ރައްޔިތުންނަށް ދަތިވި ވަގުތުގައި ސަރުކާރުން ބައެއް ބާވަތްތަކުގެ މުދާ ހެޔޮއަގުގައި އެސްޓީއޯ މެދުވެރިކޮށް ވިއްކަން ނިންމުމުން އެމްޑީޕީ ސަރުކާރުގެ މާލީ ވަޒީރު އެކަމާ ނުރުހުން ފާޅުކުރައްވައިފިއެވެ.
ރައީސުލްޖުމްހޫރިއްޔާ ޑރ.މުހައްމަދު މުއިއްޒު ރޭ ވަނީ، އަސާސީ ބައެއް ބާވަތްތައް އެސްޓީއޯއިން ގަނޑުކޮށް އެތެރެކޮށް ރާއްޖޭގެ ބާޒާރުގައި ވިއްކަން ފެށުމަށް ކެބިނެޓުގެ މަޝްވަރާއާއެކު ނިންމާފައިވާ ކަަން ހާމަކުރައްވާފައެވެ. ރައީސް އެކަން އެގޮތަށް ކުރައްވަން ނިންމެވީ ދިވެހިރާއްޖޭގައި ފުޑް ސެކިޔުރިޓީ ގާއިމުކުރުމަށް މި ސަރުކާރުގެ މެނިފެސްޓޯގައި ބަޔާންކޮށްފައިވާ ސިޔާސަތުގެ ތެރެއިންކަމަށް ރައީސް ވަނީ ފާހަގަކުރައްވާފައެވެ.
މިކަމާ ގުޅިގެން އަމީރު ވިދާޅުވެފައިވަނީ، އެކަމަށް ފުޑް ސެކިއުރިޓީ އޭ ނުކިޔާނޭ ކަމަށެވެ. ފުޑް ސެކިއުރިޓީ އަށް ވާނީ އަގުހެޔޮކޮށް ވިއްކުމަށް ފާހަގަކޮށްފައިވާ ބާވަތްތައް ރާއްޖޭގައި ހެއްދުމުންކަމަށް އަމީރު ވަނީ ފާހަގަކުރައްވާފައެވެ. އެގޮތުން ސަރުކާރުގެ އަމަލުތައް މިހާރު ހުރީ އަމިއްލަ ފަރުދުންގެ ވިޔަފާރިއަށް ވަންނަންކަމަށް އަމީރު ވިދާޅުވިއެވެ.
ބާޒާރުގައި އަގުބޮޑުވެގެން ރައްޔިތުން ޝަކުވާއަކަށްވެފައިވާ ބައެއް ބާވަތްތަކުގެ މުދާ ސަރުކާރާ ރައްޔިތުންގެ ކުންފުނި އެސްޓީއޯއިން އެތެރެކުރުމަށް ނިންމީ ރައްޔިތުންނަށް އަތްފޯރާ އަގުތަކެއްގައި އެތަކެތި ލިބޭނޭ އިންތިޒާމް ހަމަޖައްސައިދިނުމަށްކަމަށް ސަރުކާރުން ވަނީ ބުނެފައެވެ.
ކުރީ ސަރުކާރުތަކުން މީގެ ކުރިންވެސް ވަނީ މިފަދަ ހާލަތްތަކުގައި މި ބީދައިން އަމަލުކޮށްފައެވެ. އެގޮތުން ރޯދަމަހު ބިހާއި ފިޔާ އަދި އެނޫންވެސް ބާވަތްތަކުގެ އަގުތައް މައްޗަށް ދިއުމުން އެތަކެތި ހެޔޮ އަގެއްގައި ފޯރުކޮށްދިނުމުގެ ގޮތުން ރާއްޖެ އެތެރެކޮށް ވިއްކަމުންދިޔައީ އެސްޓީއޯއިންނެވެ. އެމްޑީޕީ ސަރުކާރުގައި ވޭތުވެދިޔަ ރޯދަމަސްތަކުގައި ލުނބޯ،ފިޔާ އަދި ބިހުގެ އިތުރުންވެސް ތަރުކާރީގެ ބާވަތްތައް އަގުބޮޑުވުމުން އެސްޓީއޯއިން ވަނީ އެތަކެތި އެތެރެކޮށް ހެޔޮއަގުގައި ވިއްކާފައެވެ.
އެފަދަ ތަކެތި އެސްޓީއޯއިން ގެންނަނީ ހަމައެކަނި ބާޒާރުގައި އަގުތައް މައްޗަށް ދިއުމުން އެވަގުތަށް ހައްލުގެނައުމަށެވެ. އަގުތައް ހަމަޔަކަށް އެޅުމުން އެސްޓީއޯއިން އެތަކެތި ގެނައުން މަޑުޖައްސާލާކަން ފާހަގަކޮށްލެވެއެވެ.
Advertisement
This content is created and paid for by advertisers and does not involve Voice Journalists
