަމުދާ ނިޒާމުގެ ބަލިތަކާއި، ސިކުނޑިއާއި ނާރުގެ ބަލިތަކުގެ އިތުރުން، އާއްމު އޮޕަރޭޝަންތަކުގެ ޚާއްސަ ޑޮކްޓަރުންގެ ޓީމަކުން ބަލިމީހުންނަށް ފަރުވާދިނުމުގައި ހަރަކާތްތެރިވެއެވެ. މި ކޭމްޕް އުނގޫފާރު ހޮސްޕިޓަލުގައި ކުރިއަށްގެންދިއުމަށް ހަމަޖެހިފައިވަނީ އަންނަ ހޯމަދުވަހުގެ ނިޔަލަށެވެ. 

މާލޭ ގްރޫޕް އޮފް ހޮސްޕިޓަލުން ވަނީ މި ޕްރޮގްރާމް މީގެކުރިން ހދ.ކުޅުދުއްފުއްޓާއި، ލ.އަތޮޅު ރީޖަނަލް ހޮސްޕިޓަލުގައިވެސް ކުރިއަށްގެންގޮސްފައެވެ.