ކުޑަކުއްޖެއްގެ ކަރާމާތަށް ނޭރުމަށް އަންގައި ބްރޯޑްކާސްޓިން ކޮމިޝަނުން ރާއްޖެޓީވީއަށް ނަސޭހަތުގެ އިންޒާރެއް މިއަދު ދީފިއެވެ.
ބްރޯޑްކާސްޓިންގެ ބަލަދުވެރިފަރާތުން މި އިންޒާރު ރާއްޖެޓީވީއަށް ދީފައިމިވަނީ، އެޓީވީން ބްރޯޑްކާސްޓްކުރި ކޮންޓެންޓަކާ ގުޅިގެންނެވެ. މިއީ މިއަހަރުގެ މާޗްމަހު އެމްޑީޕީން ކުރިއަށްގެންދިޔަ ކުށްލި އެއްވުމުގައި އެޓީވީން އޮންއެއާކުރި ކޮންޓެންޓެކެވެ. އެ ކޮންޓެންޓްގައި ހިމެނެނީ ރާއްޖޭގައި ވޭޕު މަނާކުރި ސަބަބު އޮޅުވާލާ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ދަރިކަލުންނާއި ގުޅުވާ ދޮގު ވާހަކަތަކެއް, އެމްޑީޕީގެ އެކްޓިވިސްޓް މަރިޔަމް ޒުބައިރު (މަންދީ) ދެއްކި ވާހަކައެވެ.
މި މައްސަލަ ބަލާފައިވަނީ ބްރޯޑްކޮމްގެ އަމިއްލަ އިސްނެގުމުގެ މަތިންނެވެ.
ބްރޯޑްކާސްޓިން ކޮމިޝަނުން މައްސަލަ ބެލުމަށްފަހު ބުނެފައިވަނީ، ރާއްޖެޓީވީން ފޮނުވި އެ ކޮންޓެންޓަކީ ކުޑަކުދިންގެ ކަރާމަތާއި، ހައްގުތަކަށް ބުރޫއަރާކަމަށެވެ. އެގޮތުން ބްރޯޑްކާސްޓްކުރުމުގެ ކޯޑް އޮފް ޕްރެކްޓިސްގެ ހަމަތަކާއި، ހިލާފްވާގޮތަށް ތަކުރާރުކޮށް ކޮންޓެންޓް ބްރޯޑްކާސްޓްކުރަމުންދާނަމަ، ނުވަތަ މިފަދަކަމެއްދެން ތަކުރާރުކޮށްފިނަމަ އެ މައްސަލައިގެ ޒާތަށާއި ޚައްޞާޞް ކަމަށް ބަލައި ޤާނޫނާއި ޤަވާއިދުގެ އިމުގެ ތެރެއިން ހަރުކަށި ފިޔަވަޅު އަޅާނެކަމަށް ކޮމިޝަނުން ވަނީ ބުނެފައެވެ.
ރާއްޖެ ޓީވީގެ އިތުރުން ބްރޯޑްކާސްޓިން ކޮމިޝަނުން ވަނީ ޗެނަލް 13 އިން ފޮނުވި ފްރޮންޓް އޮފީހުގެ ޖަލްސާއެއްގެ ކޮންޓެންޓް މައްސަލައެއް ބަލައި އެޓީވީގެ ޝެޑިއުލް ވަކި ވަގުތަކަށް މެދުކަނޑާލުމަށް އަންގާފައެވެ.
Advertisement
This content is created and paid for by advertisers and does not involve Voice Journalists
