ދޮންފަނު އުރަފަށުގައި ޑައިވްކުރުން މަނާކުރުން: ނިންމުން ބާތިލުކުރަން އަންގައިފި
ބ އަތޮޅު ދޮންފަނު އުރަފަށުގައި ފީނުމާއި ޑައިވްކުރުން މަނާކުރަން އެރަށު ކައުންސިލުން ނިންމި ނިންމުން ބާތިލުކުރަން ލޯކަލް ގަވަރމަންޓް އޮތޯރިޓީ (އެލްޖީއޭ) އިން މިރޭ އަންގައިފި އެވެ.
ދޮންފަނު ކައުންސިލުން ވަނީ އެރަށުގެ އުރަފަތުން ފެށިގެން 700 މީޓަރު ސަރަޙައްދުގައި ފީނުމާއި ޑައިވްކުރުން ވަގުތީ ގޮތުން މަނާކޮށްފަ އެވެ.
އެ ނިންމުމާއި ގުޅިގެން އެލްޖީއޭ އިން ނެރުނު ބަޔާނެއްގައި ބުނެފައި ވަނީ ލާމަރުކަޒީ އުސޫލުން ހިންގުމުގެ ގާނޫނުގައި ގުދުރަތީ ނުވަތަ ތަބަޢީ ގޮތުގައި ދެމެހެއްޓުމަށްޓަކައި ރައްކާތެރިކުރަން ޖެހޭ ތަންތަން ފިޔަވައި އެހެނިހެން ސަރަޙައްދުތައް ވަކި ކައުންސިލެއްގެ އިޙްތިޞާސް ކަމުގައި ކަނޑައެޅިފައިވިޔަސް އެތަންތަނުގައި ގާނޫނަކުން މަނާ ކަމެއްކަމުގައި ކަނޑައަޅާފައިނުވާ ކަންކަން އިތުރު ހުއްދައަކާއި ނުލައި ކުރުމުގެ ހައްގު ދިވެހި ކޮންމެ ރައްޔިތަކަށް ލިބިގެންވާ ކަމަށެވެ.
އަދި ދޮންފަނުގެ އުރަފަތުން ފެށިގެން 700 މީޓަރު ސަރަހައްދުގައި ފީނުމާއި ޑައިވްކުރުން ވަގުތީ ގޮތުން މަނާކޮށް އެ ރަށު ކައުންސިލުން ނިންމާފައިވާ ނިންމުމަކީ ގާނޫނާއި ހިލާފު ނިންމުމެއް ކަމަށެވެ.
ކައުންސިލްތަކުގެ ބެލެނިވެރި ފަރާތުން ވަނީ މިފަދަ ނިންމުންތައް ނިންމުމުގެ އިޙްތިޞާސް ކައުންސިލަށް ލިބިގެން ނުވާތީ ކައުންސިލުން ނިންމާފައިވާ އެ ނިންމުން ބާޠިލުކުރަން އަންގާފަ އެވެ.
Advertisement
This content is created and paid for by advertisers and does not involve Voice Journalists
