މަހްލޫފް އެމްޑީޕީން ވަކިވެވަޑައިގެންފި
ކުރީގެ މިނިސްޓަރު އަހްމަދު މަހްލޫފް އެމްޑީޕީން ވަކިވެވަޑައިގެންފި އެވެ.
މަހްލޫފް ވަނީ އެމްޑީޕީން ވަކިވެވަޑައިގަންނަވަން ބޭނުންވާކަން ހާމަކުރައްވާ އެ ޕާޓީގެ ޗެއާޕާސަން ފައްޔާޒް އިސްމާއީލަށް ސިޓީއެއް ފޮނުއްވާފަ އެވެ. އެ ސިޓީގައި ވިދާޅުވީ އެމްޑީޕީގެ މެންބަރު ކަމުން ވަކިވެވަޑައިގަންނަވަން ބޭނުންވާތީ ޕާޓީން ވަކިކޮށްދެއްވުމަށެވެ.
އަދި 2015 ވަނަ އަހަރުން ފެށިގެން އެމްޑީޕީއަށް ހިދުމަތް ކުރުމުގެ ފުރުސަތު ލިބުނު ކަމަށްޓަކާ ޝުކުރުއަދާ ކުރެއްވި އެވެ. ވަކީން ޚާއްސަކޮށް ރައީސް އިބްރާހިމް މުހައްމަދު ސޯލިހް ރާއްޖެއަށް ގެނެސް ދެއްވި ތަރައްގީގެ ބައިވެރިއެއްގެ ގޮތުގައި އެމަނިކުފާނުގެ ކެބިނެޓްގައި ހިދުމަތް ކުރުމުގެ ފުރުސަތު ދެއްވީތީ އެކަން ފާހަގަ ކުރަައްވާ ޝުކުރު އަދާކުރެއްވި އެވެ.
މަހްލޫފް ވަނީ އެމްޑީޕީގެ މެންބަރުންގެ ތެރެއިން އޭނާއަށް ތާއީދުކޮށް ދެއްވި ހުރިހާ މެންބަރުންނަށް ޝުކުރު އަދާކުރައްވާފަ އެވެ. އަދި އޭނާގެ ނިންމެވުމާމެދު ހިތްހަމަ ނުޖެހޭ މެންބަރުންްގެ ކިބައިން މާފަށް އެދިވަޑައިގެންނެވި އެވެ.
ކުރީގެ މިނިސްޓަރު މަހްލޫފް އެމްޑީޕީން ވަކިވެވަޑައިގެންނެވިއިރު މި ފަހުން ސިޔާސީ އެއްވެސް ކަމެއްގައި ބައިވެރިވެވަޑައިނުގަންނަވަ އެވެ. އަދި ކުޅިވަރުގެ ކަންކަމުގައި ވަރަށް އިސްކޮށް އުޅުއްވަ އެވެ.
ކުޅިވަރާއި ބެހޭ މިނިސްޓަރަކަށް ހުންނެވިއިރު ވެސް މަހްލޫފް ފާހަގަ ކުރެވުނީ ސިޔާސީ ކަންކަމާއި ކުޅިވަރު ވަރަށް ބޮޑަށް ވަކިކޮށް ހިދުމަތް ކުރެއްވި މިނިސްޓަރެއްގެ ގޮތުގަ އެވެ. އޭނާއަކީ ކޮންމެ ޕާޓީއެއްގައި ހުންނެވި ނަމަވެސް އެކި ސިޔާސީ ފިކުރުތަކުގެ މީހުންނާއި ވަރަށް ގާތްގުޅެއް އަބަދުވެސް ބާއްވަވާ ބޭފުޅެކެވެ.
Advertisement
This content is created and paid for by advertisers and does not involve Voice Journalists
