ބ. ދޮންފަނުގެ ބިން ހިއްކުން ކުރިޔަށް ނުގެންދިއުމަށް ނިންމި ނަމަވެސް އެ ރަށުގެ ބަނދަރުގެ މައްސަލަ ޙައްލުކުރުމާއި، ގޮޑުދޮށް ޙިމާޔަތްކުރުމުގެ މަޝްރޫއު ކަނޑައެޅިފައިވާ ގޮތަށް ކުރިއަށް ގެންދާނެ ކަމަށް ކޮންސްޓްރަކްޝަން މިނިސްޓަރު އަބްދުﷲ މުއްތަލިބް ވިދާޅުވެއްޖެ އެވެ.
ދޮންފަނުގެ ރައްޔިތުންގެ އެދުމުގެ މަތިން އެ ރަށުގައި ބިން ހިއްކުމުގެ މަޝްރޫޢެއް ހިންގަން ވަޢުދުވެވަޑައިގެންނެވިން ކަމަށާއި، އެ މަސައްކަތް ކުރުމަށް އެއްބަސްވުމެއްގައި ވެސް ސޮއިކުރެއްވި ކަމަށް ރައީސް ވިދާޅުވި އެވެ. އެހެން ނަމަވެސް މިހާރު އެ މަސައްކަތްކުރުމަށް ރައްޔިތުން ބޭނުންނުވާކަން ރައްޔިތުންގެ ފަރާތުން އެމަނިކުފާނަށް އެނގިފައިވާތީ އެ މަސައްކަތް ހުއްޓާލާފައިވާ ކަމަށް ރައީސް މިއަދު ވަނީ އިއުލާނު ކުރައްވާފަ އެވެ.
އެކަމާއި ގުޅިގެން މިނިސްޓަރު މުއްތަލިބު މިއަދު ވިދާޅުވީ ދޮންފަނު ބިން ހިއްކުން ކުރިއަށް ނުގެންދަވަން ރައީސުލްޖުމްހޫރިއްޔާ ނިންމެވުމާއި ގުޅިގެން ބިން ހިއްކުން ކުރިއަށް ނުގެންދިޔަ ނަމަވެސް ބަނދަރުގެ މައްސަލަ ހައްލުކުރުމާއި، ގޮޑުދޮށް ހިމާޔަތްކުރުން ސަރުކާރުން ކުރިއަށް ގެންދާނެ ކަމަށެވެ.
ދޮންފަނު ބިން ހިއްކަން ނިންމުމާއި ގުޅިގެން އެ ރަށާއި ކިލޯމީޓަރެއްހާ ކައިރީގައި އޮންނަ ހަނިފަރަށް ދޮންފަނު ހިއްކުމުން އަސަރުކުރާނެ ކަމަށް ބުނެ ވަރަށް ގިނަ ބަޔަކު ވަނީ ކަންބޮޑުވުން ފާޅުކޮށްފަ އެވެ. އެތަނަކީ ބައޮސްފެއާ ރިޒާވްއަކަށް ވާއިރު، އެތަނަކީ މުޅި ދުނިޔެއިން ވެސް ވަރަށް މަދުން ފެންނަ ފަދަ މަންޒަރުތައް ފެންނަ ސަރަހައްދެކެވެ. 539 ހެކްޓަރުގެ ބޮޑު ސަރަހައްދަކީ ފެހުރިއްސާއި އެންމަޑި ފަދަ ތަކެތި ކާނާ ހޯދުމަށް ޖަމާވާ ތަނެކެވެ.
Advertisement
This content is created and paid for by advertisers and does not involve Voice Journalists
